噚晚早睡今朝早起，梳完就去食早餐，再check out出發去八食市場。八食市場係一個超大超乾淨嘅街市，除咗好多唔同種類嘅水產店外，仲有乾貨同土產店，邊睇邊行邊買邊映相已經係一種享受，行完我哋仲食埋海鮮BBQ添！
我哋响市場買咗大蝦、帶子、北寄貝同海膽，去到七厘村每人俾咗¥ 200就可以開爐坐低燒嘢食。d海鮮真係好新鮮， 燒好加少少鹽調味已經好鮮甜，好好味！淨食海鮮有d＂漏＂， 再去買咗d本菇金菇，加水用食完嘅帶子殼裝住嚟燒，又幾好味喎！ 食飽執好d垃圾就離開啦！
下一站就去八戶附近嘅Aeon Mall行吓。d日用品同家庭用品真係好平好低， 幾難拎都買咗d。行到咁上下係時候起程去青森市啦。
由八戶去青森唔係太遠，但大部份時間都係行國道。 我哋開車無耐就開始天黑，而且又落起大風雪， 唔開車頭大燈乜都睇唔到，開就淨係見到d雪，能見度極低， 我哋唯有將架車開到好慢，以龜速行車。 經過今次決定儘量避免響夜晚開車，真係好狼狽！
幾經辛苦終於嚟到青森市，比原定時間晏咗d，由於大家未肚餓
，諗住先去青森產物館行吓，點知已經閂咗門， 青森巿d舖頭都閂得早，剩低d食店仲開，唯有去食晚飯。 我哋去咗附近有間旅遊書提過嘅食炸豬扒，老闆娘好好人， 仲送咗包糖果俾洛洛。我哋分別叫咗吉列豬／ 牛扒同鐵板燒豬扒，吉列豬牛就麻麻哋， 但鐵板燒豬扒就好juicy好好味， 就連唔鐘意食肉嘅洛洛從此愛上咗食肉！
食飽就番酒店休息嘞，今晚住 Super Hotel，房間式一樣， 不過可以打開窗欣賞吓大雪中嘅青森街頭。 睇咗陣電視執吓嘢就休息喇。 (day 6 )
沒有留言:
發佈留言