今日我哋最後都日响曼谷，夜晚會搭夜機返香港。朝早嘆完個靚早餐之後我哋就去泳池遊水，之後我哋就check out，將行李寄存响酒店就出去行下。
由於我哋搭夜晚機，仲有幾個鐘先出機場，原本想去唐人街行下但驚塞車，所以最後決定响附近行下。酒店附近有個大商場，本身d舖頭都係係好一般，無乜嘢行，點知行到上層有一個好大嘅室內playground ，呢度收費唔貴，小朋友唔駛THB400任玩，見有咁多時間，所以就俾三儍响度放電。
呢度好大好多嘢玩，可以俾三儍爬高爬低，又可以通過唔同嘅障礙物，連大人都覺得好好玩，玩到咁上下就去食午餐啦。
我哋返酒店拎埋行李，就搭之前預約咗嘅Limousine出機場。出到機場見仲有時間就行多陣買手信。由於我哋搭廉航，所以食咗飯先上機。揀咗一輸最後食泰國菜，d嘢都幾好食，係有少少偏咸。食飽我哋就上機返香港啦。
(Day4完)
朝早起身梳洗之後就去酒店餐廳食個豐富早餐，食飽飽我哋就出去玩啦。今日我哋去嘅係之前去過嘅Kidzania，上次嚟呢度玩嗰陣二同三儍只係bb，所以今次嚟對佢哋嚟講都好有新鮮感。我哋出發前已經預先約咗，到咗counter 對咗資料俾咗錢，職員同我哋一人帶咗隻手帶之後就可以入去玩。需然呢度嘅職業種類同上次差唔多，但係上次根本玩唔晒，所以今次玩嘅項目同上次都有唔同，玩到肚餓就响快餐店自制漢堡飽食，食完再玩過，玩到4點幾大家都好攰，而且想玩嘅項目都差唔多玩晒，雖然玩得好開心，但我哋都要走啦。
離開咗Kidzania ，我哋就去附近嘅Siam Square 同Siam Center 行街，等埋姑媽姑丈一齊食飯，不過因為佢哋塞車，我哋又開始肚餓，商量完決定我哋食咗飯先，等埋姑媽姑丈過嚟一齊食甜品。我哋揀咗一輪決定去米芝連推界嘅Nara食泰菜。餐廳好多人，雖然我哋都好早到，但係都要等半個鐘先可以入坐。坐低先叫咗沙冰果汁解渴，之後再慢慢叫嘢食。我哋叫咗炸塘虱魚青芒沙律、泰式串燒、生蝦刺身、香茅雞翼、蝦球炒飯、蟹肉炒飯、炸蝦餅同大頭蝦粉絲煲。不愧為米芝連推介嘅餐廳，d嘢好好食，賣相一流，餐廳嘅service 亦好好，連個位都坐得好舒服，雖然呢餐唔平，但就好滿意，有機會會再返嚟食。
食飽行多陣等埋姑媽姑丈我哋就再去食甜品。甜品店叫afteryou，呢幾年响泰國勁hit，我哋一家五口兵分二路，唔食榴槤嘅大儍同二儍跟姑媽去另一間舖，我哋就地食榴連甜品，呢度最出名係佢嘅榴連沙冰，用嚟打咭一流，另外再叫多份pancake，沙冰唔止個樣靚，仲好香榴連味，好好食，需然只係叫咗2份share，但係太大份，差唔多食唔晒。食飽飽我哋就繼續去行街街。
由於今晚係最後一晚，所以我哋行夜d，我哋由Siam Paragon行去Big C 掃零食手信，收獲好豐富，飲飽食醉行夠買夠我哋就坐的士返酒店休息啦。
（day 3)
一早起身大家繼續好興奮參觀酒店房，睇夠我哋就落樓下食早餐。早餐係自助型式，酒店餐廳雖然幾細，但食物選擇都唔少，除咗一般cold cut腸仔麵色沙律水果乳酪之外，仲有即煎嘅蛋，奄列同即沖杯麵，飲品都係即叫即沖。d嘢味道唔錯，食飽我哋就出去酒店附近嘅Big C 入貨，話就話附近但係都要行差唔多10分鐘，好彩呢度都幾多嘢睇，買完野拎返酒店。今朝個早餐太飽，所以我哋到咗午餐時間都未有胃口食飯，所以就落咗去酒店嘅泳池游水，雖然酒店嘅泳池都幾細，但好彩無乜人，三儍可以盡情玩水，玩完我哋就返房梳洗再出去食飯。
我哋搭BTS 去 Siam再行過去The Market 食人妖姐姐海南雞飯，雖然已經過咗食飯時間，但係都仲有好多人排緊隊，好彩唔係等咗好耐，大概10分鐘就可以入去食嘢啦。我哋叫咗炒菜、雞雜、雞紅、春卷，當然唔少得最出名嘅海南雞飯，呢度啲嘢好好味d雞好滑好香。埋單唔算好貴，食飽返咗去隔離買泰茶飲，邊飲邊行返去Siam。
我哋行返去Siam 還神之後就再搭BTS去Emporium行街買手信，呢度買手信嘅好處就係可以pack有專人送到酒店，完全唔使拎住周圍走，買完一大堆零食係時候又肚餓，簡簡單單食咗多士我哋就去行夜市。
夜市嘅舖頭仔就幾有特色，原本諗住響夜市食埋晚餐，一個睇嗰啲嘢唔太啱食，行完街之後最後決定去附近嘅Terminal 21食晚餐。行咗一陣就求其揀咗一間食泰國嘢嘅舖頭，估唔到有幾驚喜，啲嘢幾唔錯幾好食，而且又唔貴，食飽想我哋就搭的士返酒店休息喇。
(day 2完）
我哋又飛喇！
無錯，相隔一個星期，我地又上機。呢個星期原本唔係放大假，同事臨時唔放俾咗我放，㩒下機票價錢又合理，加埋可以夾到姑媽姑丈都齊去玩，所以決定快閃四日曼谷。
由於budget 有限，今次我哋都係搭HK Express嘅傍晚機，6點上機，到埗過海關攞埋行李出到的士站都已經差唔多10點，好彩夜咗唔塞車，半個鐘車程我哋就已經到咗酒店。
我哋呢4日住嘅係 Somerset Ekamai Bangkok，係一間 Service Appartment。間房好大好舒服，除咗飯廳客廳之外仲有2間房同2個洗手間，三儍好開心咁走嚟走去參觀同揀佢哋瞓邊間房。
我哋同姑媽姑丈book 埋同一間酒店，酒店亦都好貼心咁安排响同一層。雖然上機之前我哋都食咗嘢，但係過𡂖咁耐乜都消化晒。好彩姑媽姑丈之前買定咗d串燒俾我哋食，食飽我哋就沖涼上床休息啦。
（Day 1 完）
今日我哋會返香港，响酒店食完早餐我哋就拎埋很李check out。雖然會考慮再嚟廣島玩，不過就因為地點同service 唔會再住呢間酒店。
我哋check out咗之後就去廣島Aeon Mall行街。呢度超大，基本上一日都應該行唔哂，我行完街就响Food Court 解決午餐，雖然平平哋，不過都幾好食。
食完嘢我哋就揸車去廣島機場還車，再搭飛機返香港喇。
(全文完)
因為過去一年好忙，加上社會氣氛令到無乜心機，所以一路無更新。今年因為武漢肺炎關係無得去旅行，睇返舊年嘅post 先醒起未寫完呢個 trip（其實仲有個泰國trip未寫）而家要的起心肝寫埋佢，希望仲記得d detail 啦。
今日我哋會去行程中其中一個重點-吳市，所以一早就起身落酒店嘅餐廳食早餐。雖然呢間酒店房好細，service 又麻麻，但早餐真係幾正，除咗一般嘅日式同西式日餐食品外，仲有黑門市場直送嘅吞拿魚腩蓉同吞拿魚刺身，食完好好味好豐富嘅早餐就出發去吳市啦。
由廣島市去吳市好近，揸車大概半個鐘就到。呉市一路以嚟都係日本嘅海軍重鎮，响呢度有兩間有關海事防衞同海軍歴史嘅博物館。三儍對軍事好有興趣，所以佢哋好期待呢度嘅行程。我哋第一站先去海上自衛隊吳史料館，未到目的地見到史料館嘅外表大家都已經嘩一聲叫出嚟，因為呢度展示咗一隻曾經服役嘅潛艇。呢度免費入場，展館唔算好大，主要展示有關海上自衛隊歷史和裝備的展品，但因為三儍對海軍嘅裝備好有興趣，所以都睇得好開心，呢度最正嘅可以入埋去展示嗰隻潛艇睇埋埋內部裝備同設施，而且仲有曾响呢隻潛艇服役嘅退休自衞官教我哋用潛望鏡，好好玩好得意。
响史料館玩咗差唔多2個鐘，我哋就去附近嘅Aeon Mall搵食，由於天氣太熱，兼早餐食得好飽，所以今餐簡簡單單食烏冬，雖然係連鎖店，不過都好好食，食完就去海軍歴史博物館玩。
海軍歴史博物館要俾入場費，不過都係幾佰円，俾完入場費一入場就見到好大嘅大和號嘅模型，個模式整得好精細好靚;三儍對二戰好有興趣，所以見到大和模型就好興奮，我哋睇完模型就參觀其他地方，呢度除咗戰艦模型之外仲有退役戰機同二戰時嘅資料睇，啱晒三儍。睇完展覽上三樓仲有個有關海事知識嘅遊樂場，啱晒三儍，可以邊玩邊學有關海事知識。我哋玩到差唔多5點就走，揸車返去廣島。
响酒店泊好車我哋趁時間仲早就搭電車去本通行一陣街，之後就返酒店附近食晚餐。今晚係最後一晚，所以決定食我哋最愛嘅燒肉放題，呢餐唔貴兼好食 ，食飽飽就返酒店整理行李預備聽日check out 。
(Day 13完)
