三儍襲本州 day 8 23/8/2014

今日唯一嘅行程就係去Universal Studio，起身食咗早餐就出發。去到Universal studio都係開咗門唔係好耐，但就已經人頭湧湧，買咗飛就入場。

入咗去其實有d迷茫，因為唔知行去邊玩d乜先好。見到Spiderman就諗住排隊玩，不過原來有高度限制，最想玩嘅貓貓唔夠高所以無得玩，失望到喊。為咗令佢開心番，我哋去咗Backdraft睇火災現場，雖然明知係假嘅，但真係感受到火嘅熱力同威力，好正！

玩完出嚟係時侯認真研究有乜啱玩，發現好多games都唔啱貓貓玩，所以決定先陪兩個細玩，等佢哋瞓晏覺先同哥哥玩。我哋下一站去Wonderland，諗住d機動遊戲應該都ok，點知有d都係有高度限制，好彩都有少量games都啱貓貓玩，加上室內palyground都好啱貓貓翹玩，而且仲佈置得好靚，所以佢哋都好開心。

玩完見開始肚餓就去醫肚，我哋揀咗食漢堡飽，食物價錢唔算好貴，亦包裝得好靚，不過味道就一般，食完又去玩過。

啱俾貓貓翹翹一齊玩嘅唔太多，我哋揀咗Jaws-坐船仔睇大白鯊，對佢哋嚟講已經新奇刺激又好玩。玩完差唔多夠鐘去Harry Portter魔法世界。

其實我哋一集Harry Portter都無睇過，不過呢個景點係新開，嚟到無理由唔入去睇下。我哋入園無耐已經拎定整理券，預約咗入Harry Portter魔法世界嘅時間。入去時已經要排隊，入到去更加人頭湧湧，不過裏面又真係幾靚。由於太多人，所以我哋映下相行下就走。

出番去最細個兩個已經要瞓覺，我同哥哥趁佢哋瞓咗就去玩 Space Fantasy，好刺激好好玩，玩完兩個都差唔多醒，所以就一齊去睇4D電影，睇完已經7點幾，是見開始肚餓就離開 Universal studio，返出去道頓堀食飯。

出到去行咗一轉都唔知食乜好，但三儍就對道頓堀嗰d大型公仔看板極之有興趣，睇到好開心，同佢哋映完相時間已經唔早，求其入咗間舖食天婦羅，哈，估唔到又幾好味，食飽就番酒店喇。

（day 8 完）

三儍襲本州 day 7 22/8/2014

今日節目豐富，所以一早就起咗身，去酒附設嘅餐廳食早餐。早餐係酒店包埋，食物選擇唔算好多，但都ok好食，d咖啡仲好好飲，食飽上房拎埋行李就check out。呢間酒店價錢唔貴，都係一萬円左右一晚，但無論地點、房間、服務都唔錯，如果下次有機會再嚟岡山都會住番呢間酒店。

今日天氣麻麻，一早開始有雨，好彩我哋有租車，如果唔係就會好狼狽。上車坐定定就出發去Kirin位於岡山嘅啤酒廠參觀。工場見學要預早上網預約，完全免費，我哋因為行錯路所以遲到咗10分鐘，去到參觀嘅tour已經開始咗，不過職員叫我哋先登記資料，之後等其他參觀者睇完介紹viedo就join埋一齊參觀工廠。我哋睇咗點樣釀製啤酒，又睇咗點樣將啤酒入罐包裝，三儍雖然聽唔明日文解說，但都覺得好新奇得意，參觀tour大概一個鐘左右就完咗，完咗就安排咗試飲，有啤酒同埋Kirin其他產品如茶、果汁等選擇，仲有俾埋小食我哋邊食邊飲，飲飽食醉响記念品店買咗d手信就去下一站。

下一站就係去摘桃。其實好多年前已經想嚟岡山摘桃，今次都算還咗心願。由Kirin啤酒廠到桃園唔駛半個鐘車程就到，桃狩係預約制，之前已經上網book咗，去到俾咗錢就有職員帶我哋去特定嘅桃樹，教我哋點揀桃同摘桃，由於我哋book咗摘6個桃，即係每人都可以試摘一次，都算係個幾特別嘅體驗。摘完桃可以拎走，之後就去食桃，我哋分別係有2位試食2個桃而1位係任食，d嬸嬸拎咗d好靚嘅桃出嚟教我哋點切，睇完示範就開始食喇，我同三儍就分享4個桃而爹爹就任食，d桃真係超香甜勁多汁，連平時唔食生果嘅哥哥都食咗大半個，不過我因為要睇住三儍唔可以儘情食，d嬸嬸見我顧得d細唔得閒食仲得登拎多個桃切好請我食，好感動呢！d桃好大個，食一個已經飽咗一半，但係爹爹居然响半個內食咗7個桃，勁！

食桃食到好飽，飽到到咗食飯時間都唔肚餓，決定加插多個行程，就係去倉敷嘅美觀地區。去到諗住泊低㗎車，不過停車場好貴，泊20分鐘要300円，但去到又無埋由唔行，所以都照泊。美觀地區風影好靚，沿河好多好有特色嘅舊建築，不過因為泊車費實在太貴，唔可以慢慢行，行咗陣映下相就走喇。

時侯唔早，見有d肚餓就去附近嘅Aeon mall，搵咗間日式家庭餐廳食飯。價錢唔算平但麻麻好食，食完就揸車番岡山還車，再撘新幹線返大阪。

因為岡山係中途站，駕車好full所以無位坐，好彩車程一個鐘左右，到咗新大阪站我哋就去酒店check in。今晚我哋住嘅酒店係新大阪站上面 Remm Hotel。上到12樓嘅lobby check in，攞埋之前寄嚟嘅兩個喼就上房。同之前住嘅唔同，呢間酒店行型格路線，酒店房唔算細，但因為間房有差唔多一半係浴室，所以唔多地方走動。房裡面除咗兩張好舒服嘅床之外，仲有按摩椅，行得攰可以按下摩。放低行李我哋去咗梅田行咗陣，買咗d嘢食番酒店食。酒店個浴室好正，沖咗個靚涼就瞓覺喇。

（day 7完）

三儍襲本州 day 6 21/8/2014

今日我哋會去岡山。朝早好早就要起身，整理好行李食完早餐之後就check out。同上次一樣，因為唔想抬喼，所以只係拎咗輕便行李，個大喼就寄去大阪嘅酒店，今次寄喼比上次仲要平，只係¥1200，搞掂哂就搭地鐵去JR京都站返落大阪。

由今日起我哋會用 Kansai Wide Area Pass，只係俾¥7200就可以响關西地區連續4日任搭JR，仲包埋去由大阪至岡山嘅山陽新幹線，真係好低，因為一程新幹線都要差唔多¥8000，只係搭一程都已經賺咗，不過因為Pass只係包由大阪去岡山嘅新幹線，所以要先去新大阪站，再响新大阪轉車去岡山。同上次樣，三儍新幹線又係興奮到儍咗，上咗車食下小食睇下風景玩下影下相，大概一個鐘左右就到咗岡山。

到咗岡山我哋先去酒店放底行李，今晚我哋住岡山後樂酒店，距離JR站只有7、8分鐘路程，但因為天氣實在太曬太熱，好似行咗好耐先到咁，我哋放底行李就搭JR去倉敷行outlet。到咗倉敷先去outlet附近嘅mall食午餐，由於天氣太熱所以大家決定食蕎麥麵，求其入咗間食，估唔到不單止幾好味，仲幾低食。

食完我哋就行outlet。日本人真係好細心，行outlet小朋友會好悶，但就為咗行outlet變成親子活動，所以响outlet周圍有遊樂場樹屋等遊樂設施俾小朋友玩。三儍見到有公園有樹屋已經走咗去玩，不過好彩玩完都肯乖乖吔陪我哋行街街。行完outlet再行埋隔離嘅mall，見時候唔早就起程返岡山。

返到岡山我哋就去Toyota攞車。因為我哋聽日去嘅地方响郊區，自駕會方便好多，所以預先已經上網租定車，去到出示番passport、國際駕駛執照、同予confirm booking嘅email，簽好文件就可以check車。值得一讚就係岡山駅前店service好好，佢哋預備咗d樽裝飲品俾客人免費飲用，另外，佢哋將租車條款翻譯成中英文，放咗入 i pad 度方便輔助解說，唔駛雞同鴨講，清晰賺慳唔少時間。搞掂哂手續就可以攞車，我哋今次租嘅係 Ractis，車仔細細，好彩都坐得到賺放得落㗎重型bb車。

攞咗車我哋就番酒店，酒店有車位供應，泊好車我哋就check in 上房。間房係family room，張床係兩張queen size bed 拍埋一齊，夠哂我哋一家五口碌，間房面積好大，三儍就最開心，因為有好多地方俾佢哋走動。

上房休息夠就要預備食晚餐，其實無計劃食乜，只係响酒店附近行咗圈之後決定食燒肉放題，上到燒肉店唔駛等就有位。我哋叫咗¥3000一位嘅放題set，menu有一百種食物任揀，除咗唔同種類嘅豬牛雞海鮮外，仲有蔬菜沙律，烏冬麵炒飯等料理同埋雪糕甜品。d食物好新鮮好味，份量好足，上菜同落order都好快，不過美中不足係放題得90分鐘，唔多夠時間食。

食飽飽我哋就响酒店散下步，行埋酒店下藥房就返房休息喇。

（day 6 完）

三儍襲本州 day 5 20/8/2014

由於噚晚無去浸浴，所以今朝好早起身去浸。大浴場d水幾熱，正好一鬆弛一下，浸完再返房瞓多一陣，瞓夠先起身食早餐再出去。

今日去清水寺，其實幾年前我哋嚟過京都，不過上次落大雨所以去唔到清水寺，所以今次補番去。由酒店去清水寺最方便係搭巴士，而巴士站就响酒店附近，好方便，不過最高難度就係收咗㗎bb車，等到有巴士時再啲㗎bb車同3隻怪獸上車。我哋搭嘅巴士等咗一陣就到，不過因為清水寺係熱門景點，所以㗎巴士都多人搭，車程大概20分鐘左右就到清水寺。我哋响落車前先同司機叔叔買巴士嘅one day pass，大人500円，原本我哋想買2大1小，不過司機叔叔望咗哥哥一眼就話2個大人就ok，咁又慳番250円。

其實嚟清水寺之前有考慮過帶唔帶bb車，但因為貓貓實在太重，加埋翹翹一齊瞓哂覺的話就唔知點算，所以之前已經做咗功課，搵到有人推bb車遊清水寺嘅分享，決定帶bb車。落咗車我哋由五年坂上清水寺，五年坂上清水寺一路都係斜坡，無樓梯，所以可以唔駛抬車就上到去，不過我哋呢㗎係孖b車，仲要坐住兩隻怪獸，所以推起上嚟都頗吃力。終於上到清水寺，清水寺好大，風景好靚，而且可能因為上到半山，所以有陣陣涼風住，好舒服。我哋慢慢行慢慢睇，周圍映下相，好快已經2個幾鐘，係時候食午餐，我哋就離開清水寺喇。

因為推住bb車，所以唔可以行二年坂三年坂，只可以由清水坂行番落去，再搭巴士去袛園食晏。由於太肚餓，所以求其樁咗入一間食店食蕎麥麵，估唔到都唔錯。

原本plan咗食完晏去伏見稻荷大社，但天氣實在太熱，加上食完嘢已經接近3點，所以決定改為响周圍行下。行經好出名嘅抹茶甜品店辻利見到舖面d雪糕甜品好似好吸引咁，雖然好多人排隊，但實在太想食，而且我哋有時間，所以都照排，排隊期間d店員仲好體貼咁送上冰毛巾同綠茶俾我哋消暑。由於我哋啱啱食飽飯無耐，所以只係叫咗2份甜品，分別係芭菲同刨冰，2份都超好味，茶味好香好濃，尤其個刨冰唔同平時加糖漿嗰d ，佢係用抹茶雪成冰先刨碎， 唔會食到尾無哂味，而且甜度啱啱好，好消暑解渴，食完成個人涼哂，再嘆番杯香濃嘅焙茶清一清口嘅甜味簡直完美。原本諗住2份甜品share都夠食，最終要再叫多份刨冰先夠喉。

食完甜品就搭巴士去京都站買 Kansai Wide Area Pass預備聽日用，再行下京站附近行下街。因為晏晝食得太多嘢，所以夜晚唔係好肚餓，加上行咗成日已經好攰，所以我哋就响百貨公司嘅食品部買便當返酒店食。便當雖然涷咗，不過都幾好食，食完我哋去浸浴，再返房休息喇。

（day 5 完）

三儍襲本州 day 4 19/8/2014

今比之前早咗d起身，因為要撘新幹線落京都。起身換好衫pack 好行李我哋就將其中一個喼拎落 front desk，用宅配便送去大阪。雖然要俾差唔多仟五円，而且要隔日先到，但諗到唔駛拎住過裝滿污糟衫同戰利品，响大熱天時四圍走就覺得物超所值。

寄完行李我哋就去酒店附近嘅松屋食早餐，食完就番上房拎埋d行理check out，出發去東京站撘新幹線。因為預咗今日會比較趕，所以早一日已經買定新新幹線嘅車票，二、三儍未到6歲，可以免費乘搭。大人車票要¥13000，一d都唔平，但就慳好多時間同舒服好多。我哋買嘅車票係自由席，平指定席1仟円左右，無mark定位，有機會無位坐，但好處係出票後4日內坐任何一班車落京都都得，唔駛限定邊班車，方便我哋呢d帶住小朋友，隨時有突發事發生唔可以肯定on time上車嘅人。就好似今日，我哋比原定時間遲咗個幾鐘先去到東京站，買咗便當就去月台等車。

正如所料，三隻怪獸見到㗎新幹線列車已經開心到顛咗，响車頭點映完相之後就排隊等車。由於由東京去關西嘅車好密，而且東京站係總站，所以我哋好輕易就搵到位坐，坐定定開車之後就攞d便當出嚟食。同我睇卡通電視好大分別，點解d主角可以好他調地邊食便當邊欣賞沿途境色而我哋唔係囉!幾經辛苦終於食完便當，食埋甜品清理好垃圾我哋先叫做有得抖抖，可以上下網映下相，大概2個鐘多d我哋就到咗京都喇。

我哋先去酒店放低行李，由JR站去酒店仲要搭一程地鐵，去到四条烏丸仲要行多10分鐘先到。我哋今晚住三井花園酒店（四条店），揀呢間酒店係因為京都酒店普遍都係貴，呢間平得嚟comment好好，而且又有個大浴場可以浸下。終於到咗酒店，第一印象好好，職員好nice同我哋打招乎，front desk 嘅 staff好有效率好有禮貌，好快已經搞掂哂check in 手續，仲有staff
拎咗d小玩具送俾三儍，氹到佢哋好開心。搞掂哂上房喇，我哋book 咗3人房，間房都幾大幾新，張床仲好舒服𠻹。

放好行李抖咗陣我哋就出去，原本plan咗今日去清水寺，不過而家已經下晝3點幾，比原定到京都遲咗2個鐘，所以更改行程去附近嘅錦市場行。錦市場係一條商店街，專賣食材，我哋就最鐘意行呢d食品市場 ，邊行邊睇邊食邊買，連三隻怪獸都唔覺得悶。唔經唔覺已經行完錦市場，見時間仲早，就行埋過去袛園。

由錦市場行過去袛園經過河原町同鴨川，鴨川風景好靚，企响橋睇風景仲有陣陣涼風吹住，真係舒服到唔想走。我哋映完相睇完風景就繼續行去袛園，搵到花見小路就行入去，周圍d建築物都好靚好有特式，仲有好多人特登著埋和服嚟遊覽映相。

行完袛園行番去河原町行咗陣街，見開始有d肚餓，就行番去酒店方向，沿路搵嘢食。我哋今晚去大户屋食晚飯，d嘢平得嚟都ok好食。食完就番酒店，嗲嗲帶哥哥二個大嘅去浸溫泉，我就國同細嘅响房度休息，佢哋浸完買埋雪糕返房，一齊食完就上床瞓覺喇。

(Day 4完）