原本諗住今日早d起身，欣賞松島嘅日出，但當然起唔到身啦！瞓醒日頭已經出晒，唯有去食個早餐，再去浸吓溫泉，朝早女湯都係無人，所以我哋可以邊浸 邊映相，舒舒服服浸完就上房執好行李check out嘞！幫我哋 check out嘅亦即係噚日幫我哋 check in、serve 我哋早晚餐嘅三浦先生，永遠笑容滿臉，又醒目又周到，另方面成間酒店又好似得佢一個職員咁，乜都佢做晒，好好笑。臨走前又送咗件玩具俾洛洛，又同洛洛握 手，又送我哋出門口，好nice！
離開松島我哋繼續北上，離開宮城縣到盛岡縣，經過3個幾鐘頭車，到達小岩井農場。停車場泊咗好多架軍車，原來自衛隊派咗批軍人嚟幫手予備雪祭。
冬天嘅小岩井農場其實無乜嘢玩，但都有得睇羊咩咩。不過睇羊咩咩前先要醫肚，去餐廳食個幾好味嘅午餐，再去埋隔離嘅販賣店買行咗陣買cheese cake做宵夜。行咗一陣見個肚有空位，再去牛奶館食個香滑軟雪糕。
食完雪糕就行去羊館睇羊咩咩，再周圍行吓映吓相，見時間唔早，就要上車起程去乳頭溫泉鄉。
車 程比予計嘅長，去到鶴之湯個天已經黑齊，而且非常大雪，去辦事處登記咗就入房。我哋今晚住嘅係好難預約到，有三百幾年歷史嘅本陣。房間好古色古香，仲有個 火爐，火爐唔止用嚟裝飾，仲有實際用途，好似而家咁就燒緊魚嘞。由於我哋未住過d咁古老嘅溫泉旅館，所以覺得每一樣嘢都好特別，不停映相留念，映咗一輪係 時候開飯啦！
今晚響房裏面食，燒緊嘅魚岩亦係我哋今晚嘅主菜，職員預備好飯菜，教我哋燒魚嘅方法就離開。燒好嘅岩魚好鮮甜，再加上大家圍住火爐食秋田鄉土料理另有一番風味。食飽就由職員幫我哋收拾好，舖好床舖。
房間無電視，飯後最佳節目莫過於浸溫泉，我哋先去內湯沖乾淨涼，浸熱個身，再出露天混浴。由於天氣眞係好凍，我哋快手快腳除咗衫圍住毛巾就走出室 外，理不得有無走光就跳落水，匯合已經落咗水嘅爹爹同姑丈。溫泉水由於天氣太凍嘅關係，一d都唔熱，但d水真係奶白色，好滑，洛洛仲叫佢做奶奶溫泉。我哋 一路浸住＂奶奶溫泉＂，一路賞雪，一路傾計。雪越落越大，我哋驚洛洛冷親，就上水返房食宵夜瞓覺啦！
沒有留言:
發佈留言