三儍再襲九州 day 8 25/7/2015

瞓醒覺我哋就落去旅館嘅餐廳食早餐。我哋坐定定職員就送上日式早餐，早餐分量好多，而且好好味，食飽飽我哋就返上房執好行李 check out喇。

嚟到湯布院一定要試好出名嘅蛋卷，離開旅館就揸車去溫泉街嘅B-speak 買蛋卷，雖然舖頭只係啱啱開，但已經人頭湧湧，唔怪得要預訂。我哋買完蛋卷之後原本想行陣溫泉街，但係天氣實在太熱，而且想早d去下一個目的地玩，所以放棄咗，希望遲d有機會再嚟過。

我哋上車出發喇，離開湯布院，我哋去番熊本縣，今日會去熊本嘅阿蘇ミルく牧場玩，揸車過去要2個幾鐘，沿途風景好靚，一路欣賞風景唔覺唔覺就到咗喇。泊好車俾埋入場費就入去玩，原本想俾三儍揸下牛奶騎下馬仔，但我哋遲咗小小趕唔切去排隊，不過三儍見到d小動物就已經好開心。

午餐响牧場食燒肉，價錢唔算貴但都好好味，三少仲食到停唔到口。食飽就繼續响牧場玩，我哋睇咗動物賽跑，又去抱抱小動物，餵下羊咩咩，四圍行下睇下。最開心嘅係嗰度有太陽花田，原本行程中有安排去太陽花田，不過就唔到所以取消咗，雖然呢度嘅太陽花田規模唔算好大，但映相出嚟都好靚，總算還咗我心願。玩到熱我哋去食下雪糕，再行下土產店買手信同牛奶，行到人哋差唔多閂門我哋就走喇。

由牧場去熊本市唔駛一個鐘車程，泊咗車响酒店指定嘅停車場就去酒店check in。今晚我哋住Comfort Hotel，酒店响商店街附近，位置好方便，但之前响博多Comfort Hotel實在太唔掂，所以對呢間Comfort 不寄予厚望，點知check in 時職員已經送咗三儍一人一份盥洗用品，氹到佢哋好開心，之後上房仲驚喜，間房又大又乾淨，放好行李就出去行街街。

落到樓下就已經係商店街，真係超方便，我哋行到d舖頭差唔多閂門就去食飯。今晚去居酒屋食晚餐，呢間居酒屋香港都有分店，最出名係雞翼，d雞翼又真係幾好味，不過就好熱氣，其他嘢食就一般。食完就慢慢行番去酒店附近嘅激安之殿堂行下，得晚餐落格，再番酒店食B-speak嘅蛋卷同阿蘇嘅牛奶做宵夜，蛋卷真係好好味，好鬆軟又唔太甜，牛奶就又濃又香甜，兩樣一齊食真係好夾，食到飽飽就沖涼瞓覺啦。

（day 8  完）

三儍再襲九州 day 7 24/7/2015

今日又係晨咁早起咗身，望出窗外原來個天仲未光，但原來我哋間房向住東面，可以欣賞到日出。睇完日出就落下浸番轉溫泉消除疲勞，浸完再叫醒3儍去食早餐。

酒店早餐好豐富， 除咗日式同西式嘅食物之外，仲有新鮮水果，食飽飽我哋就番房望住個無敵海景休息一陣，再執好行李check out。呢間酒店好正，真係唔捨得走，希望下次有機會再住過。

 下一站係高千穗，不過我哋唔係去高千穗峽而係去坐小火車，小火車係响一條因颱風破壞而廢棄嘅鐵路上面運行，對三儍嚟講去睇風景不如去坐下小火車，所以我哋揀用呢個方法去遊覽高千穗 。由日南到高千穗車程要2個半鐘左右中間我哋响PA食晏，不過嘛嘛好食，食完就繼續上路。

終於去到目的地。由於小火車無得予約，所以一路都驚去到無哂位，一停好車我就第一時間衝去買飛，但都只係買到1個鐘頭後嘅車票，原本可以四圍行下夠鐘先番嚟，不過天氣實在太熱，唔想周圍走所以响度等。職員見我哋係外國人，响等侯期間都好積極安排d節目俾三儍，俾佢哋予先坐下响鐵路行嘅電動車，又去車庫睇已經停駛嘅火車。一個鐘好快過，係時侯上小火車喇。

小火車路程其實好短，全程都係半鐘，途中會穿過隧洞，經過車站同農田，最後响條谷上面嘅鐵橋上停低，响鐵橋上可以吹住山風欣賞峽谷嘅風景，好舒服好寫意，最搞笑嘅係揸車嘅叔叔居然响鐵橋度放泡泡，襯埋風景又係幾靚嘅。短短半個鐘嘅小火車之旅好快就結束，我哋係時候又再起程。

經過2個幾鐘嘅車程，我哋終於到咗今晚嘅住嘅旅館-由布院いよとみ。去到已經差唔多7點，其他住客已經食緊飯，我哋匆匆忙忙check in就上房。間房唔算好大，但就好舒服，有個小露台，望出去見到火車路，火車經都會有聲，不過好彩火車班次唔太密，可以接受。

洗個面就落去食晚餐，晚餐係旅館予備。二、三少食兒童餐，份兒童餐份好似幾好味份量都啱啱好。而我哋就食地雞窩，原以為只係得個窩，點知有頭盤沙律魚生冷麵，仲要係好食，簡直喜出望外，反而個地雞窩就普通d，不過就勝在份量好多，食飽就返房休息。

旅館本身有三個溫泉，兩個室內一個露天，全部都係貸切，只要入去鎖埋門就變成自己嘅私人溫泉，而客房裏面就無浴室，想沖涼就要去溫泉沖。我哋食完飯諗住返房嗰陣見到其中一個室內溫泉無人用，所以就改變主先去沖涼兼浸溫泉。雖然只係室內溫泉，但可以食飽飯舒舒服服沖個涼再一家人一齊浸溫泉就好滿足，浸完溫泉想返房時見到露天溫泉居然無人用，所以趁機去埋露天浸。露天溫泉比室仲要正，三儍可以一齊玩水又唔會影響到人，無哋映下相浸多陣就番上房。

番到房時間仲早，我哋睇陣電視，食下水果就瞓覺喇！

（Day 6 完）

三儍再襲九州 day 6 23/7/2015

起身响酒店食咗輕便但好味嘅早餐之後我哋就出發喇，由於今日時間比較鬆動，所以見到d啱行嘅舖頭我哋都停車行下，好似激安之殿堂咁，d嘢古靈精怪乜都有，有啱三儍嘅玩具、啱daddad嘅汽車用品同啱我嘅護膚化妝品，唔覺唔覺就响度用咗個幾鐘，買咗一堆好低嘅汽車用品牌走。

行完街街就正式出發去日南，由都城市去日南海岸大概一個半鐘車程，第一站係去鵜戶神宮，呢個係日本唯一一個洞穴神社，亦係少數可以聽到海浪聽嘅神社，難得三儍去呢d景點都乖乖地唔嗌住走，我哋可以慢慢行下睇下，欣賞下呢個起响崖邊嘅神社，行完我哋食埋雪糕，就出發去酒店喇。

今晚我哋住日南海岸嘅 ANA Holiday Inn Resort，間酒店規模唔細，泊好車已經有職員過嚟幫手搬行李。上一樓check in 之後就上房，我哋今晚住和式房，三儍照例好興奮，而我哋見到間房都好開心，因為間房除咗新同大之外，仲有一個超級無敵大海景，真係想攤响度乜都唔做嘆凍飲望住個海發白日夢，我哋响房度hea咗陣就換衫出去喇。

原本應該要食午餐，不過頭先食嘅雪糕未落格仲飽飽地，加上三儍情願去玩，所以我哋決定先去沙灘玩，再早d食晚餐。沙灘就响酒店出面，d沙好幼好水好清好乾淨，但個海就好大浪，所以我哋都只係玩下沙玩下水，不過三儍玩得好開心，玩到差d唔舍得走。玩到5點左右開始肚餓，我哋就番上房沖涼再去食飯喇。

我哋唔想去得太遠，所以淨係去酒店對面，又係叫網元嘅餐廳食日本料理。可能做遊客生意多，呢間餐廳都有d貴，不過大家都好肚餓，所以都叫咗二份漢堡扒定食、海鮮丼定食、刺生併盤同鐵板豚肉。以為唔多夠食，點知原來每份食物嘅量都好多好大份，海鮮刺生都好生鮮肥美，其他熟食都唔錯，食到好飽好飽我哋就返酒店小休，再出去買嘢。

由於我哋早食飯，所以晚飯之後仲有充裕嘅時間俾我哋去玩。我哋先去附近嘅便利店行下，買咗煙花就去沙灘放煙花。三儍唔係第一次放煙花，但每一次都係又要驚又要玩，但不過都玩得好開心。燒完煙花就返酒店嘅工產店行下買手信，再去浸溫泉。酒店嘅溫泉無溫泉咁正，但都ok，舒舒服服咁浸完就返食雪糕瞓覺啦。

（day 6完）

三儍再襲九州 day 5 22/7/2015

今朝又係一早瞓醒，趁三儍未起身，我就自己一個人去浸溫泉。今次去別館嘅溫泉浸，由本館行過去要行差唔多10分鐘，一路都無人，而且天未光哂仲暗暗哋，其實都有d驚。好彩個溫泉俾咗個驚喜我，比噚日本館嘅大浴場正好多，d水夠熱，而最正嘅係一個人都無，可以自己儘情享受。

雖然個溫泉好正，但都唔可以浸太耐，浸完就換daddad同大少落浸，佢哋嘅評話都係話別館嘅溫泉好好多。浸完溫泉就肚餓啦，叫醒埋二、三少就去食早餐。早餐自助型式，都好豐富，食飽返房執好行李就check out 再出發喇。

下一個目的地係內之浦，一個無乜遊客去嘅地方， 去嗰度係為咗參觀JAXA基地。其實原本plan去都係位於九州嘅種子島，但船程太耐兼太貴，所以退以求其次去內之浦嘅宇宙觀測站參觀。由霧島去內之浦要差唔多要2個鐘，去到已經係食飯時間，所以先去食午餐。我哋今餐食海鮮，揀呢間餐廳係因為網上評分唔差，而且呢度有得食伊勢海老。去到先order 一隻伊勢海老刺身，3仟円一隻真係好低食，原本想叫3份定食，但老闆娘話叫2份一齊share就夠啦，真係好老實。如老闆娘所講，定食份量好多，先嚟好清爽嘅前菜漬物，再嚟好好食嘅我嘅天婦羅同刺身拼盤做主菜，而伊勢海老刺身就勁鮮甜，食到一半老闆娘將個蝦頭同尾拎出去，用嚟煮湯，啖湯甜到不得了。食到飽飽都係7仟幾円理單，真係低到不得了，係呢個trip之中最滿意嘅一餐。

食飽就出發去JAXA基地，由餐廳過去都係7分鐘車程，未上到去就已經見到好大嘅衛星天線，上到去我哋先去咗火箭發射場（其實應該先登記後參觀），嗰度有响度發射過嘅大型火箭模型三儍睇到嘩嘩聲，而對太空最有興趣嘅大少就最興奮，睇完我哋先去翻閘口做翻簡單嘅登記手續，攞翻張permit card放响車頭再去參觀埋其他設施。我哋去咗睇未上山就已經見到嘅衛星天線，圖片就見得多，可以咁近距離睇下就真係好難得；之後再上埋展望台睇風景，去埋小型火箭發射台，最後就去埋宇宙科學資料館，資料館裏面有响內之浦發射過嘅火箭同人造衛星嘅資料，仲有用過嘅火箭推進器同人造衛星嘅部件，雖然三傻一知半解，但都睇得好開心，睇完時候都唔早，係時侯要走喇。

下一站係去都城市，今晚我哋就响都城嘅酒店住。由內之浦去都城要個半鐘車程，去到時侯仲早，所以我哋先响Aeon mall行下，行完先去酒店check in。酒店book 之前睇好似有d舊，點知去到見到先知原來係咁新淨，雖然係商務酒店，但間房一d都唔細，仲好舒服好乾淨。放好行李就予備去食晚餐。

我哋唔想去太遠，所以只係响酒店隔離嘅燒肉店食，以為只係舖仔，原來入到去咁大，我哋點咗個4人set一齊食，d 肉都好肥美好好味，呢餐幾好味，而且都唔貴，埋單時職員問我哋係咪隔離酒店嘅住客，我哋話係，仲主動俾咗9折俾我哋，食到飽飽都係6仟円左右。我哋番酒店買d飲品就番房沖涼休息喇。 

（day 5 完）