三儍襲山陰山陽day 9 5/8/2019

朝早起身我哋就落樓下食早餐，早餐款式雖然唔多，但味道唔錯，而且好多食材都由本地農夫提供，保證新鮮。食完早餐我哋就 check out，去酒店附近嘅四國鐵路文化館，呢間文化館比較細，主要展示四國嘅舊火車同鐵路資料。雖然三儍去過好多唔同嘅鐵路博物館，但依然玩得好開心。因為呢度好細，差唔多一個鐘就玩完去下一站喇。

我哋跟住去附近嘅愛媛科學總合博物館，佢嘅規模無名古屋嘅咁大，但一樣咁好玩，裏面有好多有關科學嘅遊戲，無論大人同小朋友都啱玩，呢度最特別嘅係有一個恐龍同古生物嘅展區，展示左好多恐龍同埋古生物嘅化石，仲有一組活動嘅恐龍模型，鍾意恐龍嘅細佬睇得好開心。雖然呢度唔係太多，但唔覺唔覺都玩左兩個鐘，係時候要出發去下個景點。

我哋原本打算直接去到道後溫泉，不過途經一個幾大嘅公園，所以都上去玩咗一陣，不過個公園比較舊，而且好多小昆蟲，三儍玩咗一陣就叫住要走，而我哋就開始肚餓，所以去道後溫泉前先食個午餐。由於天氣好熱，大家都無乜胃口，所以一至決定去食蕎麥面。我哋去嘅係連鎖蕎麥麵店，一人叫咗一個餐，果然好似網上評語咁，低食夾大件，而且味度好好，冷蕎麥麵好彈牙，食完透心涼。食飽就起程去道後溫泉喇。

我哋今晚住道後溫泉椿館，揸車去到酒店停車場口已經有職員過嚟指示泊車位，泊好車再有職員過嚟幫我哋拎行李去大堂，大堂裝修華麗，仲有個流愛媛柑汁嘅水龍頭可以俾住客自己斟果汁飲，check in 咗我哋就上房。我哋今晚book 嘅係和洋室，間房唔算好大，不過裝修好新好精緻好舒服，仲有一個露台，我哋响房休息一陣就出去行街。

行出酒店就係溫泉街，呢度最出名就係道後溫泉本館，連宮崎俊動畫千與千尋嘅油屋都以道後溫泉本館為藍本，映完相我哋慢慢行去車站，呢度另一個出名景點就係少爺列車，典故來自夏目漱石一本以松山市做舞台嘅小説「少爺」裏面登場嘅列車，雖然無睇過呢本書，但嗰㗎蒸氣小火車好精緻好靚，三儍都主動要求映相。溫泉街仲有好多舖頭好似土產店同手信店行，行完街街我哋就返酒店。

上我哋返酒店就換衫去浸溫泉，不槐為出名嘅溫泉鄉，呢度嘅溫泉好正，浸完成身鬆哂，浸完溫泉上房抖一陣就去餐廳食晚餐。今晚晚餐係自助形式，食物選擇都算多，除咗一般魚生冷熱盤甜品之外，仲有專人即煎和牛同燒壺螺，味道好好，食飽飽我哋就去酒店嘅土產店行咗陣，再去酒店大堂睇表演。

酒店每晚九點就會有太鼓表演，我哋今次都係第一次睇太鼓表演，雖然對太鼓認識唔深，不過表演無冷場好好睇；睇完表演之後鼓手更即場叫d小朋友出去試玩，三儍就梗係有玩埋一份，仲玩得好開心添，玩完我哋就返房休息喇。

（day 9 完）

三儍襲山陰山陽 day 8 4/8/2019

一早起身落樓下食完簡單嘅早餐就check out去攞車。我哋搭市電去到岡山站附近再行過去租車公司。我哋嚟緊7日會租W4 class 嘅MPV，連異地還車都係7萬円，算係好平。搞咗差唔多一個鐘手續之後終於攞到車，我哋就揸住㗎幾新嘅Serena返酒店攞返d行李再出發。

我哋第一站先去JA農協嘅直賣店買生果。岡山不愧為水果王國，呢度d生果又平又靚，連其他農產品好似牛肉同蔬菜都好新鮮。我哋買咗d香印提子同白桃就去下一站啦。

下一站就係岡山中央卸売市場，呢度一樣有水果賣，不過對象就以遊客居多，行咗陣開始有d肚餓，所以決定响呢度食咗午餐先出發。我哋今餐食壽司，等咗半個鐘終於有得入座，大人每人叫咗一個壽司set，小朋友就另外散叫熟嘅壽司，d壽司都幾好食，好新鮮，但呢一餐價錢都唔平，埋單要1萬2仟円。食飽我哋就揸車離開岡山去四國喇。

由岡山揸車去四國嘅車程唔短，不過沿路風景好靚，我哋仲响休息站停車欣賞瀨戶内大橋嘅風景。原本我哋計劃去袓谷溪，但因為車程長咗，兼食飯嗰度嘥咗啲時間，所以決定取消行程轉去後備行程父母濱。

父母濱都係睇日本嘅旅遊書見到，被喻為日本版天空之鏡，一路心思思想去但唔夠時間而放棄，點知原來呢度先係最啱我哋玩，基本上呢度係一個好大嘅沙灘，d水好乾淨好清涼，沙灘好淺水，仲有好多寄居蟹，三儍响呢度玩到唔捨得走。呢度最靚嘅時間係日落，如果無風就可以映到好似天空之鏡咁嘅效果，不過今日有d風，而且我哋要趕住天黑之前去到今晚住嘅酒店，所以無等到日落就走嘞。

我哋今晚住嘅酒店响愛媛縣嘅西条市，响附近超市補給完之後就正式去酒店嘞，酒店叫Extol Inn，算係市內比較大型嘅酒店，我哋今晚住嘅係4人房，間房超大間，仲對住JR站，啱晒我哋嘅鐵路迷，不過陳設就比較老舊，但尚算乾淨企理，三儍响房到走嚟走去，睇咗陣下電視要出去食飯啦。

我哋响酒店附近行咗個圈，最後決定食鐵板燒。呢間餐廳d嘢雖然唔平，但食物水準超高，d嘢好好食，串燒燒得啱啱好，燒雞肉皮脆肉嫩，燒帶子好鮮甜，鐵板厎豬肉好嫩好入味，炒飯炒麵都好好食，食完飯店完仲請三儍食雪糕，氹到三儍好開心。

食飽我哋就返酒店喇，酒店有個大浴場可以浸下浴，我哋浸完浴就返房食下宵夜睇吓電視，之後就休息喇。

（day 8 完）

三儍襲山陰山陽 day 7 3/8/2019

尋晚好好訓，兩張雙人床好大好舒服，一家五口都夠訓。一早瞓醒覺我哋就再去浸多轉溫泉，浸完溫泉就去食早餐啦。

Dormy Inn最出名嘅係豐富早餐。早餐選擇好多，基本嘅腸仔雞蛋火腿麵包已經有唔同i種類，日式早餐好似燒魚惣菜白粥麵豉湯好齊全，就連中式點心都有，味道比香港嘅更加好。魚生刺身亦都有好多種類，好新鮮，最誇張嘅係早餐居然有shabushabu同埋即燒嘅爐端燒，真係超級豐富，味道亦好好，我哋慢慢食慢慢嘆，食咗個幾鐘先返上房換衫出去。

我哋去埋噚日去唔到嘅妖怪神社行咗陣完相就出發去岡山。由鳥取到岡山車程要2個半鐘左右，我哋到咗岡山先去倉敷嘅三井outlet行街，呢個outlet好多嘢行，收獲唔錯。由於早餐太豐富，我哋2點幾先開始覺得肚餓，就去outlet 隔離嘅商場食午餐，d嘢食普普通通無乜驚喜，食完嘢就返岡山市喇。

我哋先揸車去酒店check in 放低行李，今晚我哋住Comfort Hotel，酒店有d舊，而且唔太方便，岡山酒店普遍比較貴，我哋只住一晚，所以平平哋揀呢間，好彩間房算幾大，夠位俾我哋開喼整理行李。

放好行李我哋就去還車，還完車經過JR岡山站好熱鬧，原來今日係桃太朗祭，好多表演團體响度表演，我哋响度湊熱鬧之際，d表演員突然走過嚟拉埋我哋出去跳舞，二儍比較大胆出咗去玩，估唔到又跳得幾好，仲同d哥哥姐姐玩得好開心。

玩到身水身汗係時候坐底食d嘢抖抖，我哋揀咗間連鎖居酒屋食晚餐，d嘢都尚算好食，可惜衛生好差，有好多小小强响度活動，我哋快快手手食完嘢就走。行返去酒店休息喇。

（day 7 完）

三儍襲山陰山陽day 6 2/8/2019

今日我哋全日响米子玩，朝早起身梳洗之後就落樓下餐廳食晚餐，雖然酒店房比較殘舊，但早餐就好豐富，味度亦唔錯，食飽飽我哋拎埋行李就check out喇。

    

我哋跟住就去漁市場行，米子有三個漁市場，我哋去咗其中兩個比較大規模嘅，不過可能因為休漁期，所以好多舖都無開，雖然都有好大嘅土產店行，但就唔係想像中咁多嘢睇，行完一輪差唔多夠鐘食午餐，所以決定响漁市場嘅食當食晏。呢度啲嘢食價錢都算平，我哋三份兒童餐同兩份魚生丼飯，啲魚生好新鮮好好食，三儍嘅兒童餐亦都好快清哂，食完午餐响魚市場行多一陣，見到有夏輝同紅楚蟹賣，雖然啱啱食完飯無耐，但係嚟到呢度無理由唔試呢度嘅特產，所以我哋買咗一份食。紅楚蟹雖然唔係好大隻，不過就好甜，至於生蠔就有啲失落，雖然好鮮甜，但就唔夠肥美，食完嘢我哋就離開漁市場去連接島根縣嘅江島大橋。

   

江島大橋之所以成為景點，係因為一個私家車廣告利用視覺特效將條橋拍到好高好斜，d 車好似好辛苦先上到去咁，我哋揸車經過呢條橋，但事實上一d都唔斜呢。欣賞呢條橋最好地點係島根縣橋頭位置，我哋過橋後就响附近Family Mart 泊低駕車，行出去映相，我哋肉眼睇條橋真係好似好斜咁，不過由於部相機唔夠勁，映出嚟無廣告嘅效果。映完相我哋就去Family Mart 買雪條飲品解渴。

跟住我哋就揸車去今晚住嘅酒店check in。我哋今晚住响米子站附近嘅Dormy Inn Premine 御宿野乃。由於全間酒店都鋪左tatami，所以check-in上房前要除咗對鞋放咗嘅酒店lobby嘅locker。間房雖然係雙人房，但係一d都唔細，俾人嘅感覺好舒服，除咗有兩張一個小客廳之外，仲有好多位走動，唔似一般商務酒店，厠所同浴室係分開嘅；間房最正嘅係窗景，可能以望到山景同內海，好似畫一樣咁靚，我哋响房休息一陣就出去玩啦。

揀呢間酒店另外一個原因係因為呢度好近水木茂大道。呢度係是妖怪世界鬼太郎的故鄉，亦係呢一套漫畫嘅作家水木茂嘅家鄉。我哋一出酒店已經見到好多妖怪銅像，雖然三儍無睇過鬼太朗，但d銅像造型好得意，所以都爭住影相。機本上成條水木茂大道每隔幾步就有大大細細唔同嘅銅像，但因為要慢慢映相，所以800米嘅路要成個鐘先行完。

  

水木茂大道嘅儘頭就係水木茂記念館，呢度展示咗好多鬼太郎嘅資料原稿同水木茂先生嘅事蹟，展館內容好充實，比想像中好睇，慢慢行完睇完都已經差唔多6點，係時候要搵嘢食啦。

沿路行返去酒店大部份食店舖頭都已經閂咗門，行咗一輪先搵到一間家庭式餐廳，雖然餐廳食物選擇唔算多，不過質素水準以上，食飽飽我哋就去酒店附近行多陣，再去超市行下就返酒店。

返到酒店時間尚早，我哋先去浸溫泉，舒舒服服沖乾淨涼浸完溫泉之後差唔多10點，見開始有d餓去酒店餐廳食免費拉麵做消夜，雖然拉麵無餸，不過味道唔錯，食完拉麵我哋上房睇下電視食下零食就休息喇。

（Day 6 完）