bb都旅行-其他注意事項

清潔衛生

沖涼 - 同小朋友，尤其係比較細嘅小朋友去旅行，另一個難題就係安排點同小朋友沖涼，可以有以下安排：

• 年齡較大已經識企嘅可以用花灑淋浴，不過要響屋企試咗小朋友唔驚先

• 未識企既，如果酒店有浴缸嘅可以用浴缸同小朋友沖涼。不過建議先消毒咗個浴缸先好同用，因為執房d人有機會一條步抹完廁所再抹浴缸。可以先用酒精濕紙巾抹下個浴缸或者用個噴霧嘴嘅小樽裝d酒精，去到酒店噴吓個浴缸，酒精揮發咗之後就消毒完畢

• 如果唔介意拎又唔怕煩嘅可以用旅行吹氣浴盆，不過留意吹氣浴盆比較細，只係啱d細bb。另外，可以用小型吹氣水池代替浴盆。

• 如果酒店只得花灑而無浴缸的話，未識企嘅bb都可以用花灑淋浴，都係嗰句，最好先響屋企試過無問題先。方法係：

                1. 其中一個大人先沖好涼，然後由另外一個人幫bb除衫
                2. 沖好涼嘅大人坐響度，除好衫就交bb比沖好涼嘅大人抱住沖涼，另外一個人就從旁協助
                3. bb沖完涼就由協助者拎毛巾同bb抹身，抱走bb出去床上著衫著片

• 某d酒店會可以借用bb浴盆，可以向入住酒店查詢。用之前都係最好先消毒    

• 酒店房通常都會長開冷氣，同小朋友沖涼記得先熄咗冷氣先，以免沖完涼未著得切衫凍親小朋友

一般衛生

• 常備消毒濕紙巾或酒精，以便隨時消毒雙手

航機上

• 飛機升降可能令到小朋友嘅耳仔有d唔舒服，甚至有d痛，解決方法係大d嘅小朋友可以俾粒糖佢食，bb可以食奶／喝水／食奶咀，總之有吸啜吞咽嘅動作就可以

• 尿片通常要自己帶，不真係唔記得拎的話飛機上通常都有少量供應，有需要可以機員求助

• 開奶熱水可以問機員拎（不過我通常都自備）

• 大d既小朋友嫌悶可以厚臉皮d問機員攞fun pack，因為有訂兒童餐就通常連埋fun pack，機員無派可能唔記得。fun pack裏面通常有d填顏色，貼貼紙等小遊戲，可以比小朋友解悶

• 如果打算用自己bb車去到閘口先比職員，就一定要問清一落機響閘口係響行李帶定係響行李帶拎bb車。親身試過無問清楚結果要兩頭滕搵bb車，徙咗唔少時間

安全

• 要小心小朋友玩得開心得濟走失咗，要無時無刻留意小朋友做緊乜

• 安排節目要量力而為，以免樂極生悲

bb都旅行-飲食篇

同小朋友去旅行，最煩就係同佢安排飲食，下面有少少經驗可以同大家分享吓：

年齡較大既小朋友

• 之前講過，如果小朋友夠大，可以唔需要特別預備食物，同大人一齊食嘢，體驗唔同地方食的文化，不過行程安排就要遷就小朋友，去d啱佢哋口味又衛生嘅地方用膳。如果可以的話帶少少乾糧去，萬一d嘢口味唔啱或者小朋友肚餓係上嚟都有d嘢食頂吓肚

• 唔好嫌麻煩嫌重，一定要帶支蒸餾水去溝當地水比小朋友飲，以免水土不服

• 儘量避免食街邊嘢，要小心飲食，小朋友響旅行其間腸胃炎係件好麻煩嘅事

• 如果有早晚飲奶嘅習慣，可以轉飲鮮奶，不過條件係響出發前試過而腸胃又適應

要食奶嘅bb

餵人奶   

• 如果餵人奶就最方便，有媽媽就有奶，不過要留意唔係度度都有育嬰室（至少飛機就無），所以有心理準備要響公眾地方餵奶，帶條餵奶巾去就萬無一失

• 出發前最好打聽下目的地邊度有育嬰室，上forum問人或者去當地大型百貨公司嘅網站睇下有無有關設備都可以

• 如果未試過用餵奶巾或者未試過響公眾地方餵奶就要出發前練習吓，費事到時bb要食奶又一時搵唔到育嬰室會好哩hea

• 媽媽記得要飲多d水同爭取時間休息，確有足夠嘅奶比bb食，如果bb有補開奶的話就要帶埋奶粉奶樽去

餵奶粉

• 除非你可以肯定去到目的地會買到你小朋友食開嘅奶粉，否則一定要帶足夠，甚至多幾餐奶粉去，儘量避免去到先撲奶粉

• 開奶嘅水就如上述所講，帶支蒸餾水去溝當地水再用嚟開奶，一下子用哂當地嘅水會怕小朋友唔適應

• 雖然旅行奶樽同奶粉袋唔平，但係會幫到你拎少同洗少好多嘢，而且又衛生，不妨考慮使用：

    

     

我用開嘅奶粉袋   日本百貨公司有得買

使用方法：

 

1.將需要份量己奶粉入落袋到  

2.除去自動黏貼膠紙，摺好袋口，再用附 開奶時送貼紙貼好奶粉袋，可以響貼紙上寫上奶粉份量

3.撕開貼紙就可以倒d奶粉出嚟

旅行奶樽：

我用開嘅旅行奶樽，已經有個圓型奶咀， 要另外配即棄奶袋使用，響bb用品店有得賣。 如果想用返自己用開嘅奶咀，肥樽就咁拎落去就fit，瘦樽要另加個adapter，如圖：

（註：哩隻旅行奶樽已經無adapter賣，如果用瘦樽就要考慮用另外牌子）

用旅行奶樽嘅好處係奶樽內膽係即棄奶袋，用完抽個內膽出嚟掉，個奶樽基本上無掂過d奶，個奶咀會污糟。下一餐先換番個乾淨奶咀同新內膽就得，換言之出街可以淨係帶一個樽、足夠嘅即棄奶袋同所需餐數嘅咀就得，返到酒店就淨係消毒奶咀同清潔一下個奶樽就ok

要食固體食物嘅bb

• 要食固體食物嘅就要記得帶私家餐具，因為唔係度度都有得借用

• 如果要食米糊可以用更上面提過嘅奶粉袋，將米粉一包包pack好，食先倒出嚟開奶食

• 如果行程時間鬆動嘅可以帶旅行電飯煲去煲粥仔(我自己就試過），可以響出發前預先將d米用攪伴機打碎，去到酒店臨瞓前用水浸住d米第二朝起身就開 始煲，煲一陣就好綿好靚，臨出門口之前放入暖壼，午餐時仲會暖；如果大d要餸的話我會去當地買雞蛋同番茄，因為快熟好味又有營養，材料又易處理，放埋落去 一齊煲就得

• 如果bb唔鐘意食粥，個煲仲可以用嚟煲通粉／字母粉被bb食，通粉我會揀家X牌嗰隻，唔落味粉去煲，好快煲熟。不過要記得湯同粉要分開裝如果唔係食個陣會林哂，好難食

• 如果嫌煲粥麻煩又或者行程緊密唔容許煲粥，可以考慮買baby food俾小朋友食，不過原則係先響出發前先試食，小朋友接受而又無不良反應先好帶去旅行

• 市面有d一包包嘅粥賣，啱d唔肯食baby food但未食到大人嘢，又唔想帶個煲去煲粥嘅小朋友食。響日式超級市場有售

• 另外有做法係加滾水同米入暖壼焗過夜，第二朝會變做粥，不過我未試過唔知係咪真係work，而且會淨係得白粥，無餸俾小朋友

• 如果全日出去玩，我嘅做發係午餐食自己煲嘅粥仔／粉麵，晚餐係食baby food／包裝粥。盡量每餐食唔同嘅嘢，就算全部都食baby food都食d唔同嘅味，等bb有新鮮感，唔駛咁悶

• 有心理預備小朋去旅行會因生理習慣改變又或者太多新奇事物sidetrack，令到bb飲食習慣改變，變得唔肯食你預備好嘅食物，所以要有兩手準備，有食開奶嘅就要預多幾餐奶，如果小朋友唔食固體食物都有奶頂肚；大d嘅飲果汁鮮奶食麵包都ok

• bb 車可以充當height chair，方便比小朋友坐定定餵食

奶樽餐具處理

• 小朋友用過嘅奶樽同食具返到酒店後一定要徹底清潔，所以有關用品如冼潔液、奶樽擦等就要按個人需要而攜帶

• 如果bb仲細，奶樽食具仍然需要消毒就千祈唔好懶，要照樣消毒，可以考慮用消毒葯片浸。用個大嘅密實袋裝，將要消毒嘅物件放入去，再加適當份量嘅水同葯片浸，浸完再過滾水就ok，我去咁多次旅都係用呢個方法消毒奶樽食具

• 如果旅程租住apartment hotel而酒店又有提供微波爐，可以考慮使用微波爐消毒袋消毒

bb都旅行-執行李

好喇，已經book好機票酒店，篇好行程。臨近出發要執行李啦，我之前已經有個post有list哂bb去旅行嘅所需用，係咪照執就得呢？可以答你係，不過如果你跟足個list執你會咒罵我，因為你會發現淨係執小朋友d嘢已經執咗一個大喼。係時候我哋睇下個list，跟據自己同小朋友嘅需要去執行李喇。

• 衣物：

• 唔係list上便所有衫都要執，基本跟返你去嘅地方嘅天氣，不過原則係比你去既日數執多一套衫，萬一整污糟咗都即時有得替換

• 如果去凍嘅地方，禦寒衣物帶多好過帶少，親身經歷試過好狼狽咁周圍搵衫買，又驚凍親小朋友們又驚買唔到衫，好煩 

• 去熱既地方太陽帽唔少得，小朋友d皮膚好嫩，好易曬傷

• 就算去d熱嘅地方，都要帶件外套，當小朋友出入冷氣地方或小睡嗰陣保暖

• 沖涼大毛巾就視乎個人，我自己就唔係好信得過酒店d毛巾，大人都用自己帶嘅，何況自己小朋友

• 床單唔係必須，始終小朋友會著住衫瞓，皮膚直接接觸張床嘅地方唔多

•  紗巾同口水肩就一定要拎，尤其對嗰d成日流口水嘅bb好緊要，因為換口水肩好過要換衫。口水肩可以帶多幾條，紗巾就會帶兩日用嘅份量，夜晚返到酒店洗紗巾好易，洗完第二朝就會乾。大d嘅小朋友就要帶條小面巾洗面用

• 如果小朋友一定要攬公仔瞓的話就一定要帶埋去，如果唔係後果會好嚴重…

個人護理用品 ：

• 沐浴露，body lotion等搽上身嘅千祈唔好貪方便帶未試過嘅試用裝去，萬一小朋友對新嘅lotion／沐浴露敏感都幾麻煩。最方便嘅做法係買個細樽仔裝起足夠份量嘅旅行用

• 尿片自由行的話可以考慮去到當地先買，不過最好帶定2日用量，同埋要知道邊道有得賣

• 平安藥一定要帶，要事先同睇開小朋友嘅醫生拎定。通常唔會用到，但係有需要時就無咗佢唔得

• 旅行吹氣浴盆只係提議，如果小朋友可以沖花灑或者酒店有浴缸的話就唔需要，因為要買的話都唔平，而且最麻煩係充氣                                                                                    
•  其餘物品就要睇下個人需要同去嘅係邊度玩

食用品：

• 如果小朋友夠大，可以唔需要特別預備食品（少量零食除外），同大人一切食嘢，體驗唔同地方食的文化，不過行程安排就要遷就小朋友，去d啱佢哋口味又衛生嘅地方用膳

• 食奶粉既要帶足夠既奶粉比bb，同一般去街一樣，熱水壺，奶樽不可缺少，不過市面有方便去旅行用既旅行奶樽同奶粉袋，可以幫你拎小好多嘢，我講到小朋友旅行其間飲食就會講到

• 有食開固體食物又未開始食大人嘢既就會麻煩d，可以考慮帶baby food，唔嫌煩行程時間又鬆動嘅可以帶旅行電飯煲去煲粥仔。而用開嘅食具都要帶埋去

• 如果有帶食具同奶樽嘅就一定要帶清洗用品，清潔液、奶樽奶嘴刷、消毒用品唔少得

• 為免小朋友水土不服，響出發前買定一支蒸餾水帶去溝當地嘅水嚟飲。一般嘅酒店都會提供電熱水壺，但係我聽過有人用酒店嘅電熱水壺嚟打邊爐，所以我都會自備一個旅行用電熱水壺

• 食物剪刀記得放響寄倉行李度，我試個有一次唔小心放響hand carry，過關時 check 到要掉咗佢先可以上機

其他：

• 帶心愛嘅玩具去有安撫作用，帶新玩具去就可以響小朋友唔耐煩時氹下佢地。不過不宜帶太多太大件，細細件可以袋響自己嘅小背囊就最好

• bb車一定要帶，就算小朋友唔坐都可以放吓hand carry，而當你小朋友需要小睡，bb車就大派用場，真係無咗佢唔得

• 旅行廁所係被要搭長途車嘅小朋友用，響日本水貨店有得賣

其他注意事項：

• 唔好臨上機嗰晚之前先執行李，因為又d物品你以為有，點知執起嘢先發現無就會好麻煩，就算你想買都買唔到，早一兩日執定，有乜嘢要買，又有乜嘢未執用張紙list低，方便自己跟進

• 小朋友既食品-尤其嬰兒奶粉，最好跟身，萬一行李寄失都唔駛臨急臨忙搵奶粉，而且唔係你想搵就搵到，真係咁唔好彩搵唔到要食其他奶粉又驚小朋友腸胃唔適應

• 小朋友要飲奶嘅可以帶壺水上機，唔受手提行李液體限制，詳情請參考：http://www.cad.gov.hk/chinese/faq.html#LAG

• 如果小朋友年紀夠大，不妨買個玩具喼／小型旅行袋比佢，等佢可以參與一齊執行李同管理自己嘅行李，培養佢哋嘅責任心同令佢地更投入呢次旅程

• 個list只係參考，上面無list到嘅嘢要按個人需要添加，例如你打算同小朋友去游水，就要帶埋水泡同紙泳褲。

bb都旅行-安排旅程注意點

打算帶埋小朋友自由行嘅，就一定要做好功課，參考旅遊書，上forum，睇人哋個blog等等都可以揾到好多關於目的地嘅資訊，方面策劃行程，不過響計劃行程有以下幾點要留意：

• 如無必要儘量唔好成日轉酒店，需知道你要帶住小朋友同時又要拎住個喼係幾咁麻煩，而且當你出咗去玩完一日返到酒店同小朋友沖完涼佢哋瞓咗之後你仲要執好行李先有得瞓，嗰刻你就會好後悔

• 千其唔好咁貪心，響一日裏面安排去太多地方，咁會令到大人同小朋友都好攰

• 每一個景點都預留多小小時間，因為小朋友可能玩到唔捨得走，或者需要花時間去照顧小朋友eg：餵食，換片等

• 如果小朋友有小睡習慣，可以安排於小朋友小睡時間進行較適合大人嘅活動，如shopping

• 帶小朋友旅行一定要買保險，視乎你投保範圍，有d旅遊保險仲保埋因病未能出發，萬一小朋友係外地有唔舒服或者受傷要求醫，都唔駛咁擔心醫藥費，有需要仲可以聯絡保險公司要求提供協助

• 可能的話每日都安排一項為小朋友而設嘅活動，真係安排唔到的話抽小小時間響酒店泳池游下水，去playroom玩下甚至同佢行下玩具店都好，如果唔佢哋會好悶

• 如果行程想安排去較高級餐廳用膳，先要打聽嗰間餐廳會唔會招待小朋友，booking時最好同餐廳講清楚，以便作出安排，有心理預備萬一小朋友唔合作扭計，可能要用膳其間提早離開

• 出發前-尤其去d英文唔太通行嘅地方，最好可以將常用語翻譯為當地語言以便溝通，有smart phone 嘅可以download合用嘅翻譯app

• 出發前最好搜集定資料，知道邊度會有bb嘢賣，有需要可以隨時補給，唔駛臨急臨忙先嚟搵 

• 出發前睇吓當地天氣狀況，有需要時要因應天氣而更改行程

   

活動安排：

溫泉:

小朋友都可以浸溫泉（洛洛已經浸過好多次啦），可以同自己小朋友一齊浸溫泉係件好開心嘅事，對小朋友亦都係個好特別嘅體驗

• 要留意唔係度度都歡迎小朋友，要事前問清楚

• 太細嘅小朋友唔適合浸溫泉，尤其係未介片個d，如果你個bb響個溫泉度臭臭相信你都會幾尷尬

• 如果你個 planning係有浸溫泉呢項，可以先響屋企實習比小朋友浸下熱d嘅水，同佢講解下浸溫泉嘅禮儀

• 到正式浸嗰陣最好由大人抱住落水，用手捂住佢心口，一 來可以令佢無咁驚，二來可以check住去心跳會唔會太快

• 一又唔舒服就要即刻起身，為咗小朋友安全着想，千祈唔好勉強

• 第一次浸溫泉唔可以太耐，五分鐘已經好夠，小朋友適應的話下一次可以浸耐d

• 有濕疹同G6PD缺乏症既小朋友，決定去浸溫泉之前最好問咗醫生意見先

水上活動：

小朋友越細適合玩嘅水上活動就越少，一般都係響沙灘浸下水玩下沙曬下太陽。如果大d嘅小朋友要參與水上活動就一定要有大人陪伴，評估小朋友同大人嘅能力先好去玩，一齊以安全行先

bb都旅行-預訂機票酒店或報團注意事項

Confirm好日字，揀咗去邊度玩，係事候要報團或者買package啦，如果要遷就小朋友假期，例如暑假或者大時大節去旅行，預早6個月以上訂一d都唔誇張，早d報名好過臨時臨急報book唔到咁掃興。

自由行預訂機票酒店： 睇啱package同旅行社訂位時，旅行社通常唔會check passport，只會問你各家庭成員嘅英文名串法丶小朋姓別同出生年月日，你要務必小心睇清楚所有資料有無出錯，萬一出咗機票先發現有錯，自己要捭錢同航空公司改資料呢！另外，一定要check清楚passport由出發日計起碼有6個月以上期限，如果唔係有某d國家可能唔俾入境。

機票：一般航空公司會向出發日未足2歲嘅小朋友收取正價機票價錢嘅10%為嬰兒機票價但就唔會提供座位，大人要手抱bb，要bb同大人撘飛機撘得舒舒服服，可以向航空公司訂個baby bassinet，不過個籃有負重限制，而且通常都好搶手，一定要預先訂，詳情可參考番各大航空公司嘅網頁。而大過兩歲嘅小朋友要買小童機票，價錢比成人機票平少少，但有自己一個位，坐得舒舒服服。所有小朋友都可以跟據需要預定兒童餐，亦都係要預早自行聯絡航空公司預定。

酒店：買package時可以因應自己需要幫小朋友選擇加床、佔半房定係淨買機票。其實好多酒店都容許毎間雙人房可以額外多一至兩個小朋友入住而不收取任何費用，有d甚至可以免費提供額外加床同免費早餐俾同行小朋友，如果同行嘅係bb亦都可以要求加bb床，不過呢d額外服務都要視乎每間酒店嘅policy，詳情可以上番將會入住酒店嘅網頁作參考，而我自己習慣響香港book咗酒店之後會用e-mail聯絡酒店，講清楚自己有個幾大嘅小朋友同行，請佢哋作出適當嘅安排。


跟團： 一般報團旅行社都會要求出示passport俾職員檢查，如果無的話要緊記檢查passport由出發日計起碼有6個月以上期限。報團時可以同旅行社職員要求安排bb籃及bb床。

bb都旅行-計劃旅程

強烈建議，尤其係本身小朋友由其他人如工人姐姐湊既weekend daddy mummy，如果你想帶小朋友去旅行，先練習全日自己帶小朋友出去玩，覺得自己攪得掂而小朋友由肯跟你先好帶佢去旅行

目的地選擇

每計劃一個旅程，第一樣要考慮既就係去個地方。同小朋友去旅行，去既地方最緊要係：

1.安全-治安情況良好，局勢穩定

2.衛生情況-一定要良好，如果小朋友去旅行中途染病都幾麻煩同掃興

3.景點適合小朋友-雖然出錢又出力，但同得小朋友去旅行就要有所遷就，一味行街shopping對小朋友無意義，目的地一定要有啱小朋友玩嘅地方

4.機程/景點與景點間車程唔會太遠-縱使你已經帶咗玩具圖書俾小朋友上機或搭車時消磨時間，但好難叫一個小朋友坐定定幾個鐘，況且佢有佢嘅生理需要，例如大小二便，試想象你響狹窄嘅機倉洗手間協助你小朋友去厠所，仲要係唔只一次，諗起都覺得狼狽。當然，小朋友越大佢嘅忍耐力、集中力同自我照顧能力就越强，意味可以去嘅地方就可以越遠

5.天氣穩定-係人都想去玩嗰陣天朗氣清，對帶住小朋友既人尤其重要，試想想當你落住大雨帶小朋友，又要拎遮，又要顧住唔好淋濕小朋友同部新買既相機...一句講哂，煩！除咗揀唔好雨季某d地方外，太凍太熱既地方都唔係幾適合小朋友。不過天氣呢家嘢好睇你好唔彩，到時可能要用行程遷就

6.目的地容易補給嬰幼兒用品，有方便照顧兒童嘅設施配套-除非你去非洲呢d第三世界國家，否則唔難符合呢個條件

以上係我考慮目的地嘅主要條件，觀乎以上條件，首選目的地一定係東南亞，而我心目中最適合帶小朋友去玩既地方就一定係日本，但鑑於舊年日本大地震同福島核電站洩漏幅射後，日本嘅安全情況令人擔心，所以好多人都退而求其次，揀其他國家（雖然我正計劃一家4口暑假去日本），台灣，新加坡，泰國，馬來西亞甚至遠少少嘅澳洲都係唔錯嘅選擇。

旅行日數

第一次帶小朋友去旅行唔適宜去太耐，一般3日至5日已經好足夠，原因:

1.唔知自已可唔可以響無工人姐姐幫手下handle到又湊細路，返到酒店又要處理用過嘅奶樽、污糟衫同行李，如果真係搞唔掂，相信大家情願快d返香港(帶埋 工人去 玩又另作別論）

2.唔知小朋友適唔適應去旅行，一般小朋友已經建立自己嘅生活習慣，突然去咗個新環境，作息時間唔同咗，又見咁多陌生人，瞓嘅又唔係自己張床，對佢哋嚟講其實都頗有壓力，萬一小朋友唔適應的話對佢同大人都幾折磨，都係嗰句，你情願快d返香港

3.第一次帶小朋友出門一定會乜都帶，因為身為阿媽既一定驚死去到無得買，又或者覺得帶多無懷，以備不時之需，但係當你發現淨係小朋友嘅用品就已經佔據你一個喼你就會覺得好頭痕。去既日子短d，你要預備既物品相對地少d，當你去完第一次旅行你就會知道有d乜係你小朋友需要，有d乜係你小朋友無用到。縱使你下一次去玩耐d，你會發現你幫小朋友執既行李會少咗

如果試過第一次成功的話，相信你會上癮，好快再計劃下一次旅程，到時先增加旅行日數都未遲

跟團？自由行？

跟團好處  1.唔駛自己計劃行程，所有膳食，交通住宿有人安排 2. 有導遊領隊照顧，有起事上嚟都有人即時幫到手 3.旅費會平小小	自由行好處 1.自己篇排行程，玩既地方一定啱你同你既小朋友 2.行程可以輕鬆d，唔需要一早起身，好夜先返到酒店，可以就返小朋友既作息時間 3.比較flexible，鐘意既景點可以留耐d，唔鐘意既可以即刻走，可因應小朋友既情況隨意更改行程 4. 就算小朋友扭計都唔怕騷擾到其他團友
跟團壞處 1.行程未必百分百啱玩，可能要被迫帶埋小朋友去行旅行社安排既手信店... 2.行程通常都係早出晚歸，晚晚轉酒店，夜一夜去到酒店第二朝又要一早整理行李食早餐再出發，大人細路休息得未必夠 3.平時返工已經要應酬同事老闆，放假重要應酬d唔識但係又要一齊同住同食既團友；人哋表示友好同你小朋友玩又驚人哋隻手無洗過就掂你個小朋友...	自由行壞處 1.要一手一腳安排全程交通，食宿等等，事前要用好多時間做功課 2.有起任何緊急情況都要自己處理，未必有人幫到你 3.駛費會貴d

                                                        

想帶bb去旅行

你好鐘意去旅行？視旅行為你努力工作既最佳報酬？或者覺得去旅行係平日辛辛苦苦返工既調劑。點都好，一有咗小朋友就唔係以前單身咁，想去就去。

帶埋去又好似做阿4，辛苦過返工；放低小朋友去旅行係就係會輕鬆d，但係始終會心掛掛，而且當你哋玩得好開心之際，諗起自己嘅小朋友響屋企喊住搵daddymummy就會覺得好似有d對佢唔住咁。基於唔捨得放低小朋友自己去玩，我哋就決定帶埋佢去旅行， 去完一次之後，結論就係：能夠一家人一齊去旅行係種福氣，睇住佢玩得好開心既樣，就算辛苦d都係值得既。 所以自從第一次成功既經驗之後，我地就有第二、三、四......次。以下就係我帶小朋友多次去旅行既少少心得。


申請有關證件

去旅行不可缺少既係證件（錢都係！！）， 當你有意同小朋友去旅行，第一樣要做既嘢就係同佢申請證件。由於未有打算同小朋友去大陸旅行，所以無申請回鄉卡既經驗。我只可以響呢度share攞特區護照既資料。

預備文件：

已填好之護照申請書（ID842）
申請兒童之彩色近照一張
父／母／監護之身份證(副本)
費用: 32頁-＄185    48頁-＄230

如年滿11歲→成人身份證(副本)             未滿11歲而持有兒童身份證→兒童身份證(副本)+出示學校手冊有相嗰一頁(副本)

未滿11歲而未持有兒童身份證→香港出世紙+香港永久居民身份證申請書（ROP 3）+額外一張彩色近照


申請方法：

1. 網上申請：只限11歲以上，持有香港永久居民身份證

2. 郵遞：將所需文件郵寄到：香港灣仔告士打道七號
                                                    入境事務大樓四樓
                                                    入境事務處
                                                    旅行證件及國籍（申請）組

3.投遞 : 在辦公時間內，前往任何一間辦理旅行證件申請的入境事務辦事處，將申請放入該處所設的投遞箱內

4.親身遞交 : 可以先用電話／上網預約

取證方法：

除親身遞交外，所有申請人都要由提出申請者陪同取證，並要於取證時出示之前提交資料之正本以供查核。可以上網或者用電話預約取證。.

參考資料：http://www.immd.gov.hk/pdforms/ID%28C%29842An.pdf
                    http://www.gov.hk/tc/residents/immigration/traveldoc/hksarpassport/localapplication.htm

好喇，而家淨係拎咗passport，如果你仲未覺得煩，恭喜你，你可以開始策劃你哋一家人既旅程啦！