三儍襲東京 day 5 30/3/2013

今日我哋就要返香港，所以要爭取時間，由於得半日，為咗慳時間，所以只響池袋活動。一早起身執好哂行李就摷醒3位少爺起身梳洗食早餐，搞掂哂就落lobby book埋去機場嘅巴士再出去行街。第一站係超市，我哋買咗大量零食同好靚嘅士多啤梨做手信，返酒店放低之後再行藥房，買護膚品化妝品同等等；終於夠鐘等到百貨公司開門喇，第一時間行西武，用咗唔夠半個鐘買咗銀包同手袋，仲要平香港幾百蚊，滿足！

由於要撘點幾嘅shuttle出機場，我哋要好趕咁返酒店，極速整理好行理就上車，好彩無留低是旦一件行李或其中一個細路。個幾鐘嘅車程之後終於到咗成田機場，我哋check in咗之後仲有好多時間先上機，所以先食午餐。求其入咗一間食天婦羅嘅餐廳食飯，哈！估唔到有驚喜喎！d嘢唔算貴之餘仲幾好食。食飽飽之後再行街，居然俾我見到某女裝牌子做8折，比響東京買更平，唔駛講緊係即掃啦，happy shopping 之後係時侯上機返香港啦，日本，我哋好快番嚟㗎！

（全文完）

三傻襲東京 day 4 29/3/2013

嗚嗚⋯張SD card 唔見咗，所以day 4 、5嘅遊記得番少量大少部相機影，好有王家衛風格嘅相咋！請見諒！

一早起身食完早餐就出發去今個trip另一重點 – 鐵路博物館。鐵路博物館位於崎玉県，但由池袋出發都好方便，只係半個鐘頭嘅車程就到。去到博物館雖然未夠鐘開門，但已經好好人等陣入場。博物館準時10點鐘開門，我哋買咗入場卷入咗場之後就第一時間跑去拎駕駛小火車嘅予約卷（整理卷），但已經去到下晝兩點半，換言知如果我地想玩揸小火車就要等多4個幾鐘。

響哩幾個鐘我地就參觀下日本唔同型號嘅火車，仲坐咗微縮版嘅小火車，大少二少響playground玩到咁上下我哋多開始有d肚餓，所以就響博物館嘅便當店買咗幾個便當，去咗其中一架陳列嘅火車去吃午餐。

d便當其實都幾好味，不過最唔好就係凍嘅，而且分量偏少，價錢都唔平。食完午餐我哋就繼續參觀，周圍行下睇下，終於到2點，我哋就去揸小火車嘅counter買飛，等咗一陣就有得玩喇。小火車嘅控制好簡單，只係控制開車，車速同停車，但對大少嚟請已經好好玩，至於二少⋯都係做乘客算啦。由於我哋有三張整理卷，所以可以俾大少玩多一次，話咁快就玩完，我哋就去咗博物館嘅精品店買咗d紀念品，之後就離開嘞。

下一站完定係去outlet血併，但因為車程問題，再加上大家都已經好攰所以決定取消。我哋先番酒店休息一陣，再去秋葉原𣿬合埋朋友就去食飯，不過想食嗰間餐廳居然話已經唔入客，唯有去和民食算數。

今晚係最後一晚響東京，食完飯已經好夜，但因為覺得硬係未行夠，所以我哋繼續夜遊池袋，行24小時都開嘅藥房同激安店，買夠就番酒店執行理同休息嘞。（day 4 完）

三儍襲東京 day 3 28/3/2013

一早起身梳洗完就出發，見時間仲早，先到酒店附近嘅超市行個圈，超市係新開，由酒店行過去只係五分鐘路程，雖然無Sunshine City附近嘅西友咁大，但勝在方便同新淨，行完我哋就出發去上野，先嘆個靚早餐，再𣿬合埋朋友就到上野恩賜公園賞櫻。

原本我哋行程無賞櫻呢項，不過今次嚟東京撞正提早開花，而且呢段時間仲係滿開，唔睇櫻花似乎嘥咗，所以決定加插賞櫻。上野公園係熱門賞櫻地點，去到已經人頭湧湧，我哋慢慢行，邊行邊映相，行到咁上就到涉谷食飯。

午餐我哋去渉谷嘅美登利食壽司，一如以住美登利都係咁長龍，排咗半個鐘之前終於有得食嘞。我哋點咗set，包括茶碗蒸，蟹膏沙律，味噌湯同壽司，d嘢好好味，分量亦好多，飽到攬住個肚走。

食飽咗最好就係行街 shopping，今日最大目標就係去買鞋，行咗涉谷幾間大型百貨公司，終於買到心頭好，仲要兩對咁多！行咗一陣見個肚有空位，係時候食甜品。我哋去咗上次嗰間牛奶雪糕專門店食雪糕，不過唔知係咪太多人買整唔切，所以d雪糕無咁滑，仲有d溶溶地。

食完雪糕就繼續行街，由涉谷行去原宿途中有個小公園，裏面有幾棵開得好靚嘅櫻花樹，入去行咗陣再繼續行街，行完裏原宿再行我最鐘意嘅 Laforet，最後只係用咗半個鐘就掃咗唔少靚衫。

行完街街係時候抖抖，我哋搭metro番池袋，先去東武百貨樓下嘅蛋糕店買蛋糕，再返酒店放低d戰利品，休息一陣就出去食晚飯。今晚去磯丸水產食燒海解鮮，雖然唔算好平，不過真係好好味。食完番酒店沖好涼再食埋好好味嘅蛋糕就瞓嘞！

（Day 3）

三儍襲東京 day 2 27/3/2013

今日一早起身，食過輕便嘅早餐就出發去玩，第一站就係位於台場嘅LEGOLAND Discover Center。嗰度其實唔係好大，但對未去過 LEGOLAND 嘅三儍嚟講已經好吸引。一入去就已經有機動遊戲玩，不過因為三儍比較細，所以我哋無玩，就直接入去。裏面其實唔係好大，有用LEGO 砌成嘅東京景點，映相出嚟好靚，三儍都睇得好開心，除此之外仲有遊樂場、砌LEGO嘅地方、3D戲院等，對三儍嚟好好玩好開心。

玩完已經點幾，係時候食lunch，今餐我哋去ぽムの樹食蛋包飯，d蛋包飯真係好好味，蛋皮又嫩又香又多汁，而且價錢又唔貴，食飽就去行街街。

原本plan咗去 Toyota 嘅 Megaweb睇車，不過出面大風大雨又涷，而且 Decks 同附近好多嘢行，所以決定更改行程，行下街算數。我哋行咗台場嘅懷舊商店街，西松屋買咗d bb用品，就撘 Metro嘅臨海線轉JR到東京站行東京駅一番街。

到東京駅一番街最主要係去Miffy shop，不過可惜Miffy d用品啱睇唔啱駛，所以浄係買咗少少糖果就算。反而之後響Tomica shop，收獲都幾豐富，兩位少爺行到唔捨得走。

差唔多夠鐘食飯啦，我哋先返酒店放底d嘢，再𣿬合埋之前響台場分開行街嘅朋友一齊食晚餐，今晚我哋去風風亭食燒肉放題，我哋要咗貴d嘅set (¥3000）另加飲放題，呢餐都叫低食，食到好飽先返酒店。同三隻少爺沖好涼捉哂上床瞓覺，我哋終於可以抖抖，食埋宵夜就休息嘞。

（day2 完）

三儍襲東京 day1 26/3/2013

餓咗2年，我家三少出埋世，終於可以去東京玩啦。出發前好多人都覺得不可思議，因為兩個大人帶住三個細路去旅行似乎好高難度，但我哋實在太想去旅行喇，又想去睇下為食二少不斷食食食嘅樣，所以心口掛個勇字，出發！

我哋一早出發，去到機場check in 咗之後就先食個早餐，再慢慢行過登機閘口預備上機，之前預備咗個玩具喼比俾二少，佢超開心，拉住個喼四圍行，去到邊拉到邊，哈！又估唔到佢咁有責任心，幾時都記得個喼喎！

話咁快就上機，我哋第一項挑戰嚟喇：要同時handle一大一小bb再加一個細路響take off 同 landing 時坐定定唔扭計；四個鐘嘅機程乖乖哋留響自己嘅位度唔搔擾到人。好彩三儍都好合作，全程都無乜扭計，食完就瞓，瞓醒就玩，話咁快就到東京喇。

到埗後因為有bb，所以可以極速地行priority line過海關，拎行李。到咗入境大堂先拎咗張無乜用嘅 free wi-fi card，再用香港予先買定嘅limousine換票証去counter換到池袋，雖然我哋趕到撘3點25分嗰班車，但可惜架車得番2個位，唔夠我一家5口坐，所以迫住坐下一班遲半個鐘嘅車。

都唔知好彩定唔好彩，下一班車好少人坐，我哋可以坐得好舒服，但唔好彩嘅係勁塞車，足足要3個幾鐘先塞到出池袋。我哋嚟緊5日會住池袋 Metropolitan Hotel，亦即係limousin 嘅總站，雖然貴少少但勝在唔駛推住d行李週街行兼且可以加床，我哋check in咗，上房放好行李就會合早一步到東京嘅朋友出去。原先想去行Akachan買dbb用品同尿片呢幾日用，但因為太塞車而失哂予預算，結果只有去咗Sunshine City嘅玩具反斗城買嘢，再去埋附近嘅西友買早餐小食生果返酒店響用。

買完嘢係時候要食嘢，因為大家都好攰，所以只係響應酒店附近嘅和民解決，雖然只係和民，但日本嘅始終好味d，食飽就返酒店，三儍沖完涼就已經瞓哂，我哋響享用完甜品都休息啦！

（Day 1 完）