一早起身梳洗完就落樓下食早餐，早餐雖然係叫免費附送，但絕不失禮，有日式同西式食物自由選擇。食飽整理好行李就出發喇！
由於時間尚早，先去咗豬苗代湖，再去仙台。 由郡山去豬苗代湖只係大半個鐘頭車程， 去豬苗代湖最主要係為咗睇下天鵝。果然， 去到撘遊覽船碼頭已經見到好多雀鳥，不過大部份野鴨， 只有幾隻天鵝，佢哋可能俾人餵慣，所以一d都唔驚人， 相反因為佢哋數目都幾多，望住呢堆雀有恐怖嘅感覺。
洛洛反而係最唔驚嗰個，未落車已經係咁話要餵雀雀， 落咗車仲走去追d鴨添，湖畔原來有間小屋， 可以買d麵包皮餵鴨仔，買咗一包嚟玩，洛洛玩得好開心， 好快就餵完鴨仔，映完相就上車出發去仙台喇！
由福島去仙台大概2個幾鐘，2點幾到達仙台Comfort Hotel，check in 放好行李就响附近松屋食午餐，食完就再响附近行逛， 行經見到有人大排長龍，原來係買鯛魚燒，雖然食飽， 但都排埋一份買咗嚟食，又幾好味喎！
食完行咗陣商店街，用二千幾円買咗對毛毛boot， 再信步行去仙台駅附近嘅Loft。見開始有小小肚餓， 就去仙台駅搵食。仙台駅有好多一檔檔嘅手信店，我哋行咗一陣， 買咗d牛舌小食（幾好味架！）就上去三樓牛舌通食牛舌。
我哋揀咗去依達政宗食，原先想食厚切燒牛舌，可惜已經賣晒， 唯有一人叫咗一份普通嘅燒牛舌套餐，套餐包咗湯同白飯， 先試咗個大蔥牛舌湯，估唔到個湯睇落好似幾清， 但飲落又幾香幾濃味，再食埋個牛舌，嘩！又多汁又有咬口， 但係又唔韌喎，好味！
食飽咗行返酒店買咗Rocey出嘅雪糕返去食，麻麻哋啦， 食完就瞓啦。
(Day2完）
沒有留言:
發佈留言