今日我哋去市郊行下，目的地係太宰府天滿宮。起身食咗簡單嘅早餐就出發，先搭 JR再搭西鐵，大概一個鐘左右就到咗目的地。我哋去天滿宮其實為咗去著和服。之前去咁多次京都因為行程唔許可而且怕悶親幾位少爺所以都無著過，今次得我同三少就可以安排著和服體驗。出發前已經做好功課預約好，準時去到和服出租店對咗資料就可以開始揀和服喇。
福岡嘅和服出租店選擇無京都咁多，但款式就比京都嘅特別，除咗普通嘅花花和服之外，仲有大正風嘅和服同袴可以揀。至於小朋友-尤其男仔選擇少好多，職員只係問咗小三鐘意乜嘢色就揀咗套小朋友和服俾三少。我雖然好想試著袴，但第一次著所以最後都係揀咗一套紫色大正風嘅和服，職員好熟手咁配埋腰帶同配飾，就開始著和服。雖然和服一層又一層，但職員真係好熟手，唔駛15分鐘就著好，用多5分鐘就set理頭，配埋手袋同木屐就可以出去行街街。
由於著住和服木屐好唔方便，而且三少第一次著和服好興奮，一路行一路要映相，所以原本行過去天滿宮嗰10分鐘左右嘅路程我哋用咗半個鐘先行完。天滿宮唔算好大，但風景就幾靚，好襯著和服映相。日本人真係好友善响我哋拎住自拍棍映相之際分別有幾個當地人主動走埋嚟話幫我哋映相。我哋响神社行下咗陣，再响神社出面嘅表參道食咗好出名梅枝餅，行下買下手信就返出租和服店換返衫，搭巴士返博多喇。
返到博多我哋就去車站樓上嘅餐廳食午餐，我哋揀咗食西餐，食咗鐵板牛同鐵板同鐵板魷魚，都係二仟円左右，好味又低食。食飽飽就响博多阪急行咗陣街，再返酒店休息一陣。
抖完我哋就去咗天神行街，天神除咗百貨公司同大大小小嘅商場之外，仲有好多嘢睇好多嘢買嘅嘅天神地下街，地下街嘅盡頭仲有間超市。行完買夠就返酒店放低d嘢，再出去食飯。
由於行咗成日好攰，晚餐就近近地响博多站地下街嘅海鮮居酒屋解決，價錢雖然稍貴但d嘢又新鮮又好食，我哋食咗燒海鮮、魚生茶漬飯同炸蝦。食飽飽再去便利店買雪糕返酒店，食完甜品就休息喇。
（day 2 完）
