雪國漫遊 Day 3 2010-01-11

起身梳洗完，嘆咗個頗豐富嘅早餐，整理好行理就出發嘞，第一站係酒店附近嘅酒店附近嘅海鮮及青果市場，但去到先知無開。 唯有跳去下一個行程，出發去松島。

由仙台去松島大概只係半個鐘車程，好快就到咗。 第一站先松島市場，果然如其他網友所言，松島市場細得可憐， 映下相就走嘞。

見時間差唔多，就去燒蠔小屋排定隊等食飯，燒蠔小屋都幾難搵， 足足兜咗半個鐘先搵到，泊好車登記咗就坐响度等食， 無聊行去燒蠔小屋後面嘅碼頭映下相，之後一路等，等到洛洛瞓着， 足足等咗2個鐘，捽之有得食喇！

大家坐定定就有職員將一大堆好肥美嘅蠔放上鐵板上面燒， 等蠔燒熟期間小屋嘅婆婆好熱心咁教我哋點開嚎食，又同我哋傾計。 d蠔熟咗，食得喇，我哋急不及待 將d熱辣辣嘅蠔放入口，蠔嘅鮮味加埋海水嘅咸味好正， 由於係放題，我哋響60分鐘不停咁食，食到尾段已經好滯， 婆婆仲不斷幫我哋開蠔，又叫我哋＂奸爸爹＂食多d，終於食完喇， 再上埋蠔湯同蠔飯，飽晒！ 大家食完呢餐嘅結論就係響未來一年內唔會再食蠔， 因為今次食得太盡！

食飽有d眼瞓，所以做d靜態d嘅嘢-遊船河。 我哋去到碼頭啱啱有班船就嚟開， 快快手手買飛跑上船坐定就開船喇， 開船無耐小食部就放咗d卡樂b蝦條出嚟賣， 買咗一包諗住同洛洛去餵海鷗，點知佢唔制，唯有自己出去餵， d海鷗知道有得食，一路追住隻船飛，一有人揸住蝦條就啄落嚟， 百發百中！餵咗一陣再叫洛洛出嚟玩，今次佢肯啦，仲餵得幾開心， 餵咗一陣佢話唔喂啦，原來佢話要留番d蝦條自己食， 如事者我哋入番船倉，坐下食下嘢欣賞松島嘅日落美景。

五十分鐘嘅船程好快過去，落咗船信步行去嚴瑞寺，嗰度古木參天， 又另有一番感覺。

沿路行去攞車，見到有鯛魚燒又買嚟食，不過無噚日咁好食， 見時間唔早就開車返酒店。今晚酒店響松島嘅半山， 小巧但好有渡假氣氛嘅酒店，check in 咗上房嘞，間房都幾大，泰式陳設，最緊要係張床又大又舒服。

趁未夠鐘食飯，我哋去浸浸溫泉。大浴場幾乎無人， 等同浸私人溫泉。舒舒服服浸完，時間尚早就去咗遊戲室打乒乓波， 再去咗lobby食免費供應嘅啫喱同咖啡，終於夠鐘食飯啦！

今晚食牛肉海鮮火鍋，有三種底湯底揀，另外仲有蔬菜粉麵放題。 食完再去食個雪糕再上房瞓覺啦。