起身食咗早餐又起行嘞，由於噚晚成晚落雪，要同架車剷雪，洛洛都有幫手架。剷完雪就起程去山形縣啦！
下一站係銀山溫泉，係今晚住宿嘅地方，亦即係今次旅行其中一個重點。由秋田到銀山嘅車程頗遠，途經超市都有落車鬆吓兼買d飲品零食做補給。接近目的地時發現通去銀山嘅路正係＂冬期閉鎖＂中，唯有再睇地圖搵過第二條路行，好彩唔係嘥咗好多時間搵路，我哋2點半左右捽之到達目的地嘞！
泊好車，男仕門付責攞行李，我同姑媽就行先一部去check in。我哋今晚住嘅係有過百年歷史嘅老牌旅館-能登屋。由於停車地方距離旅館頗遠，check in 完職員會用木頭車幫我哋搬行李到旅館，行李到咗就上房嘞。房間向山，古老但唔陳舊，放好行李就出去行嘞。
銀山溫泉街好短，好快行完，但風景好靚，好似張明信片咁，我哋由街頭慢慢行去街尾，再由街尾行番去街頭，邊行邊映相，太陽好快就開始落山，黃昏同點着咗煤氣燈嘅銀山溫泉街又有d唔同，多咗份浪漫 嘅感覺。行完溫泉街再响豆腐店叫咗客豆腐食，嚟咗日本差唔多10日，我覺得我d日文都進步咗，至少今次買豆腐食可以用全日文應對，所以d豆腐都份外好味。
行到攰我哋就番咗上房休息，姑媽姑丈去買埋呢度嘅名物咖哩包番嚟一齊享用。食完嘢我哋一家三口就去浸貸切洞堀風呂。洞堀風呂响旅館接待處側，去到等咗一陣就到我哋，入到去有個小小嘅脫衣處，除咗衫沖身後就開始浸啦。溫泉水都幾熱，洛洛要一陣先適應到，不過都好開心，因爲可以一家三口一齊浸浴。
我哋浸完貸切就八番房休息，輪到姑丈姑媽去浸，再會合一齊食晚餐。晚餐又係會席料理，都幾豐富同好味，食到一半旅館嘅女將仲入嚟同我哋打招乎，仲攞咗d自家腌制嘅泡菜俾我哋品嚐。
食完晚飯再去浸溫泉，唔知係咪臨近男女湯對調嘅時間，所以無人浸，浸咗一陣有工作人員入嚟提醒我哋要換場，我哋就快手快腳著番衫出去等d男仕。點知原來佢哋唔知要換場，一路都未出嚟，大浴場門囗開始聚集一班等住浸溫泉嘅阿婆，我見勢色唔對就硬著頭皮入去叫佢哋快d出嚟。佢哋一出嚟班呀婆即刻入去，唉！真係失禮曬！
返房放低d嘢，姑丈提議出去行吓映相，姑媽就同洛洛响房玩，我哋就出咗去行。夜晚嘅溫泉街無乜人，同日頭嗰陣好唔同，感覺好寧靜舒服，映完相就返房食甜品，再覺覺豬喇！
(Day 9 完)
沒有留言:
發佈留言