無所事事遊曼谷 - Day 4 2009-06-05

瞓醒嘆完早餐就去游水，今次着住兩件頭泳衣落水洛洛無咁凍，但玩到咁上下佢又開始打冷顫，雖然佢玩得好開心，但都要走嘞！

返房冲完涼就出去食飯，今餐又去新大黑食，每人叫咗一個定食，6個人都係食咗4佰蚊左右，食完爺爺話有ｄ攰，我哋送咗佢返酒店休息，之後一家三口就 去 Siam Squar 行街 shopping ，買咗ｄ t-shirt 同超貼身嘅 skinny jeans。行到身水身汗就去咗 S&P 食雪糕，再番酒店休息。

响酒店抖咗陣就出去食飯，由於 book 咗去按摩，所以求其响 Central World 嘅 food hall 食。平就平嘞，不過麻麻地，食完嫲嫲同姑媽凑洛洛返酒店，我哋就去按摩，再返酒店休息。

無所事事遊曼谷 - Day 3 2009-06-04

瞓醒覺去食早餐，慢慢食完再返房瞓陣，11點幾姑媽姑丈同爺爺嬤嬤到埗，响酒店等佢哋check in咗就一齊去食午餐。我哋今餐去水門食海南雞飯，由酒店行去水門話近唔近唔遠又唔遠，不過拖男帶女天氣又熱，去到坐低已經成身汗。除咗雞飯外我哋重叫咗 雞紅，d雞好嫩滑好有雞味，食完一碟唔夠又再叫多一碟，埋單都係一佰蚊左右咋！

食飽行去附近嘅 Super Rich 唱錢，再去隔離嘅 Big c 行咗一陣，爺爺話有ｄ攰，所以就兵分三路，安排爺爺去按腳，嫲嫲同姑媽就凑住洛洛行多陣，我同 c6 姑丈三個就去拜四面佛，拜完返嚟滙合一齊返酒店。

返酒店放低ｄ嘢休息一陣就出發去唐人街食晚飯，我哋去咗之前一路食開嘅 T&K 食飯。無嚟年幾，ｄ嘢差咗好多，每碟餸份量都好少，叫咗好多嘢食完都唔係好飽咁，價錢又唔算平，下次都未必會再嚟食嘞！

唔多夠飽，唔緊要！再去食豬什粿，我就最鐘意佢嘅胡椒湯底。再食埋飯後果 - 榴槤，飽曬！去埋林真香買手信就搭的士返酒店嘞！

無所事事遊曼谷 - Day 2 2009-06-03

起身梳洗後就去食早餐，早餐係自助形式，選擇都幾多，我覺得ｄ粥煲得幾靚，c6就話ｄ中式點心好得，叉燒包仲好味過好多香港酒樓食到嗰ｄ添！食完上 房休息一陣就換泳衣去游水，酒店泳池响26樓，個 view 幾好，但實在太大風，洛洛落水無耐就打曬冷顫，嘴唇都藍咗，要即刻上水同佢保暖，再返房冲熱水凉，好彩無冷親啫！

同洛洛一齊浸完浴又有d肚餓，決定出發搵食。今餐專程去Emporium Greyhound Cafe 試單骨雞翼 ，除咗雞翼外重叫咗海鮮炒意粉、冬陰公湯河同冰茶，c6話個炒意粉雖然辣咗d，但好嘢味，冬陰公湯河就好足料，單骨雞翼就好香口，一啖一隻好快食完，仲叫 多碟食！

食完就响Emporium行咗陣，就轉戰Siam。今日最主要目的係想幫洛洛買套兩件頭泳衣，等佢可以落水玩吓又唔駛凍親，可惜行咗 Siam Center/Discover/Paragon 都搵唔到最後响 World Trade 嘅 ZEN 買到。買完嘢又番咗酒店休息，換衫再出去食晚飯。

今日係我生日，所要食餐豪ｄ嘅。我哋預先訂咗位食意大利菜。由於算係高級餐廳，訂位時講明同行小朋友唔可以嘈住人，好彩洛洛上咗的士已經開始瞓覺。 响無洛洛騷擾下我哋食得好安樂，我哋點咗紅莓汁伴煎鵝肝、意大利菜湯、燒海鮮、gelato 同 咖啡，重開咗支酒飲。埋單要差唔多仟四蚊，算幾貴，不過ｄ嘢好好味，食飽就返歸休息喇！

無所事事遊曼谷 - Day 1 2009-06-02

呢個星期生日，特登攞咗一個星期假抖吓，原先見到有個東京 package 好低好吸引，但撞啱豬感响日本outbreak ，為安全計只好放棄。見曼谷局勢暫時都穩定，又掛住泰國嘅美食，決定就去曼谷過生日。

又係一早出發，去到機場都係5點幾，check in咗就去 Buger King 食早餐，食完就入閘預備登機。由於豬流感嘅關係，予先準備咗口罩俾洛洛用，但結果？咪俾佢除咗囉！由於洛洛已經超過2歲，佢要買小童票，但取而代之係可以 自己坐一個位，大家都可以舒舒服服。起飛無耐洛洛就瞓咗，一覺瞓到落機先醒。

落咗機過咗海關攞咗行李就去的士站搭的士去酒店，由於無乜塞車，10點幾就到酒店。我哋呢幾晚住嘅Centara Grand , 酒店lobby 响23樓，check in後就上房。房間佈置都ok但面積唔算好大，反而浴室就佔咗間房一半面積，浴室中間係一個超大圓形浴—，足夠一家三口一齊浸浴。但酒店清潔就做得麻麻， 居然俾洛洛响地下執到d瓜子殼，個玻璃窗仲有手指拇無抹乾淨，扣分！

整理好行李休息一陣就岀去食lunch，我哋要行番去BTS 站附近嘅 InterContinental  食日本嘢，岀咗酒店行咗差唔多15分鐘先到，雖然有瓦遮頭又一條直路行到去，但天氣太熱沿路又無乜嘢睇，呢15分鍾路程都唔易過。去到新大黑已經好肚餓， 除咗叫咗好低食嘅定牛柳粒同天婦羅定食之外，仲叫咗生牛肉他他、日式汁生蠔、三文魚子壽司同啤酒，ｄ嘢好好味，雖然埋單唔太平(要成1仟9佰幾 baht)，但以食物質數嚟講都 ok 嘅！

食飽就行去 Big C 附近嘅 Super Rich 唱錢，再去 Big C 行咗陣買咗ｄ日用品，正當想返酒店時突然大風大雨，唯有食杯雪糕等雨停，點知食完雪糕雨仲未停，最後决定再返 Big C 買咗兩件雨褸笠住走。好狼狽咁去到 BTS 站，再搭1個站去 Siam 行 Siam Paragron ，買咗ｄ蕃茄同雞肉煲粥俾洛洛食。

買齊嘢返酒店煲粥，休息咗一陣就去咗 Central World 樓上食泰國嘢，都幾好味，食飽就番酒店休息嘞！