雪國漫遊 Day 1 2010-01-09

同上次旅行相隔半年，我哋又出發喇！今次目的地係我想去咗好耐嘅日本東北，早半年前已經開始籌備到今日起行，就好似逐步完成自己嘅夢想，心情好興奮。响屋企食完晚飯就出發去機場，順利 check in 就先去咗 Burger king 食宵夜，再去閘口等上機，由於今晚零晨機，洛洛玩咗一陣都頂唔順瞓着咗，直至上機嗰陣先醒，醒咗又話要睇飛機起飛，又話要食嘢，搞咗一輪先肯瞓返，而我哋食完夜粥都瞓喇！

清晨六點幾到達羽田機場，攞咗行李就去附近買麵包做早餐，再去機場嘅 Toyota Rent a Car Counter 租車，由於機場係禁區，所有攞車還車都要响機場附近嘅支店進行，而 counter 嘅職員幫我哋確認資料後就安排 shuttle bus 送我哋去支店。去到攞咗車滙合埋早一日到嘅姑媽姑丈就開始我哋15日嘅旅程。

由於我哋一家三口實在太攰，上車無耐已經瞓曬，直至我哋㗎車離開咗東京去到驛站先起身去吓厠所鬆吓，跟住又再上車瞓返，中途經過 Aeon Mall 就落車買咗d日用品同飲品食物呢幾日用。

我哋一路沿住東北自動車道北上，沿途風景一路遷， 見到周圍有積雪就知道我哋已經進入東北地區， 下晝2點幾我哋就到達福島縣嘅大內宿，響車度見到已經落緊雪， 大家都好興奮，著好晒禦寒衣物我哋就落車，由於大家都好肚餓， 決定先去食咗晏，再去玩雪映相。

午餐係呢度嘅名物ー大葱蕎麥麵，食麵嘅舖頭好古老， 重有一個個火爐，好有風味，我哋叫咗大葱蕎麥麵、 天婦羅同燒岩魚，d嘢賣相就幾好，但味道就麻麻。食飽就上主菜- 出去玩雪嘞！

大內宿積雪頗厚，但又軟棉棉，洛洛初次見到落雪表現好興奮， 係咁踩d雪，又伸手想捉住d雪，玩得好開心，而大人就不斷映相， 因為大內宿嘅雪景真係幾靚。

雪越落越大，我哋驚洛洛頂唔順決定上車走嘞。由於東北早天黑， 我哋先返郡山酒店，放好行李再去附近嘅Aeon Mall 行一陣同食晚餐，今晚只係普通餐廳食，但又出奇地幾好味， 食完就返酒店嘞！

今晚住郡山Comfort Hotel，一般商務酒店格局，掠嫌枕頭較扁，瞓得麻麻舒服， 但張床都夠大，夠2個大人1個細路瞓，而且勝在有free wifi，好方便，價錢又唔貴，仲包埋早餐。