三儍襲昇龍道 Day 5 21/8/2017

今日都係好早就要起身，食完簡單嘅早餐就要出發喇，目的地係白川鄉。由名古屋揸車過去要兩個鐘多d，由於白川鄉係文化遺產，係個好出名嘅景點，所以連停車場都好有規模，跟指示泊好車之後，行過咗條橋就到咗白川村。白川村出名係佢嘅雪景，但因為三儍要返學，好難就到冬天嚟旅行，所以揀夏天嚟。夏天天嘅白川村另有一番味道，合掌屋周圍都係稻田，綠油油好舒服，襯埋啡色嘅合掌屋，映相出嚟好靚。三儍未見過合掌屋同稻田，好好奇咁周圍行周圍睇，到咁上下我哋就食午餐喇。

今餐我哋食蕎麥麵，去到麵店已經有唔少人等緊，我哋等咗差唔多半個鐘先可以入坐。我哋叫咗每人一份冷麵，d麵不愧為手打，好彈牙，又有蕎麥香，好好味。食完冰涼嘅麵我哋再响村裏面行下映下相，三儍對路邊嘅水溝最有興趣，因為裏有好多好大條好肥美嘅魚遊緊水。我哋慢慢行，慢慢睇，行到三點幾就揸車上展望台睇下風景，映下相就離開啦。

我哋揸咗半個多d就到咗高山市，今晚住嘅係Associa Hotel，唔

近市中心，响半山腰，算係間幾高級同幾有規模嘅酒店，車駛到門口就有bell boy 幫忙開門同拎行理。check in 完我哋就上房，間房好大好舒服，有好多位俾三儍走動，房嘅view仲好正，可以望到高山市中心，參觀完間房之後我哋就落去搭免費嘅shuttle bus 去高山市食晚餐。

嚟到高山市，就一定要食飛弾牛，我哋去咗好出名嘅丸名食燒肉，燒肉店係由精肉店經營嘅，所以品質一定有保證，我哋叫咗一份飛弾牛燒肉蔬菜併盤，一份A5飛弾牛牛扒併盤，煙肉同埋豬腩肉，我哋先食普通嘅牛肉，雖然係比較次一級，但已經好好味。之後再食A5級嘅牛，簡直無得彈，牛味香濃，肉汁鮮甜，牛肉入口溶化，個人感覺飛弾牛比神戶牛更加好食。呢餐可以食到頂級牛肉連埋酒水大概1萬6仟円左右，其實都算低食。食飽咗我哋就去高山站搭 shuttle bus 返酒店。

雖然酒店嘅佈置同裝修都西式，但其實佢有得浸溫泉，個溫泉泉質好ok，而且仲可以望住高山市嘅夜景同星星嚟浸𠻹。浸完溫泉我哋就休息喇。

（day 5 完）

三儍襲昇龍道 Day 4 20/8/2017

今日好早就起身梳洗後就落lobby食早餐。早餐由酒店提供，選擇唔算好多不過都幾好味食完早餐就check out，揸車20分鐘車去鈴鹿市。

我哋今日得一個行程，就係全日响鈴鹿賽道樂園玩。泊好車之後隨住人潮行去入口，去售票處買飛，票價分為淨入場費同入場加任玩票，相差2仟6佰円，但前者每個遊戲都要另外買遊戲卷，唔方便之餘又唔化算，所以最後決定買任玩套票。買咗飛我哋就入場喇。

園裏面分咗唔同嘅園區，我哋先去咗 Putti Town，基本上大部份遊戲唔係揸車就係揸飛機，只不過係唔同種類嘅車，三儍平時都好鐘意車，今日有得俾佢哋自己揸簡直開心到彈起。大部份遊戲都有高度限制，而且好多都要大人陪同先玩得，好彩我哋全部都係買套票，如果唔係都幾麻煩。每個遊戲都有目標，如果達到目標就會得到一張執照做奬勵，我哋揸完警車就揸火車，之後又揸飛機同產剷泥車，玩埋小朋友版嘅格蘭披治賽之後就去 Hello Garden 玩d小朋友d嘅遊戲，玩肚餓就响園內嘅餐廳食晏。

餐廳食物選擇都唔算好多，但價錢都算親民，一份餐都係仟零円，每份餐份量都幾多，算係低食夾大件，食落味道都唔錯，快手食完我哋又去玩啦。

下晝我哋去 Mobi Park 同 Adventure Village 玩d刺激d嘅遊戲，跟住就去 GP Field 睇下3D 電影，坐摩天輪望下鈴鹿賽道，好可惜今日賽道唔開放，如果唔係就可以玩 Circuit Challenger，一嘗响 F1 賽車場揸車嘅滋味。玩到7點左右我哋就離開啦，其實三儍仲未玩哂d遊戲，希望遲d有機會再嚟玩過啦。

我哋揸咗大概一個鐘左右就到咗名古屋，今日我哋會响名古屋嘅名鉄 New Grandb 酒店住一晚，泊好車 check in 咗就上房。間房裝修好新好企理，我哋book 嘅係加床房，除咗2張單人床之外仲有一張單人加床，間房有三張床都仲有位俾三儍走動，都算幾大，我哋放低行李就出去食晚餐喇。

嚟到名古屋，就一定要食好出名嘅幻之手羽先，除咗雞翼外，我哋仲叫咗炸雞、雞軟骨、餃子、炒飯炒麵等，d嘢好好味，尤其d雞翼真係好正，炸到脆卜卜，夠哂味，雖然都幾熱氣，但都忍唔住食咗好多。食飽飽行咗陣便利店就返酒店休息嘞。

（day 4 完）

三儍襲昇龍道 Day 3 19/8/2017

今日我哋會開始自駕遊，向昇龍道進發。一早起身食完輕便嘅早餐就check out，奇存行李之後就搭地鐵去京都站，再行過去Times 租車公司。我哋租嘅係7人車，租7日要5萬8千円左右，網上予約租車之後再send e-mail 同和租車公司聯絡，另外租埋ETC card、7日嘅中日本高速公路pass（CEP）、名古屋高速pass （NEP）同愛知收費道路pass（AIP），一共1萬3千円。辦好手續，俾埋錢check 完車就正式開始我哋自駕旅程 。

我哋先返酒店拎返d行李，再開車向愛知縣方向進法。我哋原本plan 咗今日去三重嘅伊勢神宮同鳥羽，不過揸車落去嘅時間唔短，驚落到去無乜時間行，所以出發前先臨時決定更改行程，去南知多燒嘢食。由京都揸車落去其實要三個鐘，不過今日無乜行程，所以都無乜所謂。燒烤場响海邊，由漁市場附屬經營，泊好車我哋就去收費處book爐，收費段人頭計，大人500円，小童250円，除咗爐之外仲包埋食具同調味料，亦有專人透火，坐好我哋就去付近嘅魚市場買燒嘢食嘅材料。魚市場有好多唔同種類嘅海鮮賣，價錢平又新鮮，我買咗扇貝、蝦、蠔、鮑魚，另外再去燒烤場附設嘅商店買賣肉類腸仔蔬菜同飲品，就開始燒嘢食嘞。其實係三十幾度烈日當空之下燒嘢食簡直係搵命博，但都好值得，因為d嘢真係好好味，食材本身己經好新鮮，經過燒烤之後完全可以發揮佢鮮味，加埋海水嘅喊香同燒烤嘅焦香，好食到不得了。除咗海鮮好正之外，估唔到肉類都咁有水準，尤其d腸仔咬落居然會爆汁，好味。

食到飽飽我哋就揸車離開南知多，去行街。今次唔係去買衫，而係去買汽車用品幫㗎車扮靚，行咗一個鐘左右就走喇，因為要返落去三重龜山市。

我哋响龜山市住係因為預備聴日去鈴鹿跑道樂園。今晚住嘅係 Greens Hotel，雖然係間商務酒店，但就好新淨好企理，間房仲唔細添。放好行李我哋就去食晚餐，由於晏晝嗰餐食得好飽，所以求其响酒店附近食拉麵，不過d嘢都幾唔好食，拉麵湯底勁喊。食完就去附近嘅24小時超市行下，反而超市俾到驚喜我哋，嗰度比想象中大，好多嘢買，我哋買咗水果零食飲品就返酒店，食咗好甜嘅西瓜同提子就休息啦。

（全文完） 

三儍襲昇龍道 Day 2 18/8/2017

因為噚日太攰，所以大家都瞓晏咗，瞓醒就食早餐，早餐係噚日响7-11買嘅炸牛肉三文治，原本以為雪咗一晚會無咁好食，點知牛肉一樣咁juice，同時麵包又無雪到硬哂又無浸到糊咗，好味！

食飽梳洗之後就出發喇。其實京都我哋都嚟咗好多次，但每次逗留時間都唔長，所以都未玩哂，今日我哋就去伏見稻荷大社。我哋行去清水五条站搭京阪本線， 四個站就到咗伏見稻荷站，落車就順住人潮行好快就到，去到天氣嘛嘛，落咗一場大雨，不過好彩嘅係場雨落咗一陣就停。伏見稻荷大社主要用橙紅鮮色做主色，最出名係佢哋嘅千鳥居，所有大大小小嘅鳥居都係由商家或個人捐錢而建，一個個鳥居排成一條又一條隊道，一路依山而建。原本諗住係咁意行下映下相，點知三儍越行越過癮，仲行埋上山，最後行咗一個鐘，身水身汗先肯行返去主殿。落到去見到鳥居造型嘅繪馬，貪得意買咗個嚟祈福，寫完繪馬我哋就行去附近嘅小攤檔食d小食，除咗牛肉串d牛肉好靭之外，蕃薯同蟹柳串都幾好味，食完就搭翻京阪本線去四条，行過去錦市場行街。

去錦市場最大目的係採購食材。海鮮湯料、調味料、茶葉零食等，全部都又平又靚。買完要買嘅嘢之後就去街頭嘅生蠔店嘆下生蠔，食少少嘢稍事休息，生蠔好新鮮好甜，老闆仲好好入送多隻俾我哋食，我哋仲叫咗鯛汁飯，燒蝦等，全部都好好味，食飽抖夠就再行去祇園再食過。

上次嚟京都食過辻利嘅甜品一試難忘，所以今次再食。去到舖頭依舊要排隊，不過人龍唔太長，排咗一陣就可以坐低叫嘢食。我哋叫咗四份甜品，三份係色刨冰另一份係芭菲，全部都好好味，茶味香濃，最正嘅係佢哋嘅每刨冰係由茶雪成冰再整成刨冰，而唔係一般嘅冰上面加糖漿，食完透心涼。

食完刨冰我哋就行去我哋最鐘意嘅鴨川睇下風景，去附近嘅妝藥店行下，再响附近搵地方食食晚餐， 行咗一輪都搵唔到嘢啱食，所以決定返去酒店嘅居酒屋食晚餐。

居酒屋係集團經營嘅，不過食物水準唔錯，串燒炒飯都好好味，飯飽飽就返酒店浸浴休息喇。

（day 2 完）