三儍襲東京東海 day 10 26/8/2016

今日係旅程最後嘅一日，一早起身先去浸多次溫泉，可能好早嘅關係，溫泉無其他人，可以舒舒服服咁浸。浸完食過簡單嘅早餐就要check ouout嘞，呢間酒店真係好舒，lobby 仲佈置得好靚，有機會真係想再住多次。

離開酒店我哋就揸車去茨城嘅JAXA筑波中心，車程半個鐘多d，泊好車先去最大嘅一號展示館，裏面展示咗好多唔同嘅人造衛星嘅實物、火箭模型等等，連ISS嘅1:1模型都有。鐘意太空同宇宙航空嘅大少就最興奮，可以見到好多書上面見過嘅人造衛星，又可以入去佢最鐘意嘅ISS裏面參觀，二、三少雖然唔多知嗰係乜，但見到太空衣同火箭都好開心。參觀完照例去紀念品店買咗少少紀念品就走喇。

我哋跟住就去附近嘅Aeon Mall行街街，响超級市場買水果食物返香港享用。買完嘢係時侯醫肚，我哋午餐就揀咗去和幸食炸豬扒，d嘢食ok，食飽係時候出機場喇。

去到成田機場嘅Toyota還咗車，再由職員送我哋去客運大樓。由於我哋予多咗時間，所以可以响機場行一陣。雖然過海關時有少少意外發生，但總算順利咁上機返香港喇。

(全文完）

三儍襲東京東海 day 9 25/8/2016

今日我哋5點半就起身，換好衫就出門口，去沼津港魚市場睇拍賣，由酒店揸車過去都係10分鐘車程，不過泊好車行得過去魚市場都6點鬆d，大部份海產都拍賣完，淨翻幾組買手响度揀海鮮，不過都睇到佢哋為咗競投盤海鮮又打手勢又叫囂叫，又幾得意。睇完海鮮拍賣我哋就行出去展望台度睇下個水閘，仲意外哋俾我哋見到無雲遮住嘅富士山𠻹。睇完拍賣我哋就返酒店食個豐富嘅早餐，再返上房補瞓一覺。

嚟到沼津市除咗睇海產拍賣，當然要試下佢哋嘅海鮮啦。所以我哋瞓醒之後就check out，再去返沼津港行漁市，行到大家肚餓就搵間餐廳食午餐。我哋叫咗四個set，二有炸櫻花蝦定食、葱吞拿魚碎定食同魚生丼飯。魚生好新鮮，不過佢哋嘅特產櫻花蝦刺生同小魚刺身就唔多啱我哋口味嘞。食完午餐我哋响魚市行多陣就離開喇。

下一站就去御殿場outlet街，去到泊好車之後就開始行街，不過今日好多人， 而且d品牌又唔多啱睇，只係買咗少少嘢，最大收獲係食咗個 H牌限量版嘅紅酒雪糕，面層有銀箔做點綴，又靚又好食。

見無乜收獲，就提離開揸車去今晚酒店嘅所地，諗住可以他他條條行一陣街，再慢慢食晚餐，點知原本唔駛2個鐘嘅車程足足用咗4個幾鐘先到，原因係途經嘅首都高速大塞車，去到千葉縣嘅柏市都已經9點，大家都又肚餓攰，求其去咗間家庭餐廳食過普普通通嘅晚餐就返去酒店。

我哋今晚嘅住嘅酒店係咁多晚最正嘅，除咗新、房夠大又舒服之外，仲有天然溫泉浸，上到房放好行理之後就後就去大浴場沖涼兼浸浴，舒舒服服浸完溫泉就返房休息嘞。

（day 9 完）

三儍襲東京東海 day 8 24/8/2016

 今日好早就起昨咗身，打開窗簾就見到日出同好靚嘅河景。換好衫我哋就去食早餐，早餐比之前嗰幾日豐富，仲有車專人煎蛋同整奄列。食完好好味嘅早餐之後，我哋就出發去農場喇。

農場响位於富士山腳嘅富士宮市，揸車過去大概半個鐘左右就到，泊好車買好飛就入場。一入去已經見到好多綿羊山羊同馬仔呢d小動物，三儍叫住話要餵羊仔，我哋就用100円响自動販賣機買咗飼料嚟俾佢哋餵d小動物，d小動物見到飼料都伸長個頭問我哋攞嘢食，好可愛。食餵完小動物見有人開始排隊試揸牛奶我哋都排埋一份，等咗無耐有職員出嚟講完點樣揸牛奶就排隊開始喇，雖然每人都係揸一下，但係對三儍嚟講都係好和特別嘅體驗。揸完牛奶我哋繼响牧場四圍行下，嗰度地方好大，可以俾三儍通山跑，又有好多唔同種類動物嘅農舍，雖然d動物大部份都用圍欄圍住，但圍欄全部都好矮，所以都好易摸到同餵到佢哋。除此之外仲可以抱下天竺鼠；又可以俾300円拖山羊行街街，雖然隻山羊好為食不時停低食草，又有d失控唔肯聽我哋話自己走咗去，不過都好好玩。玩到過咗午餐時間，大家都好肚餓，所以我哋就離開牧場，去附設嘅 food court 食晏，我哋食咗幾好味嘅薯條 pizza 之後就出發去下一個目的地。

下一個目的地係附近嘅白系之瀧，揸車過去都唔駛十分鐘，泊去車就跟住指示行入去，我哋先見到嘅係音止之瀧，個瀑布好高，沖落嚟d水又好急，三儍未見過瀑布，所以覺得好得意。再沿路行入去就見到白系之瀧，由高望落位於山谷嘅白系之瀧真係好大規模，行近個仲感覺到陣陣清風夾埋瀑布嘅水花，好清涼好舒服，吸夠負離子之後，我哋就沿路再上番停車場離開喇。

由於時間尚早，我就去就近嘅 Aeon Mall 行咗陣街，再番去沼津市。今晚都係去居酒屋食晚餐，本來去咗高級版嘅和民食，點知入到去睇完menu先發現d嘢唔多啱食，求其點咗少少嘢食完就轉塲，去返噚晚嗰間居酒屋食，食完好味嘅晚餐我哋就返酒店休息喇。

（day 8 完）

三儍襲東京東海 day 7 23/8/2016

今日行程緊密，所以好早就起身，梳洗後就去餐廳食早餐，早餐以商務酒店嚟講都算好豐富，食飽就上房整理好行李就check out 出發。

我哋跟住就去航空自衛隊浜松廣報館參觀，由酒店揸車唔駛半個鐘，三儍去到見到放响門口嘅戰機已經勁興奮，泊好車已經急不及待衝入去。參觀廣報館完全免費，亦唔需要予先登記。我哋先响入口處拎咗天幕電影院嘅整理卷，再上去睇咗套有關日本空軍嘅電影之後先正式開始參觀。我哋先行咗資料展示館，嗰度除咗有基地模型，空軍裝備同戰機模型之外，仲有得玩模擬揸戰機升空同降落，睇完玩完就行過去隔離嘅戰機庫，途中仲俾三儍見到有戰機同軍用直升機升降練習，開心到佢哋飛起。入到戰機庫大家都嘩一聲叫出嚟，因為無諗過個戰機庫會咁大，裏面陣列咗好多唔同款嘅新舊戰機、練習機、軍用運輸機等等。除咗有得睇之外，仲可以親手摸下d飛機，有部分戰機更加可以俾參觀者坐入去駕駛艙映下相扮下機師。最正嘅係原來呢度有得免費租借飛行服，只要填簡單資料就可以借衫，每人限時20分鐘，飛行服大人小朋友都有唔同size，我哋幫三儍揀好衫換好就去唔同戰機度映相，三儍換咗飛行服以為自己真係機師，坐上戰機上扮揸飛機，d職員仲好好人咁教佢哋擺pose，果然映出嚟真係好型仔喎。還返套衫之後繼續响戰機庫睇多陣飛機，再行埋未行完嘅資料展示館，睇下最新型嘅戰機同戰機嘅引擎，就依依不捨咁離開喇。

由於响廣報館玩耐咗，出到嚟已經好肚餓，我哋本來想食蕎麥麵，點知去咗三間舖都係定休日，而因為下晝我哋有其他節目，所以唔再嘥時間搵食，沿路見到有間便當屋就入去買嘢食。再响佢附設嘅餐廳食便當。哈，又估唔到幾好食㗎喎，食飽就去下一個目的地喇。

我哋下一個節目係去坐遊覽浜名湖，泊好車買咗船飛等咗陣㗎船就嚟喇，船分上下兩層，下層有冷氣而上層就可以吹住風睇風景。浜名湖風景其實普普通通，但嚟到浜松市又無理由唔去浜名湖，而且之前睇過人哋嘅blog講坐遊覽可以餵海鷗，點知嚟到原來無得餵，有d失望。半個鐘嘅船程好快就完，上岸之後我哋就揸車去沼津市。

經過差唔多2個半鐘嘅車程終於到咗沼津市，我哋先去酒店 check in。雖然我哋今明兩晚會住嗰間酒店已經叫做較為高檔，但可能因為唔係大城市，所以都算幾舊下，好彩尚算整潔。放好行李就係時候去食晚飯，沼津市係個漁港城市，所以入夜後週圍都靜英英，無乜食店開門，所以我哋決定去車站附近搵食。泊好車周圍行下逛下，雖然時間尚早，但只見到有居酒屋仲有開，決定去居酒屋食晚餐。我哋叫咗串燒，炸雞定食同拉麵，諗住食飽就算，點知串燒燒得好好食，燒得焦香但咬落去仲好juicy，炸雞定食同拉麵都好有水準，食到飽飽都係7仟円左右，好味又低食，食完我哋就返酒店休息喇。

（day 7 完）

三儍襲東京東海 day 6 22/8/2016

今日我哋會去清水市。食完豐富嘅早餐我哋就check out 出發。揸車去清水市大概30分鐘車程，由於天氣麻，所以我哋都係慢慢揸，去到清水港都係11點左右，本身市場唔係好大，時間尚早關係裏面好多舖頭都未開，好快就行完，跟住我哋就咗响清水港食午餐，求其去咗一間食堂食魚生丼飯，我哋一共叫咗4碗魚生飯，等口咗一陣就有得食喇，魚生飯賣相好正，但食落就有d失望，唔知係咪打風關係，d海鮮唔太新鮮，海胆仲有d腥臭味。呢餐食咗6仟幾円。

食完飯下一個節目就係去海洋博物館，沿路都靜英英無乜遊客，去到先知原來因颱風關係臨時休館，唯有轉第二個地方玩。清水市係漫畫櫻桃小丸子嘅故鄉，所以揀咗去小丸子博物館。博物館响 S-Pluse Dream Plaza 嘅3樓，入場費大人500円，小童300円俾咗入場費就入去參觀喇。三儍好少睇小丸子，但都好快代入到套卡通裏面，見到小丸子仲好開心咁合照，博物館裏面有好多卡通裏面出現過嘅場境，公園課室甚至小丸子屋企都有，真係幾得意，不過博物館其實都好細，好快就行完。見仲有時間，就俾三儍去隔離嘅遊戲機中心玩咗陣，再行埋手信街先走。

下一站就係濱松市，由清水市揸車過去用咗2個鐘頭左右，見時間尚早，我哋搵咗個商場行街，之後先返店check in。我哋今晚住嘅係 Richmond Hotel，check in 時職員送咗3份小朋友用嘅拖鞋牙刷小玩具俾三儍，而酒店房亦好大好舒服，放低行埋我哋就出去食晚餐。

今晚我哋又係食燒肉放題，由於check in 時已經請front desk職員幫我哋 book 枱，所以去到餐廳等咗陣就有得食。同之前一樣，食物水準唔差，今次主攻上一次食過覺得好食嘅嘢，食到好飽好滿足就返酒店休息。

（Day 6 完）