三儍襲東京東海 day 7 23/8/2016

今日行程緊密，所以好早就起身，梳洗後就去餐廳食早餐，早餐以商務酒店嚟講都算好豐富，食飽就上房整理好行李就check out 出發。

我哋跟住就去航空自衛隊浜松廣報館參觀，由酒店揸車唔駛半個鐘，三儍去到見到放响門口嘅戰機已經勁興奮，泊好車已經急不及待衝入去。參觀廣報館完全免費，亦唔需要予先登記。我哋先响入口處拎咗天幕電影院嘅整理卷，再上去睇咗套有關日本空軍嘅電影之後先正式開始參觀。我哋先行咗資料展示館，嗰度除咗有基地模型，空軍裝備同戰機模型之外，仲有得玩模擬揸戰機升空同降落，睇完玩完就行過去隔離嘅戰機庫，途中仲俾三儍見到有戰機同軍用直升機升降練習，開心到佢哋飛起。入到戰機庫大家都嘩一聲叫出嚟，因為無諗過個戰機庫會咁大，裏面陣列咗好多唔同款嘅新舊戰機、練習機、軍用運輸機等等。除咗有得睇之外，仲可以親手摸下d飛機，有部分戰機更加可以俾參觀者坐入去駕駛艙映下相扮下機師。最正嘅係原來呢度有得免費租借飛行服，只要填簡單資料就可以借衫，每人限時20分鐘，飛行服大人小朋友都有唔同size，我哋幫三儍揀好衫換好就去唔同戰機度映相，三儍換咗飛行服以為自己真係機師，坐上戰機上扮揸飛機，d職員仲好好人咁教佢哋擺pose，果然映出嚟真係好型仔喎。還返套衫之後繼續响戰機庫睇多陣飛機，再行埋未行完嘅資料展示館，睇下最新型嘅戰機同戰機嘅引擎，就依依不捨咁離開喇。

由於响廣報館玩耐咗，出到嚟已經好肚餓，我哋本來想食蕎麥麵，點知去咗三間舖都係定休日，而因為下晝我哋有其他節目，所以唔再嘥時間搵食，沿路見到有間便當屋就入去買嘢食。再响佢附設嘅餐廳食便當。哈，又估唔到幾好食㗎喎，食飽就去下一個目的地喇。

我哋下一個節目係去坐遊覽浜名湖，泊好車買咗船飛等咗陣㗎船就嚟喇，船分上下兩層，下層有冷氣而上層就可以吹住風睇風景。浜名湖風景其實普普通通，但嚟到浜松市又無理由唔去浜名湖，而且之前睇過人哋嘅blog講坐遊覽可以餵海鷗，點知嚟到原來無得餵，有d失望。半個鐘嘅船程好快就完，上岸之後我哋就揸車去沼津市。

經過差唔多2個半鐘嘅車程終於到咗沼津市，我哋先去酒店 check in。雖然我哋今明兩晚會住嗰間酒店已經叫做較為高檔，但可能因為唔係大城市，所以都算幾舊下，好彩尚算整潔。放好行李就係時候去食晚飯，沼津市係個漁港城市，所以入夜後週圍都靜英英，無乜食店開門，所以我哋決定去車站附近搵食。泊好車周圍行下逛下，雖然時間尚早，但只見到有居酒屋仲有開，決定去居酒屋食晚餐。我哋叫咗串燒，炸雞定食同拉麵，諗住食飽就算，點知串燒燒得好好食，燒得焦香但咬落去仲好juicy，炸雞定食同拉麵都好有水準，食到飽飽都係7仟円左右，好味又低食，食完我哋就返酒店休息喇。

（day 7 完）

三儍襲東京東海 day 6 22/8/2016

今日我哋會去清水市。食完豐富嘅早餐我哋就check out 出發。揸車去清水市大概30分鐘車程，由於天氣麻，所以我哋都係慢慢揸，去到清水港都係11點左右，本身市場唔係好大，時間尚早關係裏面好多舖頭都未開，好快就行完，跟住我哋就咗响清水港食午餐，求其去咗一間食堂食魚生丼飯，我哋一共叫咗4碗魚生飯，等口咗一陣就有得食喇，魚生飯賣相好正，但食落就有d失望，唔知係咪打風關係，d海鮮唔太新鮮，海胆仲有d腥臭味。呢餐食咗6仟幾円。

食完飯下一個節目就係去海洋博物館，沿路都靜英英無乜遊客，去到先知原來因颱風關係臨時休館，唯有轉第二個地方玩。清水市係漫畫櫻桃小丸子嘅故鄉，所以揀咗去小丸子博物館。博物館响 S-Pluse Dream Plaza 嘅3樓，入場費大人500円，小童300円俾咗入場費就入去參觀喇。三儍好少睇小丸子，但都好快代入到套卡通裏面，見到小丸子仲好開心咁合照，博物館裏面有好多卡通裏面出現過嘅場境，公園課室甚至小丸子屋企都有，真係幾得意，不過博物館其實都好細，好快就行完。見仲有時間，就俾三儍去隔離嘅遊戲機中心玩咗陣，再行埋手信街先走。

下一站就係濱松市，由清水市揸車過去用咗2個鐘頭左右，見時間尚早，我哋搵咗個商場行街，之後先返店check in。我哋今晚住嘅係 Richmond Hotel，check in 時職員送咗3份小朋友用嘅拖鞋牙刷小玩具俾三儍，而酒店房亦好大好舒服，放低行埋我哋就出去食晚餐。

今晚我哋又係食燒肉放題，由於check in 時已經請front desk職員幫我哋 book 枱，所以去到餐廳等咗陣就有得食。同之前一樣，食物水準唔差，今次主攻上一次食過覺得好食嘅嘢，食到好飽好滿足就返酒店休息。

（Day 6 完）

三儍襲東京東海 day 5 21/8/2016

起身梳洗就去酒店嘅餐廳食早餐，早餐酒店包埋，選擇都幾多，d嘢都幾好食，靜岡專出綠茶，所以早餐都有幾款靜岡出產嘅茶葉可以沖嚟飲。食完早餐就返上房。

原本我哋plan咗今日會去清水市，聽日會去摘蜜瓜，但予計聽日颱風接近天氣會變差，所以將行程改咗，取消摘蜜瓜，今日會去科學館，聽日先去清水市。決定好行程我哋就出去玩喇。靜岡科學館其實同我哋住嘅酒店只係一馬路之隔，行過去唔駛2分鐘，入場費大人510円，小朋友120円，响地下自動售價機買咗門票之後就入場。科學館唔係獨立嘅建築物而係商業大厦裏面佔三層，原本以為好細，但入到去先原來都好大好多嘢玩。靜岡科學館係一間體驗型嘅科學館，會透過一d簡單同有趣嘅遊戲同體驗俾小朋友了解科學原理，換言之一句講哂-有得玩。三儍見到有咁多遊戲好興奮，已經衝咗去玩。d遊戲包括有關磁力、能量、感官等，其中最好玩嘅係一個完全漆黑嘅迷宫，要靠自己嘅觸感摸返出去，係個好刺激好特別體驗。

响科學館玩到肚餓，係時候去食午餐。我哋去咗JR站樓上嘅商場食蛋包飯，餐廳係大集團，响全國都有分店。我哋每人叫咗一set蛋包飯，，雖然已經揀咗細size，但分量都好多，食埋甜品簡直飽到上心口，呢餐唔算平，埋單都要6仟幾円。

食完午餐我哋就去行街，意外地响靜岡站附近有個商場好大好好行，d品牌亦係我哋想睇嗰d，我哋响度消磨咗一個下午，買咗好多嘢，仲响車站嘅Pablo買咗個靜岡限定嘅焙茶芝士批。行到人哋收舖我哋先返酒店，放低d戰利品就出去食晚餐。

我哋去咗車站附近嘅居酒屋食晚餐。靜岡嘅居酒屋有好多有當地特式嘅小食，好似靜岡煮、炸櫻花蝦、吞拿魚餅咁，全部都幾好味，食飽我哋就返酒店食埋頭先買嘅焙茶芝士批做甜品，個批都幾好味，外面係焙茶芝士，裏面除咗有焙茶啫喱之外仲有d糯米丸子，好特別。食到飽飽就沖涼，整理好行理就上床休息喇。

（Day 5 完）

三儍襲東京東海 day 4 20/8/2016

今日我哋會離開東京，開始自駕遊。一早起身整理好行李就check out，將行李奇存响酒店之後就去附近嘅餐廳食早餐，之後再去Toyota攞車。因為颱風迫近嘅關係，今朝早好大雨，好狼狽地去到租車公司，辦好手續check埋車就俾錢，今次我哋租Sienta，本來予咗係舊款，點知租車公司俾咗㗎新款車俾我哋。7日租車連ETC、2個care set同埋唔同還車地點嘅附加費一共5仟円。

我哋揸車返酒店拎埋行李就出發。今日我哋會去位於湘南嘅麒麟廠參觀，我哋原本予算由東京去到麒麟廠附近大概一個鐘左右，點知中途塞車用咗兩個鐘先到，好彩予鬆咗時間，去到仲可以食午餐。見到附近有迴轉壽 就入咗去食，點知中伏，d嘢真係極難食，求其食咗小小嘢就頂唔順埋單。

叫做填咗肚，我哋就出發去麒麟廠，之前已經參觀過麒麟嘅啤酒廠，今次我哋參觀嘅係製造午後紅茶嘅廠，之前我哋已經網上予約好，當我哋泊好就有導遊小姐帶我哋入去，入到去先响d佈景板度影下相，再去會議室坐低，等齊其他參觀者，睇咗個介紹午後紅茶嘅短片就開始參觀嘞。由於導遊小姐知道我哋係外國人，對我哋特別照顧，安排多一位導遊陪住我哋，全程都儘力地用英文同我哋講解。我哋睇咗點樣製造膠樽、煮茶、入樽、套包裝紙，最後到一支支整好嘅茶入箱，過程好得意，當三儍見到生產線上面成千上萬嘅茶排哂隊等套包裝紙時仲'嘩'咗出嚟。除咗睇之外，廠方仲安排咗幾部機器俾我哋親身試下點樣整膠樽，打印到期日同埋套包裝紙。原來一入到工廠，職員同我哋映咗張相係用嚟印落去包裝紙上面，俾我哋套返落去支茶上面，再當紀念品送俾我哋，真係好有心思。唔經唔覺已經參觀完，最後嘅節目就係試飲時間，飲完抖咗陣映下相就走喇。

跟住我哋就揸車去靜岡市， 用咗成2個鐘先到。到埗先去酒店check in攞咗房先，再去食晚餐。由於牛餐食得比較少，大家都好肚餓，所決定食放題。呢間燒肉店响全國都好多分店，之前响京都食過一次覺得好正，所以今次再去食，去到人頭湧湧，職員話要等到9點先有得食，所以我哋就去附近嘅超市行下，買咗零食水果呢幾日食，再返去燒肉店食晚餐。我哋叫咗每人2980円嘅set，可以有100種食物同無酒精飲品揀，食100分鐘。一開始我哋點咗好多款唔同嘅肉類，大部份都好靚好新鮮，食咗一輪肉之後就開始食熟食，d嘢都好好食，最後當然唔少得甜品啦，除咗雪糕之外，最驚喜係個巨峰雪芭，又香又清甜，最啱食完燒肉消滯。

食完飯就揸車返酒店，我哋今晚住嘅酒店係靜鐵Hotel，會响度住兩晚。車位之前已經resever，泊好車拎埋行李就上房。雖然呢問係商務酒店，但間房一d都唔細，我哋book嘅係family room，房裏面有兩張雙人床拍埋一齊，夠哂一家五口瞓，間房空間好足夠，放咗床之外仲有位開喼。我哋沖好涼，食埋頭先買嘅水果就休息喇。

（Day 4 完）

三儍襲東京東海 day 3 19/8/2016

今日我哋會去鐵路博物館。呢個行程其實係額外加插，原本今日plan咗今日去行街，但早兩日搭地鐵見到有poster宣傳呢個博物館，入場費唔貴而且又唔太遠，所以決定加埋落行程度，同三儍玩完先去行街街。

我哋食完簡單嘅早餐之後就出發。我哋先買咗 one day pass，再搭Metro去到葛西站，出咗車站行一分鐘就到，呢度無鐵路博物館咁大，但都比想像大好多。大人入場費210円，小朋友100円，買咗飛我哋就入去。一入到去就見到幾㗎舊嘅地鐵車廂放响度任人參觀，三儍見到嗰幾㗎已經好興奮，不停走嚟走去，映完相玩咗一輪先再行入去，裏面放咗好多唔同嘅模型講解地鐵站嘅構造、縱橫交錯嘅地鐵線路同埋點樣挖掘隊道等等，好得意。除咗模型外，仲有幾個列車嘅控制室可以俾三儍坐上去扮下車掌。除咗睇之外仲有得玩，呢度有幾部控制台可以俾參觀者模擬駕駛，玩法有d似電車go，但就真實好多，因為地鐵行駛畫面係實境，而且係用真嘅control panel嚟控制㗎車，仲有職員在場教點樣控制㗎車，三儍玩得好開心，玩完一次要再排隊玩第二次。玩到大家都開始肚餓，行埋手信店買d小禮物就離開啦。

 

離開鐵路博物館，我哋去車站附近嘅麵店食冷麵同烏冬，諗住都係求其食d嘢填肚，點知d嘢又出奇地好食，連甜品都唔放過。食飽就出發去新宿行街。

新宿乜嘢類型嘅店舖都有，百貨公司、100円店、電器舖、服裝連鎖店甚至戶外用品店都有，總之見到乜就行乜，收獲當然唔錯。行完街原本想去居酒屋食晚餐，不過可能我哋夜咗d，去到已經無位，我哋唯有返去池袋，去酒店附近嘅松屋解決我哋嘅晚餐，食完例牌去便利店買甜品返酒店享用。

（day 3 完）