去北九州其實為咗去日產車廠見學，之前已經上網book定，完全免費，去到車廠附近其實唔係好夠時間食lunch，所以我哋只係响便利店買便當飯團當lunch，食完就去車廠。車廠面積好大，就連接待參觀者都有一幢獨立建築物，裏面有showroom，裝組汽車嘅介紹同小小嘅演講室。之前book 見學已經講明其間唔可以映相，估唔到去到會俾個小locker我哋，要求鎖起電話同相機。我哋我哋乖乖鎖起電話相機之後就開始見學，其間一路有個姐姐帶住，講解有關製造汽車嘅過程，我嘅日文係有限公司，只係明少少，三儍就完全唔知姐姐講乜，不過造車過程都幾得意，三儍都睇得好開心。完咗見學返到頭先嘅showroom，職員已經予備咗飲品俾我哋解渴，仲一人一份小禮物，係一架限定版嘅Tomica，三儍有得玩仲有禮物真係超開心。
下一站就去今晚住嘅地方，位於八女市嘅星野村。去呢個山卡啦地方原因係去睇星星，而且住嘅地方有支全九州最大嘅天文望遠鏡可以俾住客用嚟觀星。經過個幾鐘車程到咗八女市，由於旅館响山卡啦，餐廳好早會收，而且周圍都無乜嘢買，所以我哋先响超市買定宵夜，再食個提早嘅晚餐，先再揸車入村。
車越行得近目的地天氣就越差，仲落埋雨，終於去到旅館，我哋check in 咗職員叔叔就帶我哋入房，間房係family room，間房唔算好大，但就樓底好高，有個閣樓，上面有4個床舖，連埋地下嘅床一共可以瞓6個人，房嘅浴室仲有個大窗，可以邊浸浴邊望星星，不過房裏面連無電視wifi，唯一娛樂就係觀星。
入嚟嗰陣叔叔同我哋講9點去放映廳，睇咗大概半個鐘有關星坐嘅小電影就到戲玉，用天文望遠鏡睇星，叔叔事先講解示範支望遠鏡點運作，點追星，就係嗰陣聽到出面雨聲越嚟越大，連叔叔自己都話好可惜，今日無得用支望遠鏡睇星星，聽佢講解完有關星星嘅資料我哋就返房啦。
由於今日早食飯，所以大家都開始肚餓，好彩早有予備，沖完涼我哋食埋宵夜就瞓覺喇。
（day 3完）
PS. 原來咁啱今日係阿波羅11號太空人登月嘅日子，無論係真好假好，都係一個特別嘅日子
