三日旅程好快就到尾聲，我哋今日返香港，由於下晝6點機，我哋都有時間可以行下街。响酒店食完簡單早餐之後就check out，响酒店儲存行李就出去。
我哋先去酒店附近嘅starburk 飲杯咖啡，食期間限定嘅伯爵茶布甸之後就去天神嘅Aeon 超市買水果食品返香港享用。行完買完就去就近嘅餐廳食午餐，今餐我哋食天婦羅，雖然係連鎖餐廳，但d嘢都幾好食，而且分量都唔少，食飽飽無哋就返博多。
見時間尚早，我哋就去位於博多站 Hakata City天台嘅鉄道神社行下。原本只係諗住俾三少坐下小火車，點知上到去先知有小型祭典，有小遊戲攤位，好熱鬧。三少玩完小火車又玩射擊遊戲同撈波遊戲，撈到嘅波仲可以拎走，三少第一次玩就撈到三個波，連睇擋嘅哥都讚佢叻，氹到佢好開心。玩完一輪再响神社行多一陣就返酒店，拎返行理就出機場喇。
由於多咗好多行李，我哋決定坐的士出機場，博多市離機場好近，十幾分鐘車程就已經到咗機場，車錢都係千零円。我哋 check in 咗過咗海關之後再作最後沖刺，買咗好多零食送禮自用，咗食咗簡單嘅晚餐就上機返香港喇。
