今日一早就起身，食完簡單嘅早餐就出發啦，目的地係崎玉縣嘅首都圈外郭放水路，亦即係好出名地下神殿。呢度其實係巨大地下調壓水槽，為咗防止東京响大雨時水浸而建造，平時唔係成日對外開放，今次撞啱有得參觀又好好彩預約到，機會難逢。我哋由酒店出發到位於地下神殿嘅南櫻井站大概一個鐘左右，去到等咗一陣再搭去龍Q館嘅免費 shuttle bus。到埗先去 counter 核對資料，雖然我哋預約咗5位參觀，但因為三少未夠6歲所以無得參觀，由爹爹陪住，我就同大少二少戴上派發嘅參觀証就跟住職員行過去聖殿入口。果然如職員所言，要行落5層樓百幾級樓梯先正式到達聖殿，職員講解一輪之後就可以自由映相，不過地方太大，為安全起見只可以响指定範圍活動。聖殿裏面係一條條好高嘅柱，配合埋燈光好宏偉壯觀。映完相就由職員點齊人數，就帶我哋返去就龍Q館。
我哋搭返免費 shuttle bus 去返南櫻井站，見有間大超市响附近就行咗陣買咗好新鮮嘅水果就返去大宮站，食咗簡單嘅午餐再轉車返東京。返到東京先去酒店放低d嘢，再落新宿行街。
晚餐我哋返去目白站隔離嘅居酒屋食雞串燒。原本諗住普普通通，點知好有驚喜，d嘢好好味，串燒燒得啱啱好焦香得嚟又保留到肉汁；炸物外脆內嫩；拉麵雜炊好有水準；最正嘅係個雞湯又香又濃，一d味精都無，超好味。食飽飽我哋就返酒店休息喇。
（day 13 完）
