拖咗大半年嘅遊記，終於的起心肝完成埋佢，因為有個新嘅遊記等緊我寫呢。
最後一日響沙巴，基本上無乜行程，因為下畫就飛番香港，所以瞓醒之後都係遊下水，食早餐，上房執好行理就坐 local tour預備嘅van出機場喇。
2012年7月5日星期四
2012年7月4日星期三
Hea 遊沙巴 day 4 4//7/2012
今朝我哋一早醒咗，第一項活動哽係去游水啦，快手梳洗換好泳衣之後就去沙灘玩，到咗8點滑水梯開咗就去咗玩。雖然比起想當年嘅水上樂園規模差好遠，不過過哥哥嚟講已經係新奇、刺激又好玩；而咁好玩嘅無理由唔預細佬，不過佢似乎唔多接受，嗰樣幾驚下。雖然玩到唔捨得走，但都敵不過肚餓，所以我哋都要同泳池講byebye，上房沖涼換衫去食早餐。
早餐餐廳依舊多人同熱，食完豐富早餐後我哋返房煲粥兼休息一陣先出發。我哋先去麗都廣場買d土產，再去埋隆美食好出名嘅東星魚湯米粉同吉仔水。平時唔多好魚嘅我響好飽好飽嘅情況下都食咗一大碗東星米，差d連湯都飲埋，因為實在太鮮甜太好味喇！
食到飽飽我哋再上車出發去神山，去神山嘅車程都幾遠，差唔多一個鐘左右先去到神山嘅山腳，之後再要用多個半鐘先上到神山公園，初時天氣都ok，但我哋架車響山度兜兜轉𨍭期間天氣突然變差，橫風橫雨兼行雷，有諗過放棄返去巿中心，但係㗰咗個幾鐘嚟到半山腰先折又好似好似好唔值咁，所以決定照上山。兜到頭暈終於到咗神山公園，好彩大雨停咗，不過就好涼，我哋落車影下相行下。神山風景幾靚，空氣好清新，不過就唔係幾啱我哋行，我哋嘅裝束同其他full gear嘅遊客好格格不入，所以我哋都係逗留一陣，叫做到此一遊就離開喇。
下一站就係返去市中心，行沙巴最新嘅大型商場1 Borneo。商場係就係大，不過唔多啱睇，我哋主力行土產店同超級市場，買咗d手信就去食飯喇。今晩我哋去番今朝去過嘅麗都廣場嘅food plaza食嘢，嗰度好多嘢食，我哋叫咗肉骨茶（有3款咁多！）、串燒、魷魚炒通菜、燒雞翼、蠔餅、炒河⋯，所有嘢都係即叫即整，份量好足，而且又平又好味，我哋飽到反哂肚就返酒店休息喇。
(day 4完）2012年7月3日星期二
Hea 遊沙巴 day3 3/7/2012
今日起身已經無乜唔舒服，應哥哥要求，起身後我哋就去游水。哥哥好興奮，估唔到細佬見到個水泡都好開心，好似知道有得去玩水咁。酒店嘅泳池唔算好大，但都幾靚，而且好多嘢俾小朋友玩。除咗泳池之外，酒店仲附設一個沙灘，雖然個沙灘係人造，而且都細，但對我哋嚟講都好夠。我哋今朝先去沙灘，今次係細佬第一次響沙灘玩，初初都驚佢會驚，但估唔到佢唔驚不特止，仲玩得好開心。我哋響沙灘玩完就轉咗去泳池游多一陣水，久後就返上房換衫沖身煲落粥再去餐廳食早餐。
早餐好多人，而且冷氣唔多夠，邊食邊出汗，食完豐富早餐返房煲好粥仔兼休息一陣我哋就出發啦！
今日我睇去睇長鼻猴同螢火蟲，之前已經同野生樂園聯絡咗，自己揸車去比連local tour足足平一半，所以我哋揀自己揸車。由酒店去目的地嘅車程都幾耐，我哋12點幾就出發，由於早餐太豐富，我哋都無食午餐，反而先去走咗去附近嘅超級市場買定d水同乾糧後再出發。目的地其實都幾遠，上車無耐大家都瞓哂覺，中途我哋都有停車去下洗手間，順便試吓哩度既榴槤，唔...一般啦，食完去完廁所就上車再出發啦。
去到目的地都係2點多d，比完定時候早咗好多。我地俾咗今日個tour嘅費用就坐低等。個tour包埋tea，由於我哋未吃午餐，所以都食咗d，都係嗰句，一般啦。食完嘢坐吓等吓，終於到3點半，而其他join咗呢個tour嘅遊客都陸續到啦。去都4點，其他人食完tea我哋就上船去睇長鼻猿啦。 隻船一路行，揸船嘅大叔就吹哨引d長鼻猿出嚟。講真，我地真係見到好多猿猴，不過真係長鼻猿嘅就得幾隻，不過就幾得意。
我哋睇完長鼻猿之後就食晚餐，晚餐都係個tour包埋，唔特別好食，食完再上船，今次就去睇螢火蟲。講真，我咁大個女都係第一次睇螢火蟲，d螢火蟲響d樹 上面一閃一閃好似聖誕燈飾咁，好靚；洛洛都睇到好開心，猛話好靚，我地就成機同佢講解有關螢火蟲嘅知識，佢到而家仲記得呢。
我哋嘅tour睇完螢火蟲之後就結束。係時間返酒店，返到酒店沖完涼見有d肚餓，叫咗 room service 食就瞓覺啦。
2012年7月2日星期一
Hea 遊沙巴 day 2 2/7/2012
今朝好早就被d雀仔嘈醒咗，原來我哋間房露台有個雀巢，叫醒哥哥睇完一輪，我哋就去食早餐。早餐響噚晚我哋食buffet嘅餐廳，8點鬆d去到已經好多人，我哋坐好就去攞嘢食，酒店早餐好豐富，有專人煎蛋整奄列煮湯粉同整pancake，仲好細心咁整咗corner 專俾小朋友自己拎嘢食，不過因為馬來西亞係回教國家，所以無豬肉食，連腸仔煙肉都係牛肉或雞肉整，食落有少少怪啫。
諗住煲好粥仔俾細佬，瞓下先再出去玩，點知個肚唔爭氣，d腸抽筋，個肚仲越嚟越痛，為安全計迫住我放棄去玩，響酒店休息，而哥哥就同姑丈姑媽爺爺嫲嫲出去巿中心行街。個肚仔痛，個人又攰，瞓下醒下連午餐都無食好快就太陽落山，原來酒店房可以見到日落，因禍得福可以攤響床上面欣賞沙巴日落美景，而哥哥佢哋都啱啱返到酒店，一齊睇完日落，見個肚無咁痛我哋就出發去食晚飯。
今晚我哋去巿中心嘅雙天食海鮮，餐廳格局似西貢d海鮮酒家，放哂d海鮮出嚟俾d客自己揀，揀好就同職員商量點煮。我哋點咗東風螺、酒煮蜆、老虎蝦、蒸東星魚腩、通菜同燒雞翼。講真，d海鮮好新鮮好靚，但煮法就好局限，唔係清蒸就白烚，好似嘥咗d咁靚嘅食材，所以呢餐感覺都係普普通通。食飽我哋就返酒店休息啦。
(day 2完）
訂閱：
文章 (Atom)