三儍襲山陰山陽day 12 8/8/2019

我哋今日會去玩刺激嘅嘢。一早起身落樓下食早餐，呢度嘅早餐雖然選擇唔算好多，但都有魚生食，其他嘢食味道重唔重錯。食完豐富早餐我哋就出發喇。

我哋今日會去玩森林冒險，呢間本身係返法國公司，响日本好多地方都有森林冒險遊樂設施，廣島呢一個未算最大，不過志在比三儍試吓，我哋之前已經上網預約左Canopy Course，大小同價每人2800円。 由於森林冒險設施通常係深山，我哋8點鐘就出發，差唔多兩個鐘頭車程先到目的地。登記左俾咗錢之後食完就幫我哋穿好安全帶，跟住就有教練先教咗我哋有關基本嘅安全知識，有一個好矮嘅練習佢區俾我哋試吓爬下操作下條安全帶，跟住就正式開始玩啦。成個course 有三條路線，難度逐一升級；雖然呢個係小朋友玩嘅course，但一d都唔易玩，要响二、三樓高靠鋼索木橋同繩網响樹之間爬嚟爬去，初初玩三儍都有d驚，但玩玩下就習慣咗，仲玩得好開心，大概兩個鐘左右就玩完成個course，雖然有啲攰，不過真係好好玩，下次嚟日本我哋都會再安排玩森林冒險。

雖然份早餐好豐富，但體力勞動完大家都已經好肚餓，所以就出發去食午餐。我哋揸咗個半鐘頭車就到咗三次市嘅酒莊，呢度除咗有酒賣之外，仲有燒肉食，而且網上評分唔錯。我哋叫咗三個唔同嘅set，前菜沙律同甜品可以去自助吧枱攞。呢度嘅肉同海鮮都好新鮮好靚，分量亦都唔少，d嘢好食之餘餐廳環境仲好好舒舒服服食完飯之後我哋就响酒莊行下。

三次市盛產提子，所以呢度出嘅酒都有翻上下，响日本國內攞過唔少獎。酒莊咗有唔同款嘅紅白酒之外，仲有提子汁可以試飲，雖然酒同提子汁買返香港又重又論進，但試過之後覺很值得抬返香港；除咗果汁同酒之外，呢度仲有好多用紅白酒造成嘅糕點糖果賣，最後我哋都滿載而歸。

食飽買飽我哋繼續去玩。我哋下一站就去半個鐘頭車程嘅世羅高原，之前做資料搜集嗰陣已經知道有向日葵節所以特登安排嚟呢度玩。成個山頭都係唔同品種向日葵，襯埋藍天白雲映相出嚟好靚，除咗睇風景影相之外，呢度有一個好大嘅向日葵迷宮可以俾三儍玩，仲可以比100円就可以自己剪一次支太陽花走。我哋玩到五點左右就走，揸車返廣島市。

我哋返酒店泊低架車放低啲嘢抖陣就預備出去食晚餐。今晚我哋去海鮮居酒屋食，我哋叫咗燒海鮮併盤、炒飯、炸蝦、炸雞炸薯條等，埋單雖然唔平，不過d嘢都好好食，食飽我哋就返酒店休息喇。 

（day 12 完）

三儍襲山陰山陽day 11 7/8/2019

朝頭早起身响酒店食完簡單早餐就check out，出發去宮島。我哋去都渡輪碼頭泊好車就搭渡輪過去宮島，渡輪公司有兩間，兩間價錢都一樣，我哋揀咗搭宮島松大汽船，隻船有冷氣有包廂，好舒服坐咗20分鐘船就到宫島嘞。

一落船已經有好多鹿仔迎接我哋，同奈良嗰啲唔同，呢度嘅鹿冇俾遊客餵慣，性格好溫馴映相摸摸都唔發脾氣，好可愛。同鹿仔映完相我哋就沿住表參道行去嚴島神社。表參道好多食店同手信店，好多嘢睇，需然條路唔長，但我哋行咗半個先到神社入口。

嚴島神社有一千四百年歴史，係世界文化遺產，呢度最出名嘅水鳥居更加係日本三景其中一景，不過可惜由6月起水鳥居進行大維修，我哋而家見到嘅鳥居搭咗棚，如果有機會希望可以再嚟睇下鳥居嘅真面目。雖然鳥居維修緊，但嚴島神都好值得嚟行下，神社少有地起响海上面，藍天白雲襯埋紅色嘅建築物，影相出嚟好靚，我哋影下相買繪馬祈福行多陣就走啦。

離開神社我哋預備去午餐，不過行經過射擊遊戲嘅攤檔，三儍好想玩所以俾佢哋玩咗一舖，雖然贏唔到乜嘢大獎，不過都玩得好開心。玩完我哋就去表參道嘅食堂食lunch，我哋叫咗蠔麵同蠔丼飯，三儍唔好蠔，所以叫咗牛肉烏冬同蕎麥面，呢度d蠔真係好鮮甜好肥美，飯同麵都滲埋蠔汁，好好食。食完飯行去碼頭期間見到有即燒竹輪，忍唔住再買咗食，食到飽飽我哋就搭船走喇。

見時間尚早，我哋再去多個景點。我哋揸車離開廣島去隔離嘅山口縣，大概半個鐘頭車程就到咗目的地錦帶橋。呢條全木造嘅橋由五條拱橋連接而成，被譽為日本三大橋之一。我哋泊好車就行過去同條橋影相，橋下面條河河水好淺，有好多小朋友响河面玩水，三傻見人哋玩水又想玩埋一份，所以我哋都好似當地人咁除咗對鞋行上石灘度玩水，呢度啲水好清好乾淨又冰涼，響度浸下腳欣賞下風景真係好寫意。玩完水之後我哋就上橋行下，就咁睇條片好似唔係咁難行，但親身行上去就覺得d拱橋斜度都幾大，雖然行呢條橋都幾辛苦，不過呢條咁特別嘅橋係值得過嚟行下。

玩到太陽開始下山我哋就揸車返講廣島市。我哋先返酒店check-in，我哋今晚住嘅係廣島Vessel Inn，去到酒店諗住泊車，點知職員同我地講酒店嘅車係要預約，有契約停車場，但因為附近有棒球賽嘅關係，契約停車場都爆滿，換言之要自己搵停車場，我哋喺附近兜左一大輪先搵到停車場，雖然價錢貴好多但總算可以安置架車，拍好車就check in上房，我哋今晚住咗嘅係三人房，但係似乎都係一間雙人房梗硬加多張床，間房好細好迫，開喼都要喺床上面開，住咁多次Vessel集團嘅酒店今次嘅經驗最差。安置好行李之後我哋就去食飯。我哋去車站附近食嘢，行咗一陣決定去勝午炸牛扒，d嘢都OK好食，食完就返酒店休息啦。

（day 11 完）

三儍襲山陰山陽 day 10 6/8/2019

今朝好早就起咗身，我哋先去浸溫泉，可能太早嘅關係，溫泉一個人都無，可以舒舒服服包場浸。浸完溫泉我哋就去食早餐，早餐响噚晚晚餐嘅餐廳，種類都幾多，食完豐富早餐我哋就返房休息一陣，跟住就check out嘞，呢度住得好舒服，如果有機會會再嚟住。

我哋check out 後就揸車離開四國，向廣島方向出發。今日天氣麻麻，一路天陰陰，起程無耐仲開始落雨，我哋去到休息站映完來海島海峽大橋之後就繼續揸車去到大三島。呢度係好出名嘅瀨戶內海峽，嚟到呢度梗要食海鮮丼飯。雖然我哋未夠12點已經嚟到食堂，但已經大排長龍，要等咗半個鐘以上先有得入坐，不過等咁耐其實都值嘅，呢度嘅丼飯材料好新鮮，海胆無狎味，碗碗都好足料，最重要嘅係價錢超平，一碗海胆飯都係一仟円左右，其餘都係幾佰円一碗，好低食。

食飽飯我哋就去伯方之鹽嘅工場參觀，參觀呢度walk in就得，去到reception登記咗拎咗一份呢度生產嘅鹽做紀念品之後就可以自由參觀。喺呢度可以睇到提煉、生產同包裝唔同款嘅鹽，可以睇到曬鹽嘅棚田，睇完造鹽嘅過程仲可以食到鹽味嘅雪糕，好好味，我哋食完雪糕買咗d用呢度嘅鹽整嘅就榚點做手信之後就起程啦。

經過差唔多兩個鐘頭車程，我哋嚟到旅程最後一站，廣島。我哋會喺廣島玩多五日先返香港。我哋首先佢今晚住嘅酒店check-in。我哋今晚住嘅酒店係响和平紀念公園附近嘅Comfort Hotel。酒店房好新好大，開咗喼仲有好多位可以行。我哋放好行李休息一陣就出去啦。

今日係8月6號，亦即係廣島原爆記念日，廣島市為咗記念呢日特別安排咗唔同嘅活動，包括延長和平紀念資料館嘅開放時間同埋放水燈嘅環節。我哋先去和平紀念資料館參觀，呢度有好多有關當年原爆嘅資料睇，除咗文獻，仲有當年被害者嘅相片、遺物、證言等等，好震撼，好值得參觀。三儍對歴史一知半解，我哋唯有一邊睇一邊解釋比佢哋聽，行到夠鐘閂門我哋都未睇完，希望下次有機會嚟可以慢慢再睇過。

睇完展覽出嚟已經見到河邊有好多人放水燈，我哋行咗一輪先搵到買水燈嘅檔口，用6百円買咗水燈之後就由三儍寫低願望同心聲，跟住就放落河。好多寫住希望世界和平嘅水燈沿住河一路漂，希望我哋嘅祈求會實現啦。

放完水燈我哋就沿路行返酒店，今晚我哋响酒店附近嘅居酒屋食晚餐。d嘢都幾好食，不過啤酒唔夠涷，食完飯去附近便利店買甜品返酒店，食完甜品就休息喇。

（day 10 完）

三儍襲山陰山陽day 9 5/8/2019

朝早起身我哋就落樓下食早餐，早餐款式雖然唔多，但味道唔錯，而且好多食材都由本地農夫提供，保證新鮮。食完早餐我哋就 check out，去酒店附近嘅四國鐵路文化館，呢間文化館比較細，主要展示四國嘅舊火車同鐵路資料。雖然三儍去過好多唔同嘅鐵路博物館，但依然玩得好開心。因為呢度好細，差唔多一個鐘就玩完去下一站喇。

我哋跟住去附近嘅愛媛科學總合博物館，佢嘅規模無名古屋嘅咁大，但一樣咁好玩，裏面有好多有關科學嘅遊戲，無論大人同小朋友都啱玩，呢度最特別嘅係有一個恐龍同古生物嘅展區，展示左好多恐龍同埋古生物嘅化石，仲有一組活動嘅恐龍模型，鍾意恐龍嘅細佬睇得好開心。雖然呢度唔係太多，但唔覺唔覺都玩左兩個鐘，係時候要出發去下個景點。

我哋原本打算直接去到道後溫泉，不過途經一個幾大嘅公園，所以都上去玩咗一陣，不過個公園比較舊，而且好多小昆蟲，三儍玩咗一陣就叫住要走，而我哋就開始肚餓，所以去道後溫泉前先食個午餐。由於天氣好熱，大家都無乜胃口，所以一至決定去食蕎麥面。我哋去嘅係連鎖蕎麥麵店，一人叫咗一個餐，果然好似網上評語咁，低食夾大件，而且味度好好，冷蕎麥麵好彈牙，食完透心涼。食飽就起程去道後溫泉喇。

我哋今晚住道後溫泉椿館，揸車去到酒店停車場口已經有職員過嚟指示泊車位，泊好車再有職員過嚟幫我哋拎行李去大堂，大堂裝修華麗，仲有個流愛媛柑汁嘅水龍頭可以俾住客自己斟果汁飲，check in 咗我哋就上房。我哋今晚book 嘅係和洋室，間房唔算好大，不過裝修好新好精緻好舒服，仲有一個露台，我哋响房休息一陣就出去行街。

行出酒店就係溫泉街，呢度最出名就係道後溫泉本館，連宮崎俊動畫千與千尋嘅油屋都以道後溫泉本館為藍本，映完相我哋慢慢行去車站，呢度另一個出名景點就係少爺列車，典故來自夏目漱石一本以松山市做舞台嘅小説「少爺」裏面登場嘅列車，雖然無睇過呢本書，但嗰㗎蒸氣小火車好精緻好靚，三儍都主動要求映相。溫泉街仲有好多舖頭好似土產店同手信店行，行完街街我哋就返酒店。

上我哋返酒店就換衫去浸溫泉，不槐為出名嘅溫泉鄉，呢度嘅溫泉好正，浸完成身鬆哂，浸完溫泉上房抖一陣就去餐廳食晚餐。今晚晚餐係自助形式，食物選擇都算多，除咗一般魚生冷熱盤甜品之外，仲有專人即煎和牛同燒壺螺，味道好好，食飽飽我哋就去酒店嘅土產店行咗陣，再去酒店大堂睇表演。

酒店每晚九點就會有太鼓表演，我哋今次都係第一次睇太鼓表演，雖然對太鼓認識唔深，不過表演無冷場好好睇；睇完表演之後鼓手更即場叫d小朋友出去試玩，三儍就梗係有玩埋一份，仲玩得好開心添，玩完我哋就返房休息喇。

（day 9 完）