三儍襲東京東海 day 2 18/8/2016

由於噚日大家都好勞累，所以今朝決定好奢侈咁瞓到自然醒。起身食些過簡單嘅早餐，就出發去新宿。

我哋嘅目的地係消防博物館，搭Metro去到四谷三丁目站就直接去到博物館。去到先拎咗入館証就可以入去參觀。三儍一入已經勁興奮，因為見到好多架古董消防車同救護車，應三儍要求不停幫佢哋同d消防車合照，擾嚷一輪先可以再上樓上。博物館有10層，除咗有3層係屬於office同消防局之外，其餘7層都有唔同嘅嘢睇同玩。我哋先去咗做手工，整救護車模型，再去睇下日本以前同而家嘅消防裝備，而最好玩嘅係有得著下消防員嘅制服，上消防車同消防直升機映下相。玩咗差唔多3個鐘，買埋少少紀念品就離開去食午餐啦。

午餐我哋去食炸牛扒，呢間炸牛扒响涉谷，係間長龍餐廳，去之前已經有哂心理預備要等位，但諗住落雨濕濕應該會少d人排隊，點知一排就差唔多2個鐘，其間雨勢時大時細，我哋又帶住3個細路都幾狼狽，好彩三儍尚算合作，除咗問得未呀好肚餓呀之外都無乜點扭計。由於間餐廳真係好細，就算排到我哋都唔可以一齊食，要分兩批入去食。我哋每人叫咗一份炸牛排定食，份定食好快就送上，牛扒炸得好嫩，但牛味其實唔係好重，都叫幾好食，但值唔值排兩個鐘嚟食就見仁見智。由於太肚餓嘅關係，用咗10分鐘左右就食完呢餐，埋單7千円左右，跟住就去行街。

我哋搭Metro去到原宿。頭先三儍等位等到好攰，為咗俾佢哋抖下又有多d時間俾我掃貨，所以由爹爹帶佢哋搵間餐廳坐低食下甜品，我就自己行街街。

行完街去餐廳會合之後就返酒店放低d戰利品兼稍事休息，再去酒店附近嘅居酒屋食晚餐，呢餐其實唔平，都要8千幾円，但d嘢就普普通通無乜特別，食完就去便利店買雪條雪糕做甜品，雪條反而好驚喜，好好味，食完就休息喇。

(Day 2 完)

三儍襲東京東海 day 1 17/8/2016

今個暑假我哋又係去日本，主要嘅目的地係東京同靜岡。上機之前日本已經打緊風，去10日期間再遇到2個颱風，不過好好彩天氣都唔太差，最後幾日仲好好太陽𠻹。

今次我哋撘 HK Express 嘅零晨機去東京嘅羽田，由於颱風關係，班機delay咗差唔多3個鐘，到埗過海關拎埋行理都已經7點幾。因為我哋唔趕時間，又想舒舒服服抖下，所以揀咗搭limousine出市區。頭3日我哋會住响池袋，放低行理响酒店就出去食早餐行街街。

由於我哋已經好肚餓，所以揀咗去松屋食個早飯，食飽啱啱好10點，d舖頭開舖可以行街，我哋行完Tokyu Hand 同 Uniqlo，再行埋西武，不過無乜嘢買到。行到差唔多2點，見開始攰兼有d肚餓，就上西武樓上嘅美登利食迴轉壽司。

之前都知呢間係長龍餐廳，但估唔到過咗午飯時間都仲有好多人排隊，不過好彩排咗20分鐘左右有得食。美登利嘅壽司店我哋都幫襯過好幾次，但迴轉壽司店都係第一次，除咗海胆唔多新鮮之外，其餘壽司都好好味，吞拿魚夠肥美，貝類夠鮮甜，我哋最愛嘅蟹膏就同本店食到嘅咁甘香。一家5口食到飽飽都係7仟幾円，同响香港食壽司價錢差唔多，但食物質素就高幾倍。

食完飯就返酒店check in。嚟緊3晚我哋都會住响池袋Metropolitan，我哋book咗3床房，大家都可以舒舒服服休息。因為噚晚响飛機上瞓得唔係幾好，加上啱啱食飽，3儍見到張床都情不自禁攤咗上去，唔駛5分鐘就瞓著哂。

我哋瞓到傍晚先起身。先去附近行下電器舖，再去磯丸食燒海鮮。呢度我哋每次嚟東京都會食，雖然唔算好平，但勝在食物水準有翻咁上下，d海鮮亦都好新鮮，我哋叫咗一個貝類併盆、燒腩肉、燒蟹蓋，另外再叫咗d熟食好似炸雞、炸蝦、炸魚餅同炒飯。睇住自己親手燒嘅蜆貝熟咗打開口嗰下真係流哂口水，睇到三儍唔駛勞氣自己不停食就知d嘢真係幾好食。呢餐飲飽食醉都係8仟幾円。

食飽飽我哋再行下local超市買下飲品早餐，再去便利店買雪糕做飯後甜品。日本嘅雪糕正香港嘅好多，種類多又好食。買完就返酒店沖涼食甜品瞓覺啦！

(day 1 完）