雪國漫遊 Day 7 2010-01-15

行完見有d肚餓，就響市場度食拉麵，吖！又幾好味喎， 總算唔係空手而回。

下一站係青森產物館，呢座A字型建築物地下賣手信， 二樓係展望台同展覽廳。一入去已經俾蘋果批嘅香味吸引住， 買咗個嚟食，香味同賣相都好吸引，但食落普通， 食完再上二樓參觀映相， 走之前再响地下買咗d蘋果片做手信同食咗個蘋果雪糕。

由於由青森市去不老不死溫泉嘅車程頗長，原定去自然公園ねぶたの里嘅行程決定取消，直接揸車入去不老不死溫泉。 上車無耐我哋就開始小睡，瞓醒已經離開市區， 周圍風景已經變成鄉郊，而且仲開始有太陽，見到籃天白雲， 仲見到好靚嘅"耶穌光"！

經過4個幾鐘頭車程終於到達不老不死溫泉，check in 完就可以上房，行李再由職員送上。間房都幾大，仲面向海， 風景幾好。放好行李食咗小小嘢（我哋未食晏）換好衫就去浸溫泉。 不老不死溫泉嘅賣點係金黄色嘅泉水同响海邊嘅浴場，但 由於天氣太凍，只有男士們去浸露天，我同洛洛就浸室內。 溫泉水好熱，好大陣鐵銹味，浸完一定要沖身， 如果唔係會染到皮膚變黃色，不過溫泉水尚算滑溜。 浸完出去已經見到兩位男仕浸完溫泉等緊我哋。 佢哋話露天溫泉係就係好好feel，但要冒住大風雪行去浸（ 雖然已經响內湯浸熱個身），d水又唔熱，好易凍到肺炎， 所以浸咗一陣就頂唔順返內湯再浸過。期望遲吓秋天再嚟過浸過。

浸完溫泉返房抖陣就食晚餐，晚餐安排咗响個式室進食， 可以坐得隨便d。今晚係食海鮮會席料理，都幾豐富同幾好味， 食完就番房休息嘞。