三儍襲昇龍道 Day 7 23/8/2017

舒舒服瞓咗一晚，醒咗梳洗之後就一去浸溫泉。由於時間尚早，加上呢兩日係平日旅館住客比較少，今朝個溫泉一個人都無，可以映下個溫泉再一個人獨霸溫泉慢慢浸。微涼嘅高山氣候、溫熱嘅溫泉水加埋好靚嘅環境真係舒服到唔捨得起身，溫完溫泉夠鐘就去食早餐。

早餐由旅館預備，小朋友食西式早餐大人就食日式早餐。早餐好豐富，西式嘅有奄列沙律麵包等，而日式早餐就有燒魚、惣菜、朴葉味噌牛肉同即做豆腐等，配埋飯或粥，不單飽肚，仲好好味，食飽我哋就返房執好行李check out 喇。

離開濁河溫泉，我哋啟程返名古屋。沿途風景好靚，途經一個PA仲有好多好新鮮好靚嘅農產品賣，雖然無得買返香港，但我哋都買咗少少上車食。經過2個幾鐘嘅車程無哋終於去到明古屋市，去到今晚住嘅酒店 check in 泊好車就行去名古屋市科學館玩。

名古屋市科學館外型好特別，同三儍响門口映完相之後就買飛入場。入場之後先去排隊攞極寒體驗嘅整理卷，再四圍參觀。科學
館唔同層數有唔同嘅主題，包括太空探索、天文、能源、地球資源等，同之前去過嘅靜岡市科學館一樣，用咗好多裝置同小遊戲俾參觀者了解科學原理。玩到咁上下我哋就去參加極寒體驗，參加者可以體驗零下三十度嘅極地溫度，又可以親手摸下由南極運㗎嘅冰塊，仲可以睇下極地探險隊嘅生活。雖然參觀期間館方已經提供咗大褸俾我哋著，但入去極寒室一陣三儍都頂唔順要出返嚟，參觀時間唔長，但總算係個難得嘅體驗。

我哋玩到閉館先走，由於牛餐只係食咗响便利店買嘅飯團麵包，所以玩完大家都好肚餓，响開始行街之前我哋先去食下午茶，路過一間甜品店就入去食少少嘢，我哋叫咗兩份甜品，估唔到好好味尤其係個士多啤梨多士，熱辣辣嘅多士配埋雪糕同酸酸甜甜嘅士多啤梨醬，好味。

食完嘢我哋就响附近行下街， 之後就去食晚餐。念念不忘d雞翼，所以我哋今晚又去幻之手羽先食晚餐，食飽飽就返酒店休息。

今晚我哋住嘅係名古屋Garland Hotel，酒店規模唔算大，不過位置好方便，間房好舒服，舒舒服服沖完涼就休息嘞。 

（day 7）

三儍襲昇龍道 Day 6 22/8/2017

一早起身我哋就去浸多轉溫泉，舒舒服服浸完溫泉食完簡單嘅早餐之後就 check out，揸車去市中心。我哋响市營嘅停車場泊好車之後就行去行朝市。

高山市有兩個朝市，我哋今日行嘅係宮川朝市，朝市係河邊，還境好舒服。去到朝市都係9點幾，但大部份舖頭同攤檔都已經開始營業，朝市唔算好大，但就好多嘢睇，有手工藝品、衣物、食品、農產品同當地特產手信等，一路慢慢行慢慢睇，買咗好清甜嘅白桃、調味料同手信，滿載而歸之後就落去河邊映下相，睇下河裏面嘅鯉魚就去下一站。

我哋之後就去車程唔駛半個鐘嘅飛弾古川。飛弾古川本身已經係一個好出名嘅景點，因為動畫《你的名字》以飛弾古川為故事舞台，更令到動畫迷慕名而來。我哋其實本身只係想睇下風景映下相，不過難得嚟到都去下動畫裏面嘅場景好似JR車站咁映下相，之後就去白壁土藏の町。白壁土藏の町由白色牆身嘅古建築排列而成，最特別嘅街上有條叫瀨戶川嘅小河流，河裏面養咗好多條好大條嘅錦鯉，環境好靚，古色古香。嗰度仲有得買魚糧餵下魚，我哋餵完魚响附近行多陣，就揸車去返高山市食晏喇。

牛餐又係食飛弾牛，不過今次唔係食燒肉而係壽司，壽司上面嘅牛肉係生嘅，但無血水入口無鯹味，相反牛味香濃，有肉汁同牛肉嘅甜味，牛脂配合埋壽司嘅醋飯啱啱好，好甘香好好味。三儍食嘅係牛肉丼飯，牛肉用汁煮好放上飯面再加隻溫泉蛋，一樣都好好食。雖然呢餐唔平，埋單都要7仟幾円，不過真係好好味好滿足。食飽就揸車去今晚住嘅溫泉酒店喇。

今晚我哋住嘅係濁河溫泉。濁河溫泉位於下呂市嘅御岳山上，溫泉街海拔1800m（即係差唔多兩個大帽山咁高），係少見位高山嘅溫泉。由高山市出發，兜兜轉轉沿住山路蜿蜒而上，差唔多個半鐘終於到咗目的地。我哋今晚住嘅係御岳旅館，到埗check in 之後就上房，三儍上到房見到係和式房就好開心四圍走，我哋參觀完間房之後就換衫去浸溫泉。

揀呢間旅館原因係因為旅館有一個响溪流旁邊嘅混浴野湯，要行百幾級樓梯先到，條樓梯又濕滑又斜，我哋仲要帶住三儍行，其實都好論進，幾經辛苦終於行到落去，但係居然開始行大雷落大雨，但一場嚟到無理由唔浸，我哋响簡陋嘅更衣換好衫就落水，溫泉無人用緊，原本可以一家好好享受溫泉樂，但係d泉水實在太熱，大人浸都有d勉強，三儍直情落唔到水，加上又落緊大雷雨，所以我哋好快就上返水，返翻旅館嘅溫泉浸。呢度嘅溫泉其實好正，浸完皮膚好滑。浸完溫泉時間尚早，我哋返房嘆抖下，到夠鐘就落去餐廳食晚餐。

今晚我哋食會席料理，内容好豐富，頭盤就已經有沙律、刺身、凍豆腐、惣菜等，主菜有飛弾牛sabusabu、煱物、天婦羅、燒河魚同蕎麥麵，多到根本食唔哂，但d嘢又好好食，食到攬住個肚；至於三儍嘅兒童餐賣相都好精美，份量都係多到食唔哂，食到飽飽我哋就返房。

原本飯後嘅節目係觀星，濁河溫泉本身位處高地，光害比較少，好天時可以用肉眼睇到銀河，而旅館更加有天文望遠鏡可以俾住客觀星，好可惜今日天氣唔好，觀星活動暫停，唯有返房休息，返到房床舖已經舖好，三儍好興奮周圍碌，我哋玩下遊戲睇電視食埋消夜就休息喇。

（day 6 完）