今朝都係一早就起身，响房食完早餐就出發，目的地係神戶嘅麵包超人館。由於今日係 Thur Pass最後一日，所以要用儘佢，我哋撘新幹線，好快就去到神戶站，睇資料話要轉電鐵先去到，不過去到搵咗好耐者唔見接駁電鐵嘅出口，睇翻清楚原來電鐵係接駁新神戶站而唔係神戶站，不過好彩行過去都唔係太遠，順利去到電鐵站撘到去 Harbour Land，一出站就見到好多麵包超人角色嘅石雕迎接我哋，三儍未去到就已經興奮到儍咗。
去到每人乖乖放低¥1500就入場，小朋友另外有件小小嘅記念品。入到去首先見到嘅係好多唔同嘅公仔造型，d公仔好靚，淨係响度映相都用咗唔少時間，映完相就正式入去玩。其實裏面都唔係好大，分幾個唔同區域玩唔同嘅嘢，包括細d小朋友嘅遊樂區、長滑梯、場景展示區、表演廳等。對大d嘅小朋友嚟講d遊戲可能有d無聊，不過對三儍嚟講就好好玩，玩咗2個幾鐘，我哋已經有d餓，所以決定要離開，不過無走得咁易，因為麵包超人館仲有附設好幾間souvenir shop，足夠令我哋破產，不過我哋夠定力，只係買咗少少嘢，可以全身而退。
離開咗麵包超人館，我哋係時間食lunch。今餐我哋打算食神斤牛，我哋撘翻電鐵去到神戶站，出咗站搵咗一輪先搵到好出名嘅Mouriya，不過去到已經3點，總店已經打烊，經指示去到分店，可能我哋個樣實在太肚餓，所以佢哋肯做埋我哋生意。由於二、三儍玩得太攰瞓咗，所以我哋叫日1分A4同1份A5嘅神戶牛三個人share。個set除咗牛扒之外仲有湯、前菜、沙律，一路食廚師就一路响我哋面前煎牛扒，食完好好味嘅前菜沙律之後就再上牛扒配飯，牛扒好肥美，入口溶化，不過略嫌牛味唔夠，反而之後上嘅野菜炒牛肉就好野味，食飽嘆埋杯咖啡就埋單，呢餐好貴，要2萬幾円，不過一場嚟到又無理由唔食，只係下次有得揀我唔會再食囉。
食完飯我哋就返大阪行街shopping，去到最後2日真係要努力行街買嘢。由於太晏食lunch，行完心齋橋大家都未肚餓，所以只係去便利店買咗少少嘢食，再經過好出名嘅cheese cake舖頭時買埋番酒店食，cheese cake真係好好味，食飽執好行理就休息喇。
（day 9 完）
