忍咗成年，去完新加坡仲未夠喉，係時候再走多轉日本喇。都係個句，因為成家人一齊去旅行皮費好重，所以今次都係選擇廉航，早係半年前已經訂好機位開始book埋酒店，等到頸都長，終於可以出發喇！
我哋今個trip由東京入大阪走，為咗book到最好嘅航班時間，我哋分別book咗兩間航空公司，去程撘 HK Express，回程撘 Peach。原以為安排得好好，臨飛之前先醒起去程係零晨機，驚三儍瞓得唔好之餘仲會嘈親人，更擔心攞唔到位打散我哋坐，所以一早就到咗機場check in。地勤職員後尾話俾我哋知，原來航空公司予留咗幾行機位俾有小朋友既家庭可以安排一齊坐，而由於我地早check in，所以可以順順利利坐到個靚位。
Ckeck in完我哋就响機場食晚餐，再去閘口預備上機，由於三儍實在太興奮，一路玩到上機，好彩上咗機無耐就教暗咗d燈，而三隻怪獸又開始無電，好快就瞓咗，無嘈親人；而我哋就斷斷續續咁瞓清晨5點幾終於到咗羽田機場喇！
攞咗行李過埋海關就搭limousine出池袋，時間啱啱好可以趕到特別班次嘅車，又可以上車恰陣，大概1個鐘左右就到咗池袋，我哋去酒店放底行李就出發去築地喇！
由於我哋未食早餐好肚餓，所以諗住响築地食d好嘢，點知去到先知好多舖頭因為夏休而無開，好失望。雖然係咁，我哋都搵到d好味嘅嘢食，原則上見有人龍就排埋一份就包無衰，嚟到日本第一樣食嘅就係蛋卷，唔怪得知咁多人排隊，因為真係好好味，蛋卷煎得好嫩滑，配埋甜甜哋醬汁同蘿蔔蓉啱啱好，好啱當早餐食。
原本我哋諗住食壽司，不過因為我哋心水嘅舖頭大排長龍，加上三儍殺傷力實在太驚人，費事嚇親人唯有放棄，轉為去紀文買炸魚塊食，由於係新鮮炸起，味道都唔錯。慢慢行下食下好快就11點，係時侯去錦系町嘅Akachan入貨呢幾日用。
去得Akachan就唔止買尿褊奶粉，仲買咗唔少小朋友嘅日用品衫褲內衣。行完Akachan之後仲行理同幢嘅100円店同GU，行到3點先離開，返池袋攞房。
我哋今晚住 The B Hotel，之前已經住過，今次因為有2大3小，所以預早已經通知咗酒店。由於我哋太攰，所以上房之後就沖個涼瞓晏覺。原本諗住今晚去新宿睇花火祭，不過因為帶住小朋友唔想同人迫所以放棄，而且瞓醒時間已經唔早，加上我哋無食lunch，所以決去 食飯。今晚我哋去食燒海鮮，去到舖頭唔多人，等咗一陣就可以入坐。我哋叫咗蟹肉炒飯，燒貝類併盤，燒蟹膏，螺肉料理等。d海鮮好鮮甜，熟食都好好味，尤其個螺肉料理好正，呢餐連酒水埋單8千幾円，都算ok低食。
食完燒海鮮應該都幾飽，不過因為無乜澱粉質而覺得仲差少少，所以決定去附近嘅無敵家食拉麵。去到無敵家已經有人龍，排咗20分鐘左右就有得食。佢d麵真係超彈牙，湯底好濃好夠味，食完好滿足咁攬住個肚走，行埋藥房同去便利店買早餐就返酒店休息喇。
（day 1完）
