梳洗後就去專爲本陣客人而設嘅房間食早餐， 早餐已經預早一盤盤預備好，我哋坐定就食得。早餐雖然尚算豐富， 但日式早餐真係唔係幾食得慣。食飽就去浸多轉溫泉， 由於天氣真係好凍，好可惜我同洛洛只係浸咗內湯， 無出去浸露天混浴浸完內湯就返房執抬，而男仕們就去浸露天混浴， 好快佢哋就浸完番嚟，執好晒嘢就check out走嘞。雪越落越大，大到連大人行路都好論盡， 幾經辛苦先將d行李同洛洛洛搬上車，清理好車上積雪就出發。 由於天氣關係，取消咗原定去妙乃湯、蟹場等浸日歸嘅行程。 事後先知原來呢幾日係秋田近年內降雪量最多嘅日子。
離開秋天乳頭溫泉鄉，我哋向住青森進發。下一站係八戶， 一路北上積雪就一路增厚，好彩風雪唔太大， 點零鐘我哋就到咗八戶市場，諗住先去市場兜個圈先決定食乜， 點知今日係定休日，唯有去市場外嘅餐廳食午飯。
食完幾好味嘅丼飯之後就無其他行程，見時間尚早， 就攞本旅遊書出嚟研究吓，最後決定去蕪島神社行吓。 有個小插曲係話說我哋響停車場攞車時架車車呔啜住咗， 點都開唔到車， 正當唔知點算時有位男仕幫我哋推車並示意我哋踩油， 我哋都有一齊落車推車，最後都好彩開到車， 傾番原來嗰位男仕係香港人， 自己一個人嚟八戶玩，估唔到响呢個小市鎮都會撞見香港人。
蕪島响八戶市內，揸車好快就到。神社位於海邊嘅小山丘， 好大風好涷，姑媽決定同洛洛留响車度，我哋就上神社行吓映吓相。 神社好細，好快就行完，趁未夠鐘食飯我哋去咗附近嘅西松屋入貨， 再揸車去酒店check in。今晚住 Super Hotel，房比 Comfort Hotel仲要細，但有上格床可以放嘢。安頓好就出去食飯啦。
入夜嘅八戶市好靜，未夠八點d舖頭已經不錄續收舖， 到屋台橫丁行咗個圈，d食店又毫不吸引， 最後响商店街搵到間連鎖日式快餐店食咗烏冬同炸雞飯做晚餐， 好彩味道都唔錯，食飽就番酒店休息嘞。
(Day5 完 )
沒有留言:
發佈留言