今朝早咗d起身整理行理，因為今日就要check out返新加坡，整理好行李就去餐廳食早餐，由於時間尚早，今朝唔駛排隊就可以食早餐。慢慢食完早餐之後就上房換泳衣，去酒店泳池浸下水。
可能waterpark響附近，酒店泳池唔係太大，有一個深少少可以俾人游到水嘅池同另一個嬉水池，幾隻怪獸唔識游水，只響嬉水池玩下水，雖然係咁，三隻嘢都玩得好開心，夠晒鐘先依依不捨咁離開。
返房沖好涼換衫執好 d 嘢就要check out，真係好唔捨得呀！見仲有 d 時間，就由得3隻怪獸響lobby玩番夠本，而司機就準時12點接我地返新加坡。
由新山返新加坡大概個半鐘車程，不過司機唔熟路兜咗岸先搵到酒店，去到酒店check in埋上到房已經2點幾。我哋今晚住 Holiday Inn Singapore Orchard City Centre Hotel，間房幾大幾舒服。我哋放低行李就出去喇。
酒店行去地鐵大概8分鐘路程，唔算好遠但亦唔叫方便。原本想去Science Museum，但因為時間唔多夠，臨時改咗去聖淘沙行下。我哋先搭地鐵去到港灣站，食咗少少嘢再搭 Sentosa Express 入島。
Sentosa Express車費唔平，但只要響島內就可以任搭，我哋入嚟其實漫無目的，只係諗住四圍行下。由於飛之前實在太忙，根本無時間做功課，一路就以為Garden by the Bay響聖淘沙，落咗車搵唔到 Garden by the Bay就問車站職員，見到佢O哂咀先知自己搞錯咗，唉！真失敗！一場嚟到無理由就咁就走，研究完一輪決定行下蝴蝶爬蟲館。
蝴蝶爬蟲館入場費唔平，要S$16，小童都要S$10,但講真，真係吾多值，館內好似日久失修，d設備頗陳舊，係就係有個蝴蝶保育區可以睇下蝴蝶，不過好細，唔駛15分鐘已經行完，館內仲有好多昆蟲標本，不過大家都覺得頗核突，係咁依行下就算。行完決定出返去市區食晚餐。
今晚我哋去老巴剎食飯，行均全個熟食中心之後叫咗魚旦湯、蝦麵、炒貴刁，炒飯、蠔餅同豬什湯，味道其實普普通通。食完嘢去廁所先見到老巴剎後面條街有好多檔香噴噴嘅串燒，雖然已經好飽，但都忍唔住去排隊買，串燒價錢唔貴，大概S$1一串，我哋買咗兩打番去酒店做宵夜。
番酒店途中買咗啤酒果汁食串燒時飲，沖完涼我哋就食宵夜。d串燒雖然凍咗，但都仲好好味，d蝦唔鯹之餘仲好香蝦味，細細隻居然有膏；雞肉牛肉好嫩滑，配埋個唦嗲汁真係無得頂。食飽我哋整理好行理就瞓覺喇。
（day 4完）
