三傻襲九州 day 5 11/7/2013

今朝我地好早就起身，因為book咗10點鐘嘅海豚tour。我哋先去食早餐，早餐好豐富好多選擇，d嘢食好精緻好好味，食飽響酒店映下相欣賞下個無敵海景，之後就上房拎埋d行理check out。

跟住我哋就揸車去附近嘅碼頭，響觀光接待處登記好，夠鐘就上船。我哋一行13人包船,著好救生衣就開船喇。初初以為d海豚响深海,隻船會駛到離岸好遠先睇到，點知原來d海豚真係好鐘意親近人類，開咗船無耐已經見到佢哋嘅蹤影，d海豚數目好多，大概有十幾條，有大有細，一路響船周圍游，好可愛！唔好話小朋友，連我哋d大人都睇得好開心。

一個鐘嘅海豚tour好快就完咗，我哋上岸之後去返接待處拎雪條食。日本人真係細心，咁熱天時出完海之後供應埋雪條俾我哋解渴，讚！我哋食完雪條周圍映下相就走嘞。

下一站就係去食lunch。其實特登改行程嚟天草玩係因為早前睇到電視講天草嘅海豚tour同燒海鮮餐好似好正咁，所以lunch會跟番電視節目介紹嘅餐廳食，之前已經用e-mail聯絡咗餐廳reserve咗海鮮BBQ set，所以去到坐低就有得食。個set份量好多，有帶子、螺、蝦、魚同魷魚，d海鮮好新鮮好肥美，帶子貝類放咗上爐燒到熟就自動打開殼，個set仲有鮑魚，由嬸嬸幫我哋燒好切粒俾我哋，d帶子鮑魚燒得啱啱好，鮮甜多汁又唔韌，其他海鮮都好好味，食完已經好飽，嬸嬸再拎埋預訂咗嘅伊勢海老出嚟，燒好又再食過，伊勢海老啖啖肉，鮮甜爽脆，好味，大滿足！呢度d嘢真係好好味，不過美中不足係呢度無冷氣，咁熱天氣下BBQ真係差d中暑。

食飽飽我哋響餐廳嘅土產店買咗d小食就離開天草，返去福岡啦。由天草揸車番去福岡要成3個幾鐘，中間停過農產品店買咗西瓜同桃拎番香港食。番到福岡已經接近6點半，我哋響附近嘅mall食咗嘛嘛好味嘅拉麵做晚餐，再去酒店check in。酒店係商務酒店，房好細，好勉強先瞓到一家5口，3儍沖好涼就瞓啦，我哋執好行李都休息啦！

（day 5完）

三儍襲九州 day 4 10/7/2013

由於噚晚好早瞓，所以今朝好早就醒咗。我哋先去浸過溫泉，再去食早餐，今朝嘅早餐普普通通，食完就check out喇。原先我哋想去酒店附近嘅物產館行下，點知去到先知今日唔開，唯有開車去附近嘅白川水源。

白川水源故名思意就係泉水嘅源頭，泊好車行過去都係5分鐘左右，入到去除咗個小小嘅神社之外就係一個水池，水池d水好清，清到見底，睇真d原來水池底不斷有水湧出。池邊有d水売同漏斗被人＂畢＂水飲，d水好冰涼甘甜，我哋又食又拎，飲完再用樽裝d拎走。

行完白川水源我哋就搵附近超市入貨，超市附近原來有間西松屋，為免嘥時間我地兵分兩路，我同dad dad 就去西松屋掃bb用品，三隻怪獸就跟姑媽行超市。我哋響西松屋掃完又平又正嘅bb用品滙合大隊一齊食lunch。今餐去連所炸豬扒店食，雖然話係連鎖店，但點都好味過香港食嘅n倍，食完繼續上路。

下一站係我哋今晚入住，位於天草嘅嘅酒店，由於天草離南阿蘇要差唔多3個鐘頭車程，所要我哋食完lunch就要出發，揸車去天草期間我哋停過物產館買水果今晚食，又停過往天草嘅天門橋展望所映下相，大概5半左右終於到咗酒店，check in咗就上房。

間酒店好新，房都好新，今晚我哋住和式房，雖然房唔大，玄關同日式浴室都齊備。大二三少最開心，因為又可以周地轆。

換好衫我哋就去浸溫泉，原來酒店好大，溫泉晌另一邊，要坐幾分鐘嘅shuttle bus先到。溫泉d水質普普通通，不過因為聽日會番市區無得再浸溫泉，所以我哋都儘情浸。浸完溫泉我哋就邊欣賞天草嘅日落，邊行番酒店預備食晚飯。

晚餐係日式fusion菜，無論菜式、餐廳佈置以致待應嘅service俾我嘅感覺都係好高級，不過三儍無視一齊，依然如故，真係失禮哂。d食物賣相真係好精緻，亦幾好味，不過份量少d，唔多夠飽，食完我哋就去放煙花喇。

酒店有個私人沙灘，可以俾我哋放煙花，煙花之前一早買定無機會放，遇啱呢間酒店有沙灘真係一流。三儍無試過放煙花，所以好好奇，見到有火又要驚又要玩，由於我哋買嘅煙花唔多，好快就放完，不過三儍都好開心。

下一個節目就係水果大食會，d水果係今日買，清甜多汁，好味！食飽飽就番房沖涼瞓覺喇。

（day 4完）

三儍襲九州 day 3 9/7/2013

起身梳洗後就去餐廳食早餐，早餐意外地多選擇，牛奶乳酪仲好好味添！都係嗰句，8件円一泊二食仲有溫泉浸真係好低。  食完早餐我哋響酒店周圍行下映下相，酒店響高原上面，風景幾靚。映完相我哋就返房執好行李check out 喇。

我哋先去半個鐘左右車程嘅九重夢大橋，條穚好似青馬大穚，不過就行人而唔係行車，條橋好高，而且山谷有風，行上去條橋有少少搖，如果怕高都幾驚！行完大穚我哋響手信店買d水果食，坐下抖下再起。

下一站係一個鐘車程嘅大觀峰，嗰度係一個觀望台可以望哂成個南阿蘇，風景好靚好舒服，我哋映下相稍為休息下又再起行。

跟住再去大半個鐘車程嘅阿蘇火山，原先諗住先食個lunch再上火山口，點知去到已經差唔多3點，d食店都已經無開，幾經辛苦先響上火山口嘅䌫車站搵到間食堂有嘢食。食堂食物選擇雖然唔多，不過都ok好食，食飽可以上火山喇。

上火山可以坐䌫車，而我哋就揀自己揸車上去。阿蘇火山係活火山，耐不耐就會爆發，所以探測到有任何火山活動都唔可以參觀，不過好好彩阿蘇火山今日好乖咁瞓著覺，可以俾我哋近距離睇下佢。上去火山沿途都有爆發過嘅痕跡，寸草不生，越近火山口硫磺味越重，上到去泊好車就可以行去火睇火山口，火山口面積好大，仲不斷有煙冒出，咁大個人都係第一次咁近睇個火山口，諗到佢隨時有機會爆其實真係有d驚。

睇完火山我哋就出發去酒店，今晚住リラックスリゾート ホテルグリーンピア南阿蘇（Hotel Greenpia Minamiaso)，距離火山只係半個鐘車程，所以好早就到咗酒店。間房好大，有三張床，啱唒我哋，間房個view好正，望住酒店自己個公園同阿蘇山，綠油油咁好舒服。由於時間尚早，我哋放好行李就去浸溫泉，個溫泉唔錯，大人細路都浸得好開心。

浸完溫泉我哋就去食晩飯，今晚係半自助型式，前菜白飯甜品同飲品自己拎，主菜就另上。主菜係燒牛肉、酸忌廉煮魚同馬刺，燒牛肉同魚都ok，但馬刺⋯，雖然係呢度嘅名物，但食馬肉真係好麻麻，而且仲係刺身，所以大家都食剩唒，我自己膽粗粗試咗一件，口感似牛肉，但無乜味。食完飯雖然仲好早，但唔知點解好眼瞓，所以乜都唔理，返房瞓覺。

（day 3完）

三儍襲九州 day 2 8/7/2013

舒舒服服瞓咗覺好嘅,起身梳洗後就去食早餐,早餐同噚晚一樣都係自助形式,好多選擇,咖啡仲幾好飲。嘆完早餐上房整理好行李就check out,其實呢間酒店唔錯,好多嘢玩,住多一日都唔悶，希望下次有機會再住過啦!

Check out之後第一站我哋就去超市入貨，買番d飲品零食同生果上車食，真係好鐘意行日本嘅超市，d貨又新鮮又靚，價錢又唔貴，滿載而歸再去附近嘅藥房買尿片俾2、3少用，之後再出發去別府地獄。

去別府地獄好近，大概半個鐘車程就到。別府地獄其實係溫泉源頭，分為8個，不過因為天氣太熱，所以我哋只係參觀咗海地獄就去下站。

下一站係九州自然動物公園，個公園同之前去過嘅動物園好唔同，佢嘅佔地好大，足足有幾個山頭，而賣點係有好多非洲動物睇。我哋泊好車就去巴士站等劫動物巴士，期間見到工作人員予備一盆盆嘅飼料，原來除咗睇動物之外仲有得親手餵動物。夠鐘上車喇，坐好之後工作人員就講解乜嘢動物食邊種飼料，而我哋坐嘅「犀牛號」就經過好似侏羅紀公園嘅電閘，進入飼育區。

第一樣見到嘅動物係羚羊，佢哋似乎已經習慣俾人餵，一見架巴士就走哂過嚟攞食，大、2、3少好少咁近距離見到呢d野動物，覺得好得意，架巴士停定我哋就開始餵羊，餵咗一陣就去下一part，餵黑熊。黑熊個樣好可愛，又係見到架巴士自動走埋嚟，餵完就再去下一part。

熱身完係時候睇d兇猛d嘅動物，就係萬獸之王-獅子喇！d獅子數量好好，成班圍住架車哮叫，真係幾恐怖，嚇到d細路驚驚，唔敢餵佢哋，要由我代勞。餘下嗰差唔多1個鐘嘅車程我哋見到好多唔同嘅動物，包括梅花鹿、大象丶長頸鹿、犀牛、老虎、斑馬、美洲豹、駱駝⋯。

餵完動物到我哋自己肚餓，雖然個動物園好大仲有其他地方玩，但都要走，要去醫肚喇。我哋去咗最近嘅大mall裏面嘅餐廳食個遲來嘅lunch。我哋今餐食蕎麥麵，都ok好食，食完響mall行咗一陣，就出發去今晚嘅酒店喇！

我哋今晚住久住高原コテージ，酒店除咗溫泉之外，仲有個牧場可以騎馬㖭。叫得cottage就真係全木建築，我哋嘅房面積唔大，一眼見哂，好彩都叫做ok舒服，不過酒店位於郊區，周圍都好多小昆蟲，搞到我哋好不安。

放好行李我哋就去酒店餐廳食晚餐，今晚係食燒肉。d食物分量好足，而且好新鮮，呢餐連埋一晩酒店都係8仟円一位，算超值！

食完晚餐我哋再番房開水果party，試下今朝買嘅生果，跟住再去浸溫泉。呢度嘅溫泉比想象中好，泉水好滑，再加上邊浸可邊欣賞香港難得一見嘅滿天見星，真係正到暈，嘆完我哋就番房休息喇！



（day 2完）