三儍襲新潟 day 6 25/1/2017

今日我哋就會離開冰天雪地嘅湯澤，返去東京喇。一早就去餐廳食完早餐就check out 坐酒店嘅 shuttle bus 到 JR 站。搭一個鐘多d嘅新幹線就到咗東京站，再轉車去池袋放底行李，12點我哋就可以出發去新宿行街街喇。

到咗新宿首先係醫肚，我哋因爲好肚餓所以求其去咗一間餐廳食嘢，餐廳d嘢食味道普普通通，之後再响街邊食咗個好好味嘅甜品，食飽飽就開始行街街。行完新宿再轉戰原宿，最後滿載而歸，係時候返酒店放低d戰利品再去食晚餐。

我哋今晚住嘅係 Super Hotel Lohas，我哋book 嘅係三人房，二三少本身係免費入住，不過之前都send定e-mail 同酒店講我哋會有二大三細入住，check in 時職員話我哋book嘅三人房唔夠我哋瞓，會俾另一間房俾我哋，結果我哋攞房嗰陣嚇咗一跳，酒店居然安排咗間團體房俾我哋，連埋梳化床總共有5張床，間房亦係嚟東京咁多次之中最大間嘅，房外面行幾步就到食早餐嘅餐廳同大浴場，好正好方便。

參觀完間房我哋就去食晚餐，今晚我哋去每次都必食嘅磯丸水產，d 嘢依然咁好味，食飽飽就返酒店，去大浴場浸浴再瞓覺啦。

（Day 6 完）

三儍襲新潟 day 5 24/1/2017

今日全日响湯澤玩。瞓醒覺我哋餐廳食早餐，早餐好豐富，除咗和式食同西式嘅早餐之外，仲有即做飯團。食完好滿足嘅早餐之後，三儍就急不及待上房換衫出去玩嘞。

今日我哋最主要係俾三儍學滑雪，出發前已經睇過附近滑雪場嘅資料，湯澤大型滑雪場學滑雪嘅費用唔平，但因為唔知佢哋有無心機學唔想嘥錢，所以最後決定去酒店附近嘅一本杉滑雪場玩，嗰度比較細，得一條滑雪道，而且斜度無咁大，只啱小朋友同初學者玩，但相對地就安全d。
由酒店行過去只係5分鐘左右，滑雪場口嘅一本衫食堂就係租雪具嘅地方，我哋入到去同食堂幫三儍租雪具同予約教練，總共都係12000円。俾咗錢就由食堂嘅公公婆婆幫三儍揀啱用嘅滑雪工具。自己响雪地玩咗陣教練就嚟幫三儍上堂，教練好有心機教，可惜最細嗰個無心機學，好快就自己走咗去玩，二哥全程上堂但上完堂就揀咗玩雪唔再練習，反而大哥經過教練一個鐘頭嘅指導之下都掌握到滑雪嘅技巧，上完堂再自己練習，最終都可以自己滑到。

玩到肚餓又攰又涷，就去食堂食午餐兼休息一下，食堂d嘢都幾好食，食飽抖夠又暖咗身之後我哋就再去玩，大哥繼續練習，二、三儍唔滑雪就玩剷雪同坐雪兜，雪兜同玩雪嘅用具都係雪場免費提供，我哋當然有玩埋一份啦，玩到差唔多4點大家都攰個身又濕就離開，返酒店沖個熱水涼兼換衫再出去。

我哋換好衫就出去JR 站行街街。湯澤站嘅 CoCoLo 商場可以算係湯澤其中一個景點，呢度除咗有好多唔同嘅手信賣之外，仲有得浸溫泉同試酒。試酒只係500円就可以拎到一個小酒杯同5個代幣，只要揀啱酒，放好杯入代幣㩒個制機器就會自動斟酒，我哋2個人一共試咗10種唔同口味嘅清酒，飲飽酒買完手信就返酒店。

上房放好d手信就去餐廳食晚飯，今晚嘅食物大致上同之前一晚差唔多，食飽飽就房換好衫再去浸溫泉，之後就休息喇。

（day 5 完）

三儍襲新潟 day 4 23/1/2017

今日我哋會離開新潟市，瞓醒食完早餐寄存行李响酒店就出去嘞。一出去已經見到落緊雪，三儍急不及待走出去'淋'雪，超開心！我哋今日行程比較鬆動，所以安排咗附近嘅新發田市行下 Aeon Mall，由新潟市搭JR去只係大概半個鐘，但一落車就已經係兩個世界，完全係白雪茫茫。我哋响 Aeon Mall 行完街，食埋幾好味嘅午餐响好大雪嘅無人車站搭JR返新潟市嘞。

响酒店拎返行李我哋就搭新幹線去越後湯澤，正當我哋以為好好彩趕得切搭早一班車之際先至發現我哋上咗嗰班車係唔停湯澤。好彩發現得早，可以响燕三条站落車再轉車，總算有驚無險。去到越後湯澤已經5點左右，一出車站已經好大雪，我哋推住行李就去酒店。由車站去酒店都係5分鐘路程，但因為落住雪要行上小山坡，加上又要推住行李要慢慢行，所以用咗雙陪時間先到酒店。去到check in 咗就上房嘞。

我哋book嘅係和室，上到房先知原來酒店 upgrade我哋地去和洋室，間房大咗，多咗兩張床同個小廳。三儍見到榻榻米照例好開心，四圍走四圍碌，擾攘一輪就去餐廳食晚餐。

晚餐係自助餐，食物種類好多，有即做嘅壽司、天婦羅、燒海鮮貝類、燒牛肉，仲有蟹腳、串燒，和食冷盤同熱食，就連火煱都有，豐富又好味。食到飽飽我哋就出去行咗陣，去便利店買咗d飲品就返酒店浸溫泉，之後返房玩大富翁同就休息嘞。

（day 4 完）

三儍遊新潟 day 3 22/1/2017

今日我哋瞓夠，响酒店食早餐就出去玩。我哋今日會觀光客循環巴士，去到巴士站先用每人500円買 one day pass，再去車站等車。觀光巴士分兩條線，兩㗎車行經嘅車站都一樣，亦同樣都係循環線嘅唯一唔同嘅係兩㗎車向想反方向行，換言之A線嘅第一個站等於B線嘅尾站。我哋第一個目的地係新潟市水族館，坐巴巴士大概二十分鐘就到嘞。

水族館比想像中大好多，主要展示日本海同新潟附近嘅海洋生物，仲有水邊小動物。三儍好少去水族館，所以見到咁多唔同種類嘅魚同海洋生物都覺得好新奇好得意，除咗唔同種類嘅魚同海洋生物之外，仲有好得意嘅水瀨、海狸同海豹。呢個水族館除咗睇之外，仲有個水槽放咗d岸邊小生物例如海星同海蔘，可以俾遊客掂下摸下d，三儍初初唔敢摸，見其他小朋友先至敢掂下。

响水族館玩咗2個幾鐘，係時候要食午餐嘞。我哋搭返觀光巴士去Bandai魚市場，原本想食海鮮BBQ，不過原來呢段時間係無得食，所以去咗魚市場嘅食堂食午餐。我哋叫咗海鮮天婦羅、刺身丼飯同蒸貝類，仲叫咗清酒飲。天婦羅好好食所以三儍好快就食哂，刺身丼飯d海鮮好新鮮好甜，有d後悔淨係叫咗一份share，最正係個蒸貝類，用個鐵盒就咁蒸，乜嘢調味料都無落，裏面有帶子、北寄貝、蜆同榮蠑，全部都好肥美，北寄貝同帶子size足足有手掌咁大隻，咬落韌而且好多汁好鮮甜，由於全部都大隻，我哋食到尾幾乎都食唔哂。食到飽飽响市場行咗陣，買咗米同生果就搭車返車站。

响搭巴士期間懷疑有小朋友食飽玩飽攰到瞓著咗，所以我哋決定返酒店小休。响返酒店途中見到部新出嘅遊戲機居然有得賣，所以點都買咗先。三儍稍事休息我哋就再出去行街。我哋去咗車站南口行激安店，行完街出嚟原來外面落緊雪，仲要係大風大雪嗰隻，三儍終於見到落雪，不過因為太大風，而且又有d肚餓，所以先响酒店附近食烏冬同蕎麥麵做晚餐，返房放低頭先行街嘅戰利品再落酒店樓俾三儍感受下落雪，三儍勁開心，因為佢哋恨睇落雪恨咗好耐，玩完一輪上房沖涼，再食蛋糕做宵夜就瞓覺嘞。

（day 3完）

三儍襲新潟 day 2 21/1/2017

今日我哋會去新潟，由成田出發到新潟大概三個半鐘左右，由於唔想太晏先去到新潟，所以一早起身先去成田機場換JR Pass，我哋用嘅係長野新潟地區 Pass，响香港預先買平1000円，5日票17000円，排咗大半個鐘終於換好JR Pass同 NEX 嘅車票，返酒店食過簡單嘅早餐就拎埋行理去搭車喇。

三儍知道出發去玩都好合作，坐上NEX 已經好開心，當去到東京站轉新幹線就更加興奮，响新幹線嗰個半鐘玩下睇下映下相好快就過，當過條長長嘅隊道見到白茫茫嘅雪地就知道我地好快到達我哋嘅目的地。新潟市需然無落雪，但氣溫明顯低好多。我哋將行李寄存响酒店就去參觀味噌廠嘞。

由酒店行去味噌廠大概15分鐘路程，去到我哋同店員表明來意之後登記資料，响等見學開始之前店員俾咗唔同嘅味噌產品我哋試食，試完都忍唔住買咗d自用。買完嘢我哋就由職員帶領下參觀味噌廠。廠裏面充滿住味噌嘅香味，職員同我哋講解有關味噌嘅製造過程之外，仲有講解佢哋味噌廠嘅歴史，半個鐘嘅見學好快就完，下一站我哋就去一條馬路之隔嘅清酒店繼續參觀。

去到清酒廠佢哋嘅見學啱啱好預備開始，我哋換好拖鞋就跟大隊入去酒廠，由職員帶住參觀酒廠同講解造酒嘅過程，見學三十分鐘左右就完結，原本我哋想試下佢哋嘅酒，不過有個小朋友扭計，所以我哋就離開嘞。

我哋沿路行返去新潟站，响車嘅麵包店食咗好好味嘅麵包做tea，行咗陣就返酒店 check in。我哋嚟兩晚都係住 Comfort Hotel，同之前嗰間差唔多，不過間房就稍為大間少少。check in 咗俾三儍瞓咗個幾鐘我哋就去附近嘅 Bandai City 行咗陣街，再去食晚餐。

今晚我哋响酒店附近食燒肉放題，連酒精飲品放題每人4000円左右，食物水準好ok，無論燒肉定係料理都好味，食到飽飽就埋單，原來店員無計小朋友只收大人，所以呢餐都算好低食。食飽我哋就返酒店瞓覺喇。

（day 2完）