今日好早起身，食完簡單嘅早餐就出發去 LEGOLAND。由酒店揸車過去LEGOLAND 大概半個鐘車程，去到泊好車就沿住人潮行去LEGOLAND。一如所賣入場卷嘅counter人頭湧湧，好彩我哋之前已經响7-11買定入場卷，可以唔駛排餐死直接入場。
我哋之前已經去過 新山嘅LEGOLAND，但三儍依然好興奮，就算係大人見到場內五顏六色嘅佈置都好開心。其日本LEGOLAND嘅遊戲同新山嘅大同小異，三儍好多都玩過，所以今次已經鎖定目標揀上次好玩嘅遊戲同日本LEGOLAND獨有嘅遊戲嚟玩。大部份嘅遊戲都唔駛排好耐隊，入場無耐三儍玩咗唔少遊戲好似小兒科跳樓機、揸車、揸飛機、揸消防車救火等，不過今日天氣實在太熱，大家都身水身汗，所以我哋中途休息去咗睇3D電影，嘆下冷氣兼抖一陣。
抖完就去玩埋新山無嘅海盜船、Splash Battle、SQUID surfer同潛水艇，雖然呢d熱門遊戲都要排起碼半個鐘頭隊，不過又真係幾好玩。原本想响園內食午餐，不過都幾貴，取而代之我哋買咗小食好似爆谷薯條同沙冰邊玩邊食。玩到三點我哋就離開Legoland，出返去市區行街。
我哋將㗎車泊返去酒店，跟住就去車站附近行街，行完街返酒店放低戰利品就去食晚餐。因為大家都好攰，所以只係响酒店附近嘅居酒屋食嘢，雖然d食物價錢比較貴，但就好好味，尤其雞翼同炸雞，比幻之手羽先仲好味，食到飽飽就返酒店整理行李休息喇。
（day 8 完）
