關西行 Day 6 和歌山白濱>Rinku premium Outlet>香港 2008-10-26

今日係旅程最後一日。噚晚瞓咗一覺好，今朝兩公婆一早起身，欣賞一下房間嘅無敵大海景，再浸吓私人風呂，越浸就越覺得咁遲 check in 真係好嘥。浸咗一陣洛洛就瞓醒，梳洗完就去食早餐。

個人應為早餐正過晚餐，我同老公分别叫咗西式同日式嘅早餐，又好味又飽，加上對住無敵大海景，一路食一路望住個海，真係好嘆！食飽再作最後沖刺，浸 多一轉溫泉。之前响酒店 web page 見過有混浴，似乎好正咁，我哋就決定去浸混浴。酒店好细心，安排咗d浸混浴專用嘅圍巾俾住容使用，唔驚洩底又可以响受混浴嘅樂趣。混浴場响懸崖邊，對住個 海，有d似 infinity pool ，遠離主過建築群，附設一個小小嘅更衣室，好静好舒服。我哋去浸嗰陣無其他住客，基本上我哋一家三口包場咁滯。泉水好滑，溫度啱啱好，洛洛都浸得好開心， 如果當時有d飄雪同有杯清酒就 prefect 嘞！

浸咗一陣有另一家人嚟，我哋就返房同洛洛再浸吓私人風呂，就執嘢 check out 嘞。間酒店實左太正嘞，真係唔捨得走，check out 咗眏吓相酒店職員就幫我哋搬行李上車。我哋11點幾就揸車離開和歌山嘞！

我哋揸車上 high way ，照原定時間應該1點左右到 outlet，點知中途有車撞咗，搞到大塞車，足足遲咗大半個鐘先到 outlet。我哋一落車連飯都唔食，飛奔去掃貨，收獲當然唔少。買完一輪係時候去機場 check in ，好彩我哋予鬆咗時間，出咗 outlet 又塞車，今次短短5分鐘路塞咗半個鐘，最後都 on time 去到機場，順利還車 check in ，搭黃昏機返香港。日本，我哋好快會再嚟嘞喇！

關西行 Day 5 大阪＞和歌山白浜 2008-10-25

今日早ｄ起身，去松屋食完早餐就 check out 及寄存行李，再落梅田去日產攞車，揾咗一輪先揾到日產嘅 outlet，辦好手續 check 完車就開車返酒店，駕車嘅 GPS 比想象中易用，但因為要時間適應，响梅田兜咗少少冤枉路先返到難波，响酒店攞咗行李就向和歌山進發。由於大阪市有少少塞車，用咗個半鐘先離開大阪範圍上 toll way，上到 toll way 就揸得好快，雖然時速限制大概 80m ，但老公就揸到120m -130m ，我就負責導航，洛洛就負責覺覺豬！

2點幾我哋就到達和歌山白浜，第一站係とれとれ市場。とれとれ市場就好似一個室內街市，有濕貨區(賣海鮮)、乾貨區(賣酒/手信)同 food court，唔似築地/函館潮市類魚市場。行咗一陣個肚打曬鼓，就買咗魚生飯、鮑魚刺生同帶子剌生做午餐，魚生飯唔多新鮮，但鮑魚同帶子就好鮮甜，鮑魚 咬落好脆口，而帶子更加係即開即食，鮮味到不得了！

食飽巡例就去白浜ｄ景點行吓，先去映月島，映完相再去白良浜。不愧為白之戀人沙灘，ｄ沙又白又滑，洛洛到唔舍得走，見開始天黑，係時候去酒店嘞！

呢頭讚完個 GPS，轉頭就出事，入咗酒店電話跟據指示好快就到目的地，但點解咁静咁民居 feel ？！好明顯被 GPS 老點咗！即刻打電話去酒店門問路，好彩接電話個職員識英文，教我哋酒店响梅樽溫泉酒店 200 M 左右。去到梅樽溫泉酒店附近都唔見酒店，咁啱又見到有途人，唯有再落車問路。我用有限嘅日文向兩個女仔問路，點知嗰兩個女仔用日文答我佢哋係中國人，唔知 呢間酒店响邊，我居然又好蠢咁用日文答佢哋我都係中國人，佢哋識刻望住我係咁笑，我先識得轉用國語同佢哋溝通，講完一輪都唔知酒店位置，同佢哋講 咗 bye bye 再上車，試吓再四圍兜吓揾吓，點知開車無耐枴個彎就見到酒店招牌，激死！

响酒店停車場泊好車，已經有酒店職員出嚟迎接同攞行李，不愧為高級酒店，庭園好大好靚，入到玄關職員示意我哋除鞋，原來全酒店都鋪曬 tatami，入到去 check in 咗職員就叫我哋摸揀浴衣，跟住就帶我哋上房。房間响四樓，面積好大，有私人風呂同露台，但由於已經天黑，跟本睇唔到外面環境，有 d 可惜，settle 好就去餐廳食晚餐。我哋揀咗食刺身，不過麻麻哋好食，食完抖陣就去浸溫泉，洛洛跟我浸，初初都驚佢唔肯落水，好彩同時都有其他小朋友一齊浸佢先肯浸。浸完 溫泉就出去食免費供應嘅雪條，再返房休息。