我哋今次冬天小旅行嘅就目的地係就韓國首爾。原本想揀去日本，但因為撞正日本公眾假期，日本機票好貴，所以揀咗都係會落雪嘅首爾。我哋今次撘HK Express 嘅下晝機，原本諗住去過咗海關先食晏，點知所有食店都人頭湧湧，所以最後都要幫襯機上嘅餐飲服務，d嘢食唔算好貴，都ok 好食，但分量就唔多，三儍食完都唔係好飽，食完嘢影睇下自備電影瞓下覺就到埗。
快手過咗海關拎埋行理就出去搭的工去酒店，我哋今次住嘅酒店係位於明洞嘅 PJ Hotel，係由舊酒店改裝，lobby 裝修好新，check in 咗就上房，我哋住嘅係 Premier Triple ，間房好大，一入去就係衣帽間同梳妝枱，經過好大嘅衛浴間之後就係三張單人床，近窗邊就係一個韓式小客廳。三儍就最開心，有咁大間房俾佢哋走嚟走去，又有個小客廳俾佢哋睇電視。我哋參觀完酒店房就出去食晚餐喇。
我哋搭酒店嘅免費 shuttle bus，好快就到咗東大門，今晚我哋食韓劇好多時都會出現嘅炸雞，我哋點咗炸雞同烤魷魚，炸雞係幾好食，不過烤魷魚原來係魷魚乾，雖然都幾香，但我哋真係無牙力去咬。食完唔係好飽又唔平嘅晚餐之後我哋就搭返shuttle bus 返酒店，响酒店附近嘅便利店買咗雪糕同聽朝嘅早餐就返酒店，食完都幾好食嘅雪糕就瞓覺啦。
（day 1 完）
