今日係洛洛生日，起身梳洗執好行李就check out ，再到餐廳食早餐。我哋噚日已經買定個糕仔俾洛洛吹，食完早餐拎個蛋糕出嚟佢已經開心到傻咗，點好蠟燭唱生日歌到吹蠟燭洛洛全程都表現得好興奮。食完蛋糕 我哋就去酒店附設嘅滑雪場玩雪兜，洛洛初都有d驚，但係玩咗一次之後就好開心，猛話好玩。我哋玩咗半個鐘就要走嘞，洛洛唔願走，不過無辦法啦，我哋趕住去 草津，唯有下次再玩過啦！
我哋又上車出發嘞，由輕井澤揸車去草津車程一個鐘左右，途經淺間山，淺間山係活山，早兩個月爆發過，而家仲有噴煙。我 哋架車一路上山，去到高原，可以好近距離視觀察呢個活火山，風景好靚，高原另一邊係群馬縣，從高空望過去都好靚，映完相上返車行咗一陣就去到一個公園，落 車俾洛洛行咗一陣玩吓雪又上番車，再直駛去草津。
由於係日本假期關係，草津勁多人，停車場 full 到不得了，我哋要泊到上山先有位，泊好車就沿住温泉街行去湯畑，一路行都好多嘢睇好多嘢買，我哋仲買咗好好味嘅串燒做 lunch ！一路行一路 feel 到有ｄ嘢由天飄落嚟，初初以為係塵，睇真ｄ原來係雪！雖然好好好細粒雪，而且好快就停咗，但由於無諗過會有雪落，所以都興奮咗一陣。
未落到湯畑就已經聞到好臭硫磺味，溫泉浸得多，咁大個女都係第一次見到溫泉源頭。ｄ好熱嘅溫泉水不斷咁湧出嚟，都幾得意。由於實在太多人，加上又硫磺味真係好臭，映吓相我哋就走嘞！
繼續開車去伊香保，越行就越鄉下，沿途風景都幾靚。車程比預定長，要差唔多2個鐘先到。伊香保响山上面，上山條路都幾窄同幾斜，好在姑丈手車幾好 啫！我哋今晚住溫泉酒店，check in 咗就上房嘞。間房比想象中更新淨，設備都好劑全，個 view 好正好舒服。襯仲早我哋出咗去行吓。伊香保溫泉街基本上係一條長樓梯，旁邊有好多舖頭同旅館，都幾靚幾特別，我哋一沿住樓睇向上行，行到上盡頭就係神社， 由於已經開始天黑，我哋唔敢亦費事行入上神社，取而代之係轉右行去河鹿橋，個天黑得好快，未行到河鹿橋個天都已經黑齊，街燈好疏落又暗，周圍人影都無隻， 加上有幾幢荒廢咗幾民居，周圍環境氣氛好陰深，俾人嘅感覺唔多舒服。我哋見勢色不對就折返酒店，返到去講返先知原來大家見到其中一幢荒廢咗嘅屋裹面晾咗多 衫同被單，但好似晾咗好耐無人收，全部都變得破破爛爛。c6 仲話屋主好似晾完衫出咗門之後就返唔到嚟咁..............。聽佢講完都個心都寒咗寒.............！
好彩已經返到酒店，而且有晚餐等緊我哋。我哋今晚响自已房食懷石料理，都 ok 好食啦。食飽係時候浸溫泉，我同洛洛浸，入到去沖完涼就浸內湯，浸熱咗個身諗住浸露天風呂，但點知揾嚟揾去都揾唔到，之前响酒店網頁明明見過有架？著返衫 諗住出去問人，一出去就見到 c6，原來男湯嗰邊都無。問番職員先知原來露天風呂响另外一邊，我哋就去咗浸。個溫泉都幾多人，ｄ水好滑，都幾舒服。浸完溫泉返房飲吓酒，睇吓電視就瞓 勒！
