今日我哋會租車自駕一日遊京都。食完簡單嘅早餐我哋就行過去酒店附近嘅Times租車公司攞車，辦好晒手續就出發喇。第一站去舞鶴港，千條路遠嚟到呢度係為咗食當造嘅松葉蟹，冬天正值松葉蟹嘅解禁期。响舞鶴嘅Toretore海鮮市場可以食到新鮮肥美嘅松葉蟹。經過二個半鐘車程就到目的地。
漁市場本身係個休息站，規模唔算大，只有幾間鮮魚店，店面放滿咗好多松葉蟹，有大有細，有冰鮮同新鮮嘅，除此之外仲有好多唔同種類嘅海鮮包括舞鶴特有嘅土蝦。我哋行咗一個圈就揀咗海鮮俾店家幫我哋燒。我哋揀咗一隻松葉蟹、海鮮拼盤、魷魚、魚鮫同土蝦，另外在响市場裏面嘅食店買咗飯同湯。坐低等左一陣間海鮮就送上，放到一枱都係。我哋先食咗松葉蟹同土蝦刺身，好鮮甜好好味，其他燒海鮮都火燒得啱啱好，一d都唔韌，配埋特製嘅醬汁好好食。雖然呢一餐唔平，但d嘢真係好好食，而且份量都好多，大家都食到好飽好滿足。食飽飽我哋無即時揸車走，响附近嘅便利店買雪糕食在喺海邊行一陣，原來魚市場隔離就係海軍基地，三傻見到d軍艦好開心，要求影埋相先走。
下一站係附近嘅天橋立，揸車去大概一個鐘頭左右就到。天橋立係日本三景其中一景，所以好值得一到。我哋去到纜車站泊好車就搭纜車到山頂嘅傘從公園，可惜今日天氣好差，上到山頂落起大雨嚟，唔可以好好地欣賞天橋立嘅風景，雨越落越大，我哋快快手手影幾張相就搭纜車返落去。有機會的話會再嚟呢度好好地欣賞下風景。
天開始黑，雨又越落越大，我哋最後決定返京都市。還咗車行咗陣街就去食晚飯，今晚都係去返噚日嗰間燒肉店食放題，食飽飽返酒店食埋士多啤梨浸完浴就瞓覺啦。
(Day 3 完）
