一路都想冬天去日本，俾三儍睇下落雪，又想去摘士多啤梨。咁啱就到哥哥學校假期，雖然知道見唔到落雪，而且只係去到4日，都唔理咁多買機票出發。
我哋今次坐Jet star，原本plan咗下畫8點45分飛，1點到埗就响機場酒店check in瞓夠先出機場玩，點知去到航空公司counter check in先知班機會delay到半夜1點半先起飛，6點先到埗，雖然航空公司都有送番每人60蚊餐卷做補償，不過就要响機場等多4個幾鐘先可以上機。上到機大家都已經好眼瞓，雖然個位唔係坐得好舒服，但都要瞓一陣。
瞓下醒下終於到咗關西機場，過咗海關就行去响機場嘅日航關西機場酒店 check in瞓一陣先出市區行街。我哋上到房打開門忍唔住"嘩"咗一聲，估唔到酒店upgrade 我哋去咗套房，間房好大好靚，仲有個無敵海景，三儍好興奮，响間房度四圍走，我哋食咗早餐就上床瞓覺，因為大家都已經好攰，而且間房真係好舒服，所以好快瞓哂，瞓醒沖個靚涼就要check out，雖然好唔得間房但都要出市中心行街啦。
我哋嘅目的地係梅田，撘JR 出去用咗一個鐘左右，去到梅田站先去大丸寄存行李，再去搵食。今餐我哋食牛肉飯，間舖响大阪站附近，但就搵咗好耐先搵到，去雖然已經2點幾，但都要排隊，終於到我哋啦，我哋同其他大部份客人一樣點咗牛扒飯定食，定食包咗清爽嘅蔬菜沙律，麵豉湯同主角-牛扒飯。牛扒煎好放上飯面，再淋上日式醬汁，好味！牛扒煎得啱啱好，鬆軟，牛味香濃，飯吸收咗牛肉汁同日式醬汁，啖啖都好好味，因為太肚餓兼好好味，所以好快已經食完我哋嘅午餐，就去行街街。今餐埋單唔駛4仟円就可以食到好味又滿足嘅牛肉飯啦。
跟住嘅節目就緊係去shopping啦，揀梅田行街係因為呢度有好多百貨公司，有大大小小唔同嘅商場，仲有大阪最大嘅Uniqlo，基本一日行唔哂，但就好集中，想行嘅牌子都有，我哋用咗2個幾鐘就買咗好多嘢，要買個大袋裝住。行到攰攰哋三儍開始唔耐煩，係時侯安排節目俾佢哋。
行梅田另外嘅原因係可以等三儍悶時同佢哋玩摩天輪。摩天輪响Hep Five 7樓，坐一次大概15分鐘，大人都係500円坐一次，小學生以下免費，哥哥話怕高所以唔坐，他即係我哋只係用咗一千円就可以坐摩天輪欣賞下大阪嘅夜景，順便休息下。
坐完摩天輪我就襯百貨公司未閂門繼續shopping，之後拎翻行李就撘半個鐘嘅JR去京都站，再轉地鐵去五条站，行2、3分鐘就到我哋之後3晚住嘅酒店。酒店係舊年先開，之前已經住過同一集團嘅其他分店，見呢間價錢幾合理就試下，果然無令我失望，雖然間房唔算好大，但設備好齊全好舒服，而且仲有大浴場可以浸下浴鬆一鬆。
Check in 放好行李就出去食晚餐，今晚响酒店附近嘅燒肉店食燒肉放題，呢間燒肉放題唔貴，我哋揀咗3000円可以點100款食品嘅set，其中包埋任飲無酒精飲品同甜品，點食物用電腦落單，方便快捷，我哋叫咗唔同款嘅肉同海鮮，仲叫咗d熟食，d食物好快送到到，熟食水準唔錯，d肉更加喜出望外，唔係用大量腌料腌住，反而只係用少量調味帶出肉嘅鮮味，用火燒到焦香，好味，食埋雪糕做甜品就飽哂。
埋單之後就行去酒店對面嘅24小時營業超市行下，再行埋便利店就翻酒店休息喇。
（day 1 完）
