由於噚日太攰，今朝大家都瞓晏咗，差唔多9點起身擦牙洗臉後就落樓下食早餐，早餐選擇同之前一樣咁多，除西式中式日式之外仲有即叫即整嘅炒蛋煎蛋奄列。食飽就上房換衫游水去。
有得玩水大少最開心；上年去沙巴二少玩水都玩得好開心，諗住佢一定鐘意，點知佢一見個泳池已經想調頭走，一落水就喊到鬼殺咁嘈，唯有嗲嗲響池邊陪佢。今次三少反而最淡定，一路響水泡度浸水，間中發出d表示好舒服嘅聲音。玩到差唔多到中午時份，我哋就返房沖涼同小睡一陣，避開猛烈嘅太陽。
抖到2點再出動，先去 Central World 嘅 Zen 食晏，Zen d嘢唔算平，平均一個 set 要差唔多100蚊港紙，不過就幾好味，我哋叫咗燒帶子、炸豬扒同蝦天婦羅，每個set都配麵鼓湯、前菜，刺身同白飯，分量都唔少。食飽再出發，下一站係 Siam Paragon。
去Siam Paragon唔係淨係行街嘅，上次已經去咗 Siam Ocean World，今次係去 Kidzania。其實 Kidzania 響日本已經開咗好多年，不過次次去日本d時間都唔夠用，所以都安排去玩過，今次趁曼谷分店新開，而且又話係最大嘅一間，所以一於試新嘢。到咗 Siam Paragon上5樓以為就到，點知兜咗個圈先知原來入口係先到4樓，穿過 Food Passage先會見到上5樓 Kidzania嘅專用扶手電梯。上到去大家已經嘩咗一聲，因為見到一隻飛機響度，嗱嗱聲買飛入場啦，職員會幫入場嘅人帶上手㧪作紀錄同防走失，連唔駛錢入場嘅二、三少都要帶。攪掂哂就入場玩啦！
入到去唔止小朋友開心，連大人都好興奮，因為d場景實在太迫真太靚喇，同一個小市鎭無分別，消防局、警局、醫院、工廠、食店⋯應有儘有，就算無得玩淨係身處呢個cute版城市都覺得好得意。
大少第一時間排隊做消防員，換好制服，就入去briefing，d職員見哥哥對泰文無反應即刻主動用英文講解，讚！briefing完係時候出動，原來仲有cute版消防車坐去＂火場＂，超過癮！去到火場大家協力灌救大火(真係用水救'火'架，配埋音效好迫真！）之後，再由消防車送番去消防局後解散，走之前會拎到今次工作嘅工錢。
下一站做急救科醫生，同樣著起醫生袍之後就briefing，病房嘅佈置同真嘅差唔多，哈！估唔到咁認真，連真實嘅醫療儀器都有，講解完一輪之後就坐cute版救護車出去救人嘞，患者係⋯被救護車撞倒嘅工作人員，真係超爆笑！！我哋雖然覺得好搞笑，但d小朋友就好認真咁參與救人工作，終於奇蹟地搶救成功，同樣由救護車送返醫院，領到工錢就解散。
之後大少仲扮演咗飛機司、牙醫、地盤工人、油站職員、科研人員、可樂廠職員同老麥職員，全部都相應嘅制服著，似模似樣，但因為做可樂廠職員同老麥職員真係會俾小朋友整支可樂同整漢堡飽拎走，所以唔只無工錢，仲要響之前賺到嘅錢拎番d先有得玩。
唔覺唔覺我哋玩咗4個半鐘，好彩二三少好乖，齋睇哥哥玩都無乜扭計，但因為大家都肚餓所以要走啦。走之前買咗d相，除咗隻䤥先走得。其實入場費都係佰零蚊一位，但係呢幾個鐘就好充實，我自己就覺得好低玩，今次玩咗唔夠1/3，下次一定會再嚟玩過！
因為已經夜費事周圍揾食，所以晚餐響food hall解決，我哋入咗其中一間比較多人嘅舖頭食泰國嘢，d嘢都ok，不過價錢唔算平，食飽已經好夜，係時候番酒店休息嘞！
(Day 2完）
