三儍襲北海道+東京 day 12 16/8/2018

今日我哋會離開北海道返東京，一早起身整理好行李就去酒店嘅餐廳食早餐。早餐選擇好多好豐富，味道都唔錯。食飽拎埋行李就去酒店樓下嘅內陸機counter check in，好方便。

我哋搭朝早9點半嘅機，11點左右就到咗羽田機場，拎埋行李就搭Monorail轉JR去酒店。我哋今次住目白嘅Richmond Hotel，酒店算幾近JR站，周圍都有便利店同食店，都幾好住。不過最唔放便嘅係目白唔係大站，去好多地方都要先去池袋轉車。我哋拎咗行李去酒店記存就出去午餐啦。

我哋先搭JR去有樂町，响車站附近搵餐廳食午餐。今餐食九州風和食，我哋叫咗鐵板牛脷同鐵板雞肉定食，d嘢都幾好食，而且價錢都算低食。食飽飽我哋就去玩喇。

我哋嘅目的地係警察博物館，由車站行過去大概十分鐘左右就到。三儍離遠見到有日本警察標誌嘅建築物已經好開心，行到過去見埋博物館門口嘅警車就更興奮。職員見到三儍咁興奮仲主動出嚟問我哋想唔想借制服嚟映相。填好資料卡三儍揀好款同size就可以坐上警察直升機同電單車上面映相。映完相換返衫我哋就上樓上繼續參觀。同香港嘅博物館好唔同，呢度嘅博物館充滿趣味，有得好似警察咁揸案，玩掃指紋，認鞋印認軚印同幫犯人併圖，又可以認識道路規則，除此之外仲有展示唔同年代嘅警察制服同裝備，又有d懸案嘅資料睇，無論大人定小朋友都玩得好開心。

我哋玩到人哋閉館先捨得走。離開博物館我哋响有樂町站附近行多陣街就去池袋食晚餐。我哋今晚去磯丸水產食，不過今次有d失望，食物選擇少咗好多，好彩我哋唔算好肚餓，食完我哋就返酒店休息。

我哋去 front desk 拎返行李就上房。我哋 book 嘅係三人房，但間房只係雙人房監硬加多張床，好迫好窄，開喼要响床上面開，反而衛浴間就好大，好彩張床好舒服，我哋聽朝要早起，所以就早d休息啦。

（day 12 完）

三儍襲北海道+東京 day 11 15/8/2018

噚晚好早瞓，所以今朝好早就起咗身。叫醒埋三儍我哋就去浸溫泉。呢間酒店本身响湖邊有個野湯，泉水亦响湖底湧出，個溫泉最特別嘅地方係泉水嘅水位會隨往湖水嘅水位高度而變化。由酒店行過去野湯要行一小段路，嗰度無沖身嘅地方，只有一個簡單嘅更衣室換衫。可能時間尚早，溫泉一個人都無，可以一個人對住個湖慢慢浸，到開始有其他住客嚟就返去大浴場浸多陣就去食早餐。

早餐選擇唔算好多，不都有自家製嘅麵包同廚師即場煎蛋同奄列，而且味道都好好，食飽飽我哋就响酒店嘅碼頭附近行咗陣，可惜天氣麻麻好大雨，如果唔係就睇到支芴湖嘅全景；雖然煙雨蒙蒙，但响碼頭映出嚟嘅相都好靚。映完相响房抖多陣我哋就check out 啦。

離開支芴湖，我哋就去揸車去辛新千歲市行 outlet。我哋先去新千歲 Rera Outlet，不過可惜好多舖頭都執咗，無乜好行，所以決定揸車去返札幌嘅三井 Outlet Park。去到已經中午，所以我哋先响 food court，食咗拉麵做午餐先再行街。好彩三井Outlet全室内，就算外息邊幾大雨都無乜問題我哋行到5點左右就離開返新千歲啦。

返到新千歲，我哋先去酒店check in 放底所有行李，再去還車，不過揸㗎車去還嗰陣嘥咗好多時間搵路。結果搭租車公司嘅 shuttle bus 返到機場已經7點半，好多舖頭都開始預備收舖，我哋行快兩部去到國內樓嘅 Royce' Chocolate World都趕得切仲未收舖，可以買到特製嘅朱古力麵包，响嗰度映多陣相行左一陣就係時間搵食。

部份食店都開始收舖，選擇唔多，最後我哋揀咗食成吉思汗燒烤，亦即係烤羊肉。本身我哋比較少食羊肉，因為怕羊羶味，不過呢度d羊嘅羊羶味唔太濃可以接受，食落都幾好食，原本只叫一盤肉都好快食哂所以再追加一盤，食飽飯我哋就返酒店啦。

由於聽朝早機，所以我哋今晚我哋响機場嘅Air Teminal Hotel，酒店走廊好闊，可以用行李推行李上房，需然房有d舊，但乾淨整齊，房都算大，開多一張床都仲有位走動，酒店包埋可以去千歲機場溫泉浸，不過因為要整埋行李，聽日又早機所以放棄。我哋pack 好行李就早d休息啦。

（day 11 完） 

三儍襲北海道+東京 day 10 14/8/2018

瞓醒覺梳洗後就去食早餐。早餐我哋又係食魚生飯，由酒店行去車站隔離嘅三角市場大概15分鐘，三角市場人頭湧湧，魚生飯店更加大排長龍，不過為咗美味嘅魚生飯唯有排埋一份。排咗大半個鐘終於有得食喇，我哋叫咗自訂魚生飯，魚生飯分量好多，魚生新鮮又甜，好好味。

食飽飽就行返去小樽運河，日頭嘅小樽運河又有唔同嘅感覺，雖然都好多遊客，不過都好容易都映到靚相。映完相我哋就行去行街，小樽好出名嘅係玻璃工藝，不過三儍興趣不大，又驚佢哋唔小心打爛嘢所以無同佢哋睇玻璃，反而最多時間行甜品店，買咗好多蛋糕甜品返香港慢慢食。行到有d攰我哋就去LeTao食新鮮出爐嘅芝士酥皮芝士撻，配埋美瑛牛奶，好滿足。

食完tea我哋離開小樽，揸車去支芴湖。由小樽去支芴湖大概個半鐘車程，不過由於天氣麻麻所以唔敢開得太快，去到目的地差唔多6點。我哋今晚住溫泉旅館丸駒，泊好車就check in，由職員帶我哋上房。我哋book 嘅係8疊大嘅山景房，點知開門嚇咗一跳，旅館upgrade咗我哋去特別室，間房勁大之外仲對住支芴湖，好舒服。三儍就最開心，响房裏面走嚟走去。我哋响房休息一陣就食晚餐。

今晚我哋响自己房食會席料理，由職員將晚餐一份份放响小几上而拎入嚟，將食物擺好位就離開，我哋可以舒舒服服無拘束下慢慢享受我哋嘅晚餐。今晚晚餐好豐富，賣相精緻，而且味度出乎預料地好食，份量亦多到差唔多食唔哂，就連兒童餐都好好食好吸引。

食完好好味嘅料理之後就去浸溫泉。不槐為秘湯協會嘅會員，呢度嘅溫泉水100%天然，d水好滑又夠熱，浸完成個人鬆哂。浸完溫泉返到房職員已經舖好哂床，三儍好興奮碌嚟碌去，玩咗陣大家都攰，加上食到飽飽又浸完溫泉，所以今晚我哋就好早休息喇。

(day 10 完）

三儍襲北海道+東京 day 9 13/8/2018

一朝早我哋就 check out,離開札幌去積丹。由札幌去積丹原本大概2鐘，不過天氣越嚟越差變得好大雨，兼且開始塞車，所以要3個鐘先到積丹。揸咁耐車嚟到呢度其實為咗好出名嘅赤海膽。去到食堂うしお已經滿坐，要等咗一陣先有得入坐。坐底我哋就叫嘢食，我哋叫咗赤海膽丼，蟹肉丼，三文魚子鮑魚刺生丼等，另外再叫咗响螺刺身同北寄貝刺身。海膽好甘甜好新鮮，完全無押味；鮑魚刺身又鮮又脆；海螺刺身同北寄貝刺身都好新鮮，總知所有嘢都好好味。呢餐雖然唔平，但絶對值得，而且咁靚咁新鮮嘅海膽真係要嚟到原產地先食到，所以揸幾個鐘頭車特登嚟呢度食都好值得。食完嘢我哋就去食堂後面嘅海邊行咗陣，就上車去神威岬。

上到神威岬好大雨，原本响車度諗住等到天氣好d先同三儍上去行下，不過天氣越等越差，唯有我自己上去映相就走，上面風景其實好靚，如果天氣好嘅一定仲靚，希望有機會可以响好天氣再嚟欣賞風景。

我哋係時候離開積丹去余市。原本安排咗去摘水果，不過天氣一路無好轉，而目好塞車，預計去到農園到差唔到閂門，所以臨時改去余市蒸餾所。去到其實都無乜時間行，只係可以去試酒。呢度提供咗三種酒試，其中二種係威士忌另外一種係蘋果酒，另外仲有提供冰同梳打水可以溝嚟飲。唔飲酒嘅就可以飲免費供應果汁同茶。三儍唔飲得酒，不過就對嗰三杯酒好有興趣，俾佢哋聞下就當飲咗。試完酒去土產店買咗d酒就走喇。跟住我哋就去隔離嘅余市宇宙記念館，點知今日休館，响門口映完相就揸車離開余市去小樽。

去到小樽已經係晚餐時間，所以決定先晚餐再返酒店。我哋今晚去若雞時代食炸雞。去到總店好好彩有位泊車，等咗陣就有得食喇。我哋叫咗炸雞頸、雞皮、雞件、雞翼同呢度嘅名物炸半邊雞。d炸雞好好味，皮脆肉嫩兼有肉汁，雖然大家都唔係好肚餓，但因為d嘢太好味所以好快清哂。

食飽飽我哋就去酒店check in。今晚我哋住ホテル・トリフィート小樽運河，呢間酒店係新開，所以可以用比較平嘅價錢住到。我哋住嘅係雙人房，間房好大好舒服；酒店地點好方便，行去小樽運河都唔駛10分鐘，我哋放好行李就出去小樽運河附近行下。夜晚嘅小樽運河响燈光配合下好靚好溫柔，天氣涼涼哋响河邊散步好舒服。散完步去便利店買雪糕做宵夜，再返酒店嘅大浴場舒舒服服浸過浴就休息喇。

（day 9 完）