哥哥慶生兼細佬第一次坐飛機遊曼谷 day4 20/3/2012

放假去玩嘅時間過得真係快，今日我哋就要返香港啦，由於係晏晝機，要早d出機場，所以我哋都無乜安排行程，整係響酒店游下水，響附近行下就算。

起身梳洗後就去食早餐，跟住就爭取時間快快手手返房換泳衣落去游水。細佬今日扭眼瞓，所以落咗水無耐就扭計要上返水，好彩哥哥好合作，玩多一陣都肯返房沖涼換衫。

我哋整理好d行李就出去作最後衝刺，沿途都好曬好熱，好彩兩位少爺都無乜投訴。我就去Central World幫朋友買嘢，而爹爹就帶兩個細嘅去Big C 行住等我。我快快手買完嘢就去Big C join佢哋，再買咗d日用品同零食，pack埋盒就返酒店啦。

返到酒店我哋執好哂嘢就check out，原先諗住響酒店食埋午餐先去機場，不過酒店d嘢貴到無朋友，一個main dish要成7、8十蚊港紙，所以決定出到機場先再食。多咗出嚟嘅時間就響lobby影下相。

等到1點，我哋預先約定嘅的士司機準時到達，拿拿聲搬d行李上車就出發去機場，出機場嘅路有d塞，不過都係響預算時間內到達機場。我哋第一時間去check in，不過條人龍唔短，而且郁得好慢，終於我哋check in完可以食午餐啦，但係離登機時間得45分鐘，又要過海關又要check行李，d時間好似唔係好夠，由於大家都好肚餓，唔理啦食飽先算！我哋好似走難咁走落去離境大堂下一層嘅S＆P，用最快嘅速度點好嘢食，等咗寶貴既20分鐘之後再用5分鐘食完餐飯，其實d嘢都幾好味，不過可惜無時間慢慢食。

醫飽個肚就飛奔去過海關，好彩我哋帶住小朋友，有得優先俾我哋過關。過咗關再跑到去閘口預備上機。天呀！估唔到我哋行錯路，白白兜咗個大圈，行咗姲耐先去到登機閘口。好彩係咁趕嘅情況下居然無遲到，去到閘上仲有時間映張相上機，完滿結束今次旅程。

哥哥慶生兼細佬第一次坐飛機遊曼谷 day3 19/3/2012

今日好多節目，所以我哋好早就起咗身，食咗早餐就先去遊個早水。哥哥依然好興奮，細佬亦愛上咗游水，一同佢換泳衣就開心都傻咗，係咁撐手撐腳。

嚮游池玩夠，我哋就出發啦，先去Sima Square食午餐，由於無乜主意，求其去咗Fuji食壽司，食完唔多好味嘅壽司先醒起我哋應該去樓上好味d嘅 Sen 食，真失敗！

吃飽我哋就去我哋今個trip嘅重點節目-Siam Ocean World啦。其實嚟過咁多次曼谷都無諗過嚟呢到玩，主要原因係呢到嘅入場券太貴，不過今次我做足功課，響網上搵到個agent，已經用平好多嘅價錢買定飛。去到啱啱有歌舞表演，原本令好似對我哋嘅安排無乜興趣嘅哥哥好興奮，同d公仔影完相就催住入場。

Siam Ocean World其實都幾多嘢睇，至少好過去海浪公園同d自由行迫，哥哥睇到好開心，估唔到連細佬都睇到眼定定，我哋行咗個半鐘就行完。再去隔離睇埋4D電影，4D電影我就覺得麻麻，因為響套電影途中會有d氣噴出嚟營造氣氛，不過d氣陣味都幾迫臭，一路睇就一路營住聞完d氣會嘢病。

玩到攰哥哥要借用細佬既bb車小睡片刻，我哋就成機行街shopping。不過曼谷d嘢真係越嚟越貴，所以都係無乜收獲，反而響 Siam Paragon嘅超級市場買到唔少零食。行到咁上下哥哥就醒咗，所以順手俾佢揀個生日蛋糕今晚切，買完蛋糕又聞到好香嘅炸魚蛋味道，就買咗一盒試試，雖然唔平（100bat），但係估唔到又幾好味，食完再買多一盒返香港先。

見d cash 都駛得7788，又應承咗幫人去買嘢，我哋就去咗Amari Plaza 嘅林真香唱錢兼買手信，攪掂返酒店洗個面換件衫影下相，再出去食晚飯。

今晚去我哋最鍾意嘅 Zarrotii 食意大利嘢，booking個陣已經講明會帶兩個小朋友，所以佢哋特登安排我哋張枱近門口並且去到已經講定如果小朋友嘈要我哋帶小朋友出去餐廳。由於呢間都算係高級餐廳，所以佢哋嘅做法都無可口非。我哋今晚點咗小紅莓汁鵝肝伴沙律，Parma Ham，燒海鮮拼盤同開咗支酒，d嘢好好味，不過細佬今晚唔多合作，無啦啦扭計，所以我同爹爹要輪流抱出抱入，食都咁上下就無心機，連甜品都放棄就埋單走人。埋單要4千幾bat，折合要千一蚊，貴就貴，不過以咁嘅價錢響香港就食唔到咁嘅質素嘅食物。

返到酒店沖好涼就同哥哥切蛋糕，其實哥哥聽日先係正日生日，不過聽日我哋就要返香港，無乜時間同哥哥切蛋糕，所以就今晚切，我哋食咗少少唔係咁好味嘅蛋糕就休息啦。

（day 3 完）