三儍襲北海道+東京 day 8 12/8/2018

嚟到札幌一定要去魚市場食魚生飯做早餐。我哋瞓醒覺就出揸車去場外市場，泊好車行咗個圈決定去北のグルメ亭食嘢，我哋叫咗什赤蝦雜錦貝飯，三儍就叫咗蟹肉蟹膏飯同蟹肉三文魚子飯，另外再叫咗一份一夜干。赤蝦雜錦貝飯有2隻好大嘅赤蝦之外，仲有螺片、帶子同北寄貝刺生，全部都好鮮甜彈牙，三儍嘅蟹肉飯同一夜干都好好味，食完個咁豐富嘅早餐再响魚魚市場行都陣，就去下一個景點啦。

我哋跟住就去白之戀人工場，今日係星期日，所以工場好人，連入停車場都要排隊。全個工場都係以西式建築物組成，中間有好靚嘅西式庭園，我哋响工場行咗一圈，就同三儍參加整餅體驗，俾咗錢職員就會俾圍裙同廚司帽，著起似模似樣，洗乾淨手就由職員帶我哋去整餅，由於我哋時間唔多，所以只揀咗用朱古力裝飾曲奇餅，雖然好似好簡單，但對三儍嚟講都係有d困難。整好咗就用職員提供嘅盒裝起拎走。整完餅之後就去庭園行下映下相，再去 cafe 食呢度好出名嘅甜雖品。呢度嘅甜品好有驚喜，甜度恰到好處，好好味。食完就去下一站。

下一站就係羊之丘展望台。雖雖然响白之戀人工場附近，但唔知點解兜咗好耐先到。呢度入場費唔平，大人再520円，小朋友要300円，泊好車我哋就周圍行下，呢度唔係好大，最矚目嘅係克拉克博士嘅銅像，不過就超多人排緊隊影相。呢度有一大片草地用嚟放牧，我哋嚟到就咁啱見到d綿羊喺度食緊草。呢度好快就影完相行完，我哋就返返去市中心啦。

之後我哋繼續響市中心行下。先去北海道大學，泊返架車返酒店附近再行去大通公園同市政廳睇吓影吓相，再行多陣街就去食晚飯。

今晚我哋响札幌站附近嘅奥芝商店食咖哩湯。去到已經排緊長龍，不過以本地人居多，我哋排緊隊期間有其他陸續嚟排隊，但係點員已經响我哋之後截龍，換言之我哋好好彩成為今晚最後一批客人。我哋叫咗三個套餐，分別係燒雞脾咖喱湯、海鮮咖喱湯同漢堡牛咖喱湯。咖喱湯好香，除咗咖喱味仲有好濃嘅蝦味。浸住咖喱湯嘅嘅肉類海鮮吸收咗湯汁好鮮味，更正嘅係有好多新鮮嘅蔬菜响湯裏面，唔單止無俾咖哩蓋過佢哋嘅味度，相反更被帶出蔬菜嘅甜味，好好食。雖然個套餐份量唔細，但因為實在太好味，好快就俾我哋食哂。食飽飽我哋便利店買埋甜品就返酒店休息啦。

（day 8 完）

三儍襲北海道+東京 day 7 11/8/2018

今日我哋上晝會去帶廣未去嘅景點，下晝會落返札幌。起身食完早餐就check out。第一站先去向日葵迷宮，呢個景點係見到宣傳單張而額外加插。我哋揸車到咗一段路先去到目的地，不過去到好失望, 大部分向日葵都未開花，所以我哋只係影吓相，俾三傻玩下撈波仔就走喇。

跟住我哋就去附近嘅六花亭之森。入去六花亭嘅森林係要比入場費，我哋唔係太多時間可以慢慢行，所以只係去 cafe 食下野坐低欣賞下風景。我哋叫咗奶油提子批、芝士蛋糕、除咗奶油提子批比較甜，其他嘢都好好味，尤其黑豆大福，甜甜哋咸咸哋又煙韌，一試難忘。食完嘢去專賣店買手信零食就離開啦。

由帶廣去札幌會途經夕張，中途會休息食午餐，夕張最出名係蜜瓜，所以安排咗去夕張農協銘產中心食buffet，大人2仟600円，小學生半價。呢度嘅主食都係一般嘅炸雞、腸仔、意粉、冷麵等，而主角就係夕張密瓜，d蜜瓜又香又蜜又甜，咬落去d汁係咁流出嚟，呢度供應嘅雖然唔係最頂級嘅蜜瓜，但都以經好好味。一番努力之下我哋食咗2個半蜜瓜，捧住個肚埋單走啦。

食飽飽我哋就去附近嘅滝之上公園散步。公園响河邊，周圍都綠油油，好清幽好舒服，沿路行仲可以睇到上游嘅瀑布，我哋慢慢行咗一個圈就上車走喇。

由夕張揸車返到去札幌要個半鐘。札幌天氣麻麻落住雨，我哋先去酒店check in。今明兩晚我哋住 Richmond Hotel 大通店。由於酒店本身無停車場，我哋先放低行李响酒店，再將車泊响附近嘅契約停車場先再返嚟check in。我哋住嘅係三人房，間房好大，放咗三張床都仲有好多位走動，Richmond 嘅特有嘅係每間房都備有一部手提電話俾住客打本地電話同上網用，不過我哋驚唔見所以無搶拎嚟用。放好行李我哋就落樓，原來酒店另一個出入口就响狸小路，真係超方便。

我哋去附近嘅百貨公司行咗陣就預備食晚餐。今晚我哋就去大通公園嘅 Beer Garden 食晚餐，叫咗一個併盤，薯條，炸雞軟骨同炸蝦，當然唔少得冰凍啤酒同汽水，雖然好大雨，但响帳篷裏面氣氛好熱鬧。

食完嘢我哋再返去狸小路行多一陣。由於頭先無澱粉質落過肚，所以決定去一幻食蝦拉麵做宵夜。去到已經見到好多人排緊隊，不過為咗食好嘢所以都唯有排埋一份，好彩三儍尚算有耐性，排咗一個鐘都無乜點嘈。終於有得食啦。拉麵好彈牙，蝦湯香甜，好好味 ，食飽飽就返酒店休息喇。

（day 7 完）

三儍襲北海道+東京 day 6 10/8/2018

瞓醒覺㧧洗後就落樓食早餐，Comfort Hotel 早餐間間都差唔多，算幾好食又夠飽肚。食飽就出去玩喇。

第一站我哋先去幸福駅，呢度曾經係鐵路廣尾線其中一個站，但因為經營困難而被廢，不過站名好有意思而成為一個著名景點。由酒店揸車過去大概半個鐘就到，車站本身唔係好大，但就貼滿哂車票式樣嘅名信片，車站後面有一個幸福鐘，另外仲保留咗一部份嘅路軌同兩節車廂。今日天氣好過噚日少少，不過都係天陰陰，但可能因為咁所以唔係太多遊客，可以慢慢行周圍映下相，之後仲好似其他遊客咁買咗張名信片寫底願望貼上車站祈褔。

下一站就去附近嘅花畑牧場。帶廣十勝地區好出名出牛奶，花畑牧場嘅奶製品更攞過唔少獎。呢度除咗可以睇到點製作芝士之外，仲有個小型觀光牧場可以免費參觀，裏面養咗好多動物好似線羊、山羊、馬、豬等，連草泥馬都有。三儍見到咁多動物超開心。

睇完動物係時候到我哋食午餐。花畑牧場附設餐廳，响呢度可以食到呢度自家製嘅芝士烹調嘅料理。我哋叫咗 pizza，意粉，肉腸併盤等。食物預備好出去拎時先即時加芝士，睇住d芝士溶落d嘢食到口水真係流哂。d嘢好好食，雖然有d漏，但三儍都食清哂。食飽去牧場嘅土產店行咗陣，買咗一堆零食送禮自用就走啦。

跟住我哋就去上士幌町航空公園參觀熱氣球比賽。比賽一年一度，咁啱規劃行程嗰陣發現就係响我哋逗留响帶廣期間進行所以加埋入行程裏面，本身比賽分上下晝兩個section，由花畑牧場去比賽場地大概1個鐘車程，應該趕得切下晝section，不過開車去到市中心就開始塞車，足足用咗差唔多一陪時間先到，去到泊好車個比賽已經開始咗。其實比賽規則係點我哋唔係好清楚，淨係見到公園中間劃咗個好大嘅十字，d熱氣球飄到附近就响高空拋條紙條落嚟。我哋從來未見過熱氣球，今次一次過見到咁多熱氣球响天度飄真係好得意，不過可惜天氣麻麻，雲層好厚，如果唔係影相出嚟會更加靚。三儍睇到唔捨得走，不過天氣突然轉壞落起大雨嚟，所以唔走唔得，原本打算去埋比賽之後嘅花火祭，但天氣真係好差所以決定放棄。

沿途返市區見到有燒肉店就決定今晚食燒肉放題，不過呢餐都幾麻麻，又貴又唔太好食。返到酒店我哋就食今日買嘅蛋糕做甜品，超好味，食完就休息喇。

（day 6 完）

三儍襲北海道+東京 day 5 9/8/2018

一早起身先去溫一轉溫泉，可能太早嘅關係，溫泉一個人都無，可以獨霸一個人慢慢浸。浸完就哋就去食早餐，跟住拎埋行李就 check out 啦。

由起身嗰刻就已經知道今日全日都會好大雨，原本安排今日會去埋富良野其他農場都要取消，好彩主要要去嘅景點都去咗，不至太失望。我哋先去至一間大型超市，本身諗住只係買雨具，但間超市實在太大，好多嘢睇，唔覺唔覺行咗差唔多2個鐘。行完就去隔離嘅雪糕店食雪糕。

雪糕最特別係用半個蜜瓜切開，中間加上牛奶軟雪糕，係呢度嘅名物，我諗無乜人嚟富良野唔會食。不過三儍第一次見到咁嘅雪糕，所以覺得好得意，我哋買咗2份一齊食，三儍食得好開心，連果肉同剩低嘅果汁都唔放過，清哂。

食完雪糕係時候出發去帶廣，由富良野揸車去帶廣要大概2個半鐘，到埗先去酒店check in，我哋今住Comfort Hotel，上房放低行李就出去食飯。午餐梗係食呢度好出名嘅豚肉丼。10年前食過一次真係懷念到而家，所以今次都係去返上次食過嘅「元祖 豚丼のぱんちょう」，由酒店行過去只係幾分鐘路程。雖然已經過咗午餐時間，但都要排隊，好彩等咗一陣就有得入座。我哋一人叫咗一碗炭燒豚肉飯同麵鼓湯，飲完湯就輪到主角上場。豚用用炭火燒，燒得啱啱好，有焦香但又唔會太乾，咬落仲好鬆軟多汁，配埋燒汁真係無得頂。店主係一位老婆婆，見到三儍食好快咁食完碗飯好開心，過嚟同我哋傾計，仲一人送咗一份文具俾三儍，好窩心。

由於天氣麻麻，所以只可以响室內活動，亦即係行街買衫。行到咁上下就去食晚飯。我哋今晚食燒海鮮，我哋叫咗海鮮燒烤併盤、海鮮炒飯、魷魚炒麵、味噌蟹膏、炸白蝦、炸魷魚鬚、生蠔等，另外大人點咗飲放題，待應姐姐好好人請三儍飲汽水。呢度d海鮮好新鮮好大隻，其他料理d好好味，飲飽食醉都係一萬円，超值。食飽我哋就返酒店休息喇。

（day 5 完）

三儍襲北海道+東京 day 4 8/8/2018

酒店好舒服，一覺瞓醒我哋就去酒店餐廳食早餐。早餐選擇好多，種類好豐富，日式西式都有，麵包係自家制，連麵鼓湯都有兩種，仲有個 counter 放咗爆谷俾住客拎走食。我哋食完早餐就出去玩喇。

我哋今日全日都响富良野玩。趁仲早我哋先去富田農場，去到唔算太多人。未入到園已經聞到陣陣花香，人入到佢更加見到一大片薰衣草田，雖然薫衣草花期差唔多完，不過呢度種咗唔同品種嘅嘅薰衣草，所以8月嚟到都仲見到好靚嘅薰衣草花田。三儍見到咁靚嘅風景都忍唔住係咁叫我哋映相。除咗薰衣草之外，富田農場仲有種咗好多唔同嘅花，映相出嚟好靚。睇完花我哋就响農場嘅專賣店shopping，再食埋好香好好味嘅薰衣草雪糕就離開喇。

下一站我哋去四季彩之丘，途經休息站停車抖抖，見到有可以當水果食嘅白色栗米就買咗嚟試，果然又清甜又多汁，好好味。食完栗米就揸車到四季彩之丘，泊好車行入去已經覺得唔對路，周圍都人，入到去直程多人過旺角，加埋拉住遊覽車嘅拖拉機不停出出入入，沙塵滾滾兼危險，映咗幾張相頂唔順就走喇。

失望而回，漫無目的周圍兜見附近係新榮之丘就去睇下，點知好驚喜，呢度有一大片開得好靚嘅太陽花田，配合埋周圍嘅風景，好輕易就映到好靚嘅相，呢度遊客唔多，想點映都得。我哋映完相，欣賞完咁靚嘅風景就離開啦。

雖然已經過咗食飯時間，但我哋仲未食午餐，好彩之前食咗雪糕同粟米可以頂一陣，不過係時候要搵嘢食。返富良野途中一路都無餐廳啱食，直至返到富良野市中心先有心水餐廳，但返到已經4點，唯有當提早食晚餐。我哋今晚去福壽司，每人叫咗一個丼飯之外仲叫咗雞肉串燒。我哋叫咗嘅海鮮刺身丼d海鮮勁鮮甜，三儍叫嘅天婦羅丼飯同親子丼都好好味，最驚喜嘅係雞肉串燒，燒得好香，但雞肉仲好嫩好多汁。

好滿足食飽飽仲早，我哋就酒店Fount Desk 買咗飼料，再去酒店附設嘅小農舍餵綿羊，再去附近Prince Hotel 嘅精靈之森行下映下相，跟住就返酒店浸溫泉休息喇。

（day 4）