雪國漫遊 Day 8 2010-01-16

瞓醒一覺梳洗後先去浸陣溫泉，再去食早餐。早餐好豐富，有青森蘋果汁任飲，食完早餐仲可以攞個青森蘋果走！食完早餐返房執好行李就 check out喇。職員幫我哋搬咗行李上車，就响酒店門口同我哋揮手送別，直至我哋駕車駛離佢哋嘅視線。真係好佩服佢哋認真同殷勤嘅待客態度，只係著住件薄薄嘅恤衫冒住風雪嚟送別客人，我諗淨係日本人先做到。

離開青森縣，我哋又番去秋田縣，下一個目的地係角館， 途經驛站抖吓行吓又起行，差唔多要成4個鐘先到。 我哋先去食呢度好出名嘅佐騰養助食稻亭烏冬，點知去錯咗販賣店， 唯有買咗d乾烏冬走，再出去求期一間烏冬店食晏。

角館除咗稻亭烏冬出名外，比內地雞都好出名， 所以我哋除咗烏冬外，仲食咗親子丼同雞串燒，都ok好食啦， 食完就出去行吓影相啦。

出面大雪紛飛，襯埋又長又直嘅街道同古色古香嘅日式建築物， 好有風味。原本諗住參觀武士之家，但驚洛洛會嘈住晒， 所以轉咗去參觀醬油廠，行咗陣就離開角館，出發去秋田嘞。

秋田同角館只隔半個鐘左右嘅車程，好快就到， 到埗先去酒店check in，今晚住 Comfort Hotel上房放好行李就出去。先去附近嘅百貨公司行咗陣， 再去食晚飯。晚餐晌附近餐廳解決，餐廳食日式fusion菜， 餐廳裝修幾靚，d嘢都幾好食，不過都幾貴，食完就番酒店休息喇。