朝早起身梳洗之後就去食個豐富嘅早餐再出發去京都站攞車。我哋租咗㗎細車day trip用，12小時連car set 6仟幾円，平過撘車。搞掂咗租車手續坐定定就出發喇，我哋租車嘅主要原因係因為要去摘士多啤梨，而士多啤梨園又响山卡啦嘅地方，所以揀租車去。關西好多士多啤梨園都係預約制，出發前已send咗幾個email去唔同嘅果園預約，但只有一間回覆，所以雖然呢間果園遠d又貴d，都要去呢間。
經過個半鐘嘅車程，終於嚟到位於大阪岸和田市嘅士多啤梨園。泊好車就入去登記，我哋揀咗¥1800摘30分鐘，原來除咗摘士多啤梨之外送咗一人一件蛋糕，仲包埋雪糕同飲品任飲。俾咗錢嬸嬸就帶我哋去溫室，教咗我哋點摘就離開，到我哋自己開始摘。d士多啤梨好靚，又紅又大粒，二三少見到d士多啤梨好興奮，隨手就摘，教咗一輪終於識向熟咗嘅士多啤梨埋手，用嬸嬸教嘅手勢嚟摘。好快已經摘咗好多士多啤梨，係時候坐底食嘢，d士多啤梨好香甜多汁，好味，食埋雪糕飲下茶好快半個鐘就完啦，執拾好d垃圾就要走啦。
下一站就去行outlet。outlet唔駛半個鐘車程就到，泊好車就開始shopping掃貨，今日係星期六，所以outlet裏面除咗遊客仲有好多本地人。原以為無乜嘢會買到，就咁行下算數，點知最後都行咗3個鐘，買咗好多嘢，其中仲買到我之前睇中咗但無買到嘅披肩同褸，價錢仲平咗一半。滿載而歸之後就要醫肚啦，我哋今餐去一蘭食拉麵，一蘭買嘢食嘅方法對二三少嚟講都幾新奇，食完拉麵就揸車返京都還車，再响京都站附近行下街，就番酒店附近食晚餐。
今晚去居酒屋食，雖然唔平，但d嘢好好味，食到飽飽就番酒店浸浴，執好行李就瞓覺啦。
（day 3 完）
