今日我哋會返香港喇，一早起身食完早餐就去目白站附近散下步，跟住就返酒店check out，响酒店寄存行李之後就去池袋行街作最後衝刺。午餐就去返噚晚食唔到嘅美登利迴轉壽司。我哋未夠12點去到餐廳已經要開始排隊，不過好彩條龍唔算好長，排咗20分鐘左右就已經有得入坐。我哋照舊叫咗好多款壽司好似蟹、蝦、帶子、海膽等等，全部都好新鮮好好味，食到個個都捧住個肚。呢餐好低，埋單唔駛8仟円。
食飽飽我哋就返酒店拎埋行李出機場。去到機場見仲有時間同少少現金，我哋再食埋麥當勞就上機返香港啦。
2019年1月7日星期一
2019年1月3日星期四
三儍襲北海道+東京 day 14 18/8/2018
我哋响酒店食完早餐就出去玩。今日朝早我哋會去宇宙博物館TeNQ，搭JR轉Metro到後樂園站見到東京巨蛋之後再行一段路就到博物館所在嘅黃色Building，入場費大人¥1800，小朋友¥1200。俾完錢要等一陣先可以入場，原來係一入場就會先去睇呢度最出名嘅4k影片，所有參觀者都會圍住個好大嘅圓形劇場，睇完好精彩有關太陽系同地球影片之後先正式入場玩。裏面分咗9個唔同嘅展區，除咗有關宇宙探索同知識之外，仲有一個小王子嘅小型展區。所有展區都有好多同參觀者互動嘅小遊戲，予學習於遊戲，三儍學唔到嘢就唔知，但就絶對玩得好開心。玩到大家都有d肚餓我哋行埋記念品店就離開去食午餐啦。
我哋今日午餐就係去錦系町食鯛魚湯麵，雖然已經差唔多過咗午飯時間，但依然有條長龍，我哋排咗半個鐘終於有得入座。麵店以自助形式落單，我哋先去售票機買咗飛，入座時就將張飛交俾店員，等咗一陣就有麵送上，不過唔知係咪餓得制眼花，我哋想食拉麵但就㩒錯咗沾麵，雖然都係鯛魚湯底，但個湯就濃好多，食落好黏口，雖然好好味，但我哋就最怕呢種痴笠笠嘅感覺，所以食咗一大半就放棄，希望下次有機會再嚟食過佢嘅拉麵啦。
食飽飽跟住嘅節目就係行街街，我哋先去原宿行咗一陣，之後再轉戰池袋，行到d舖頭收檔我哋先去食晚餐。今晚係呢個trip最後一晚，原本想食壽司，但响西武嘅地下行咗好耐都搵電梯上去食店樓層，最後決定放棄，去車站附近食燒肉放題。雖然間燒肉店通風麻麻煙霧瀰漫，但勝在用炭火燒烤另有一番風味，而且d肉都幾靚幾新鮮，店員仲好好人請三儍飲汽水。飲飽食醉我哋就返酒店執行李休息啦。
（day 14 完）
訂閱：
文章 (Atom)