曼谷快閃遊 day 3 12-07-2010

短短3日既旅程今日就完啦，瞓醒先食個豐富早餐，再去泳水池游個早水。游完水 返房沖涼就出去按摩。嚟到泰國唔按摩好似差咁d嘢咁，所以噚日已經book咗今日去按摩，不過唯一問題係洛洛晌我哋按摩期間做d乜，又驚佢會嘈住人哋，所 以我哋唯有一早去按摩，又有心理預備萬一洛洛唔合作嘈住人就要帶佢走。 去到按摩店，職員帶咗我哋入房，換好衫就開始按摩，可能職員知道我哋帶埋小朋友嚟，預先準備咗多個枕頭同被舖比洛洛，等洛洛可以晌我哋側邊瞓覺，而由於之 前我哋已經同洛洛講定按摩店既規矩， 所以佢都好合作咁安安靜靜，最後仲瞓埋覺添。我哋按咗兩個鐘，洛洛就瞓到我哋差唔多完先醒，醒咗無出聲，不過好有興趣咁睇住我哋按摩，搞到幫我哋按摩嗰兩 個泰姐都忍唔住笑！

舒舒服服咁嘆咗兩個鐘，係時候返酒店執好行李check out 啦，check out 咗就搭的士出機場，係機場食埋lunch就搭飛機返香港啦！

（全文完）

曼谷快閃遊 day 2 11-07-2010

今日一早起咗身，梳洗後就去食早餐。早餐自助形式，選擇都幾多，而蛋類奄列就即叫即整。慢慢嘆完早餐之後就上房換衫去游水，酒店泳池嚮曼谷嘅酒店嚟 講算係好大，不過泳池長期晒唔到太陽，d水比較清涼。 由於我哋太早， 泳池無乜人，同洛洛玩咗一陣水，再去隔離嘅兒童遊樂場玩。洛洛玩到唔捨得走，但係我哋要返房沖涼換衫出去喇！

出 門口前先去 front desk 請職員幫我哋訂檯今晚食飯，再搭BTS 去 Siam。第一站先去 Siam Paragon行街街，佢哋d嘢都唔平，所以行咗一陣就轉戰超級市場。超級市場好明顯啱我哋行好多，d 嘢有d仲平過 Lotus，所以我哋買都成架shopping cart 都滿咗。比完錢就將買咗既嘢寄存晌佢哋幾 customers service counter， 再去行 Siam Discover 同 Siam Center。

Siam Discover 正晌度大裝修，沙塵滾滾，行咗 Loft 同 Boots，無乜收獲走行返 Siam Center。Siam Center 好多舖頭都做緊減價， 不過淨係買咗對鞋，對鞋都幾靚，個款都幾 in， 而且唔駛2百蚊，低！！

一輪 shopping 運動後又肚餓，結果最後又去返 Greyhound Cafe 食 lunch。我哋點咗3款麵食，2碟單骨雞翼同1個帶子沙律，d嘢好好味，價錢又合理。

曼谷快閃遊 day 1 10-07-2010

啱啱去完日本，見有3日假，心思思想去啲可以hea吓嘅地方同老公慶祝生日。泰國局勢都算穩定，CX Holiday又做緊pomotion， 咁就促成咗今次曼谷快閃遊。

一早去到機場，check in完就去食早餐，可能啱啱開始放暑假，機場人山人海。食完早餐就預備上機喇。今次我哋撘CX， 一如以往，CX啲嘢都係咁難食，不過佢哋送比洛洛嘅gift set就幾精美，洛洛簡直愛不釋手。兩個幾鐘嘅機程好快完，話咁快就到咗曼谷喇！

過咗海關攞埋行李就出去搭的士去酒店，300bat左右（包 toll way)就去到酒店，又快又舒服。今次我哋住既 Four Season Bangkok，其實之前都住過兩次，但係可能暴亂令到曼谷既旅客少咗好多， 佢哋既服務比之前更殷勤，Check in 咗就由職員帶我哋上房。房間好大，設計豪華，連全套浴室用品都係 L'occitane，我哋休息咗一陣，有職員送咗一碟糖果小食嚟比洛洛，氹到洛洛好開心。坐多一陣又有職員嚟加多張床被洛洛瞓，雖然加多張床，但係間房 仍然好寬落。

休 息完就開始肚餓，我哋決定出去揾食加行街。第一站係Chilom Central Grayhound Cafe， 老公念念不忘佢哋既單骨雞翼，所以指明要晌度食。我哋點咗3個意粉，1客單骨雞翼同1份帶子沙律，加埋飲品都係1千bat左右，d嘢又平又好味。食完飯就 晌 Central行街街。雖然話 Central 做緊減價，但係 d 嘢一 d 都唔平，我都只係買咗小小內衣，睇中咗對 Vivinne Westwood x Melissa既膠鞋，不比我上年買貴好多，所以無買到。嚟曼谷之前知道 Istean 啱啱開番，就去 Istean行下。

Istean d 嘢其實都幾老餅，不過樓上既紀伊國書屋就做緊大減價，重比我買到個連 Lesportsac 袋仔嘅雜誌，Lesportsac個袋同晌 shop買既差唔多，但係響哩到都係賣100蚊左右，係我哩個trip最鐘意既戰利品。

行 完街反酒店放低d嘢就再出去行 supermarket，以前就有又方便又好行既 Big C，但係 Big C 燒咗就唯有去遠d既 Tesco Lotus，我哋搭 BTS 到 On Nut，一出站就見到 Lotus，都尚算方便，不過就無 Big C 咁好行。我哋買咗d日用品同零食就返酒店啦！

嚮酒店休息咗一陣就去酒店既 Spicy Market食晚餐，Spicy Market d 嘢都幾好食，但係好可惜無我最鐘意嘅生蝦刺生，我哋叫咗蝦餅，兩個炒飯，冬陰公湯同炒雜菜。食飽就返上房休息啦。