花花世界@北海道 - Day8 2/7/2008 札幌＞香港

今曰係旅程最後一日，起身食完早餐 pack 好行李就 check out。第一站去場外市場買手信，ｄ海鮮好新鮮，買咗一大埋用嚟宴客，響場外市場行咗陣就去機場附近嘅 Reva Outlet 行街放血，Beams、LL Bean、Tiger........一路咁掃落去，買到一抽ニ lung，午餐食 Mos Burger ，食完就出機場啦！

去到機場放低我哋，姑丈姑媽就去還車，我哋就整理行李，執好都有17 件，check in 寄倉 over 咗 19kg！好彩 ANA 地勤好人，無收我哋錢。Check in 咗響夠鐘上機就四圍行吓，由於就嚟舉行 G8 會議，機場保安好嚴密，重有警犬巡邏，正當我哋眼望望之際，有隊札幌電視台嘅 crew 殺出，姑丈同嫲嫲走避不及，俾佢哋夾住做訪問，我哋响旁邊就笑到碌地。

係時候上機啦！ Bye Bye 北海道，有機會再嚟喇！

花花世界@北海道 - Day7 1/7/2008 札幌

今日係日本法定大減價嘅日子，當然要努力搏殺，但老爺奶奶唔多啱行，姑媽姑丈好好，特登帶老爺奶奶去定山溪浸溫泉，俾我哋可以努力 shopping。我哋先行 Stella Place ，好多 i.t. 有嘅牌子嗰度都有，但間間舖都塞滿人，又樔到亂晒坑，心儀嘅牌子根本睇唔中，反而響ｄ小眾牌子有斬獲。 掃完一輸洛洛肚餓，係時候返酒店充電兼 join 埋姑丈姑媽佢哋。

等埋佢哋就出發繼續搏殺，奶奶一去到大丸就迷失咗，久久都走唔番出嚟，要姑丈同老公揾番出嚟，繼而再去 Beer Garden 食午餐，午餐係食炸豬扒，麻麻地好食，又好熱氣，食完行吓 Beer Garden，但唔多啱行。所以我同老公決定撇甩洛洛，去 Akachan 入貨，行飽買完就再 join 埋去狸小路買手信。

原先諗住去食燒牛肉放題，但老爺奶奶話唔去，最後決定揭吓ｄ街派嘅 coupon 揾食，揾到類似居酒屋嘅餐廳食晚飯，ｄ嘢都唔錯，食飽飲醉就返酒店，pack 嘢予備聽日返香港啦！