三儍襲首爾 day 4 12/2/2018

我哋今日主要活動係行街同汗蒸幕。起身食過簡單嘅早餐就搭酒店嘅shuttle bus 去東大門行街街。東大門好大好多嘢行，但我哋主攻小朋友嘅衣物，之前做足功課，所以好快就搵到賣小朋友衫嘅專區。呢度賣嘅童裝好靚，質地都好好，不過主要都係賣比較細嘅小朋友衫，而且女仔衫居多，如果家有小公主嘅就一定破產，我哋三個男仔响度只係買咗兩件上身衫，反而意外收獲係幫三少買到個又平又靚嘅書包預備升小學用。

行完東大門我哋就搭地鐵去永登浦行Lotte Mart，搭地鐵再行咗一輪終於到，由於已經到食飯時間，所以決定先醫肚。呢間Lotte Mart地下就係一個好大嘅 food court，，三儍揀咗一陣決定食部隊鍋buffet，d嘢普普通通，食完嘢就行街嘞。我哋主力行超市部份，d小食水果都幾吸引，樣樣都想買，不過我哋一陣仲有節目唔想拎住太多嘢所以都忍手，行完街就去下一個目的地喇。

嚟到韓國，哽要試下汗蒸幕。我哋今次去嘅係龍山汗蒸幕，搭地鐵去到龍山站一出車站就見到。之前我哋已經預先上網買定入場卷，去到核對咗資料拎埋電子手帶就入場，我哋先換好衫就去蒸身。呢度有好多唔同嘅房，聲稱有唔同功能，好似有橡木傳統炭窯、鹽巴房、金字塔房同冷凍房等，除咗橡木傳統炭窯太熱之外，基本上三儍都可以同我哋一齊蒸身，雖然對佢哋嚟講係有d熱，不過就覺得好好玩。出完一身汗係時侯補充水份，我哋去咗小賣部買燻蛋同甜米露一齊食，甜米露好好飲，燻蛋都好好味，食完玩完都已經7點半，係時候預備食晚飯，我哋換返衫就找埋數就搭地鐵去往十里。

我哋今晚去貝殼倉庫食燒烤放題，出咗車站要行過去食店途中開始落雪，仲要越落越大，嚟咗首爾幾日終於見到落雪，三儍零捨開心。 睇完雪我哋就去食晚飯。貝殼倉庫係放題形式，分別有貝類同肉類蔬菜可以自已拎嚟燒，另無限時間，但酒水就另計，我哋坐底就有職員過嚟講解就可以開始食。呢度嘅貝類種類好多，而且有d仲係貴價海鮮好似帶子、鮑魚、扇貝、蠔、螺同唔同款嘅蜆。揀好嘢食我哋就開始燒喇，d貝類好鮮甜好好味，不過唔知係咪唔識控制火候，帶子同鮑魚比較韌，配角嘅燒肉同蔬菜都好好味。我哋慢慢燒慢慢食，食到飽飽就搭地鐵返酒店，食埋甜品就休息喇。   

（day 4 完）

三儍襲首爾 day 3 11/2/2018

今日我哋會join local tour去玩雪。一早起身就出發，先去明洞搵間coffee shop 坐低食早餐，再去指定嘅地點集合上旅遊巴。個tour响出發前已經book咗俾好錢，包來回旅遊巴接送同 Snowyland Vivaldi Park 嘅入場券，上咗車工作人員講解咗今日行程嘅注意點就開車，個半鐘就到咗目的地，我哋拎咗入場券之後就搭纜車上去Vivaldi Park。Vivaldi Park 裹面d有好多雪上遊戲，好似雪兜、充氣雪橇等，主要都係俾小朋友玩，但大人都可以玩埋一份。三儍先玩咗一輪雪兜做熱身，再開始玩d刺激d嘅遊戲好似充氣雪橇，大人細路都玩得好開心。我哋玩咗三個鐘左右，開始有d肚餓，就坐返纜車去返山腳渡假村嘅food court食簡單嘅午餐，再搭旅遊巴返首爾。

雖然頭先大家都玩得好攰，不過返首爾嘅車程有差唔多2個鐘，大家都可以瞓咗一覺。落車時已經天黑，所以我哋決定去食晚餐。我哋今晚去馬場洞食韓牛，由明洞到馬場洞嘅車程其實唔長，但落咗地鐵再搵路行過去牛肉市場就嘥咗唔少時間，結果去到市場好多舖頭都收咗舖，選擇唔多我哋揀咗一間小舖，買咗兩pack牛肉牛扒、生牛肉他他同豬腩肉就上去肉店附設嘅餐廳燒肉食。生牛肉他他d牛肉好甜，雖然係生肉，但完全無腥味，豬腩肉燒起好香，食落脆卜卜，好好食；反而最期待嘅韓牛就有少少失望，雖然牛肉燒起上嚟都好香，食落都好嫩滑，但就無乜牛味，可以話好食，但就唔值賣到咁貴。食飽飽我哋就返酒店休息喇。

（day 2 完）

三儍襲首爾 day 2 10/2/2018

我哋今日主要嘅行程係去摘士多啤梨，之前已經同士多啤梨是園用e-mail予約咗。一早起身食過簡單嘅早餐我哋就出發。由酒店到兩水嘅士多啤梨園大概要個半鐘車車程，我哋食完簡單嘅早餐就出發，先搭地鐵去往十里站，再轉車到兩水，原本諗住已經預鬆咗時間，點知我哋計漏咗原來去兩水站嘅車原來好疏，等咗好耐先至有車，去至兩水站已經比預約時間遲咗好多，好彩一出車站就搵到的士搭，去到士多啤梨園都仲有人摘緊，我哋俾咗錢（大人1萬5仟won，小童1萬won），每人派一個膠盒，就由園主帶我哋入溫室，教咗我哋點樣去摘士多啤梨就開工。我哋之前都試過响日本摘過士多啤梨，所以三儍好快就上手，園主時不時過嚟睇下我哋摘成點，不停幫我哋搵d靚嘅士多啤梨，又示意叫我哋裝多d落膠盒度，所以只係一陣間我哋嘅膠盒已經裝滿好多又紅又大粒嘅士多啤梨。摘完我哋就去食返我哋摘到。我哋洗乾淨d士多啤梨就開餐。d士多啤梨又香又甜又多汁，超好食，比之前响日本摘嘅好食好多，連一唔食水果嘅大哥都食咗幾粒，食食下園主仲額外再摘咗d拎嚟送俾我哋食。

食完好好食嘅士多啤梨，我哋就搭返的士去車站再轉車返首爾，返酒店放低頭先摘到嘅士多啤梨再搭shuttle bus去明洞食午餐。我哋呢餐去豬手小姐食豬手，豬手係滷水煮，有原味同蒜味，我哋揀咗蒜味，另外再點咗個蝦燉蛋同紫菜飛魚子飯團。豬手好好食，食落有豬油香但又唔肥膩，配埋有少少辛辣嘅蒜蓉醬好惹味；叫豬手會送前菜沙律同麵，沙律味道好清爽，麵就即場淥，好彈牙，兩樣都好啱配埋豬手一齊食。另外點嘅燉蛋同飯團都好好味；飯團要自己搓，好好玩，燉蛋就好滑，蛋味好香。雖然叫咗好似唔係好多嘢，但樣樣都好大份，所以大家都食到好飽，食飽我哋就埋單去行街喇。

我哋先响明洞行咗陣街，明洞有條街好似女人街咁，有好多街邊檔，乜都有得賣，當然唔少得街頭少食，雖然我哋啱啱食飽，但都被d香味吸引住，而且街上面天氣都幾涷，所以我哋都食咗好甜嘅南瓜粥暖下身，再轉場落弘大行街。雖然弘大叫做多嘢行多嘢睇，但始終日本先係我哋杯茶，行咗好耐d嘢都多啱睇，只係買咗少少嘢，三儍又開始嗌肚餓，係時候又要預備食晚餐喇。

今晚我哋食燒肉， 大人一萬九千won包燒肉店嘅肉同配菜係任食，但湯飯酒水就要另外計錢。由於價錢算平，而且唔計時間任食，所以舖頭好好生意，要排隊等咗大半個鐘先有得食。燒肉店特別在用炭火燒烤，牛肉燒出嚟零舍香，配埋特製醬汁好好食，雖然餐廳無限用餐時間，但因為坐得麻麻舒服，所以我哋食飽就埋單，返酒店休息喇。

（day 2 完）