三儍襲本州 day 3 18/8/2014

今日我哋做遊客會做嘅嘢，就係去名勝觀光，目的地係淺草雷門同 Skytree。起身食完早餐之後就出發，先搭JR到淺草，雷門响出咗站行2分鐘就到。由於呢度係個好出名嘅景點，所以超多遊客，想同個大燈籠映張合照其實都有d難度。幾經辛苦映完相就經過雷門行去淺草寺，沿途經過好多買人形燒同手信嘅舖頭，由於三儍未見過所以覺得好好奇咁慢慢行慢慢睇。終於行到去淺草寺，但因為天氣實在太熱太曬，而且太多遊客，唔想同人迫，所以沿路行番出去，仲中途買咗雪糕邊行邊食。

下一站係 Skytree。之前睇過資料話由淺草行去Skytree只係十幾分鐘腳程，所以決定行過去。點知....，足足行咗大半個鐘，明明無行錯路，但係望住Skytree就好似海市蜃樓咁，行極都未到，雖然沿途風景都ok，但响30幾度高溫下，拎住一袋二袋小朋友用品，推住坐住2個小朋友嘅bb車，曬住太陽行都幾攞命。終於行到去，但我哋已經又餓又渴，所以決定先搵食，休息一陣。

Skytree 同淺草一樣，周圍都人頭湧湧，連餐廳都係。係咁多間餐廳之中被我哋發現之前响仙台食過嘅燒牛舌，嗰一餐真係好回味，所以今餐都係食牛舌。舖頭好多人等位，我哋要排咗大半個鐘先有得食，不過都值得嘅，因為真係好好味。我哋叫咗兩份再鹽燒牛舌套餐，一份燉牛舌套餐同一份香腸併盤。鹽燒牛舌每一件都好厚，咬落去好彈牙多汁又唔韌；燉牛舌d汁好濃，牛舌燉到好林，啱啱好；個香腸併盤好惹味，用嚟餸啤酒一流。

因為上塔嘅入場費唔平，而且又唔係特別想上去，所以我哋最終無上塔，只係响 Skytree嘅mall裏面行下，其實除咗土產店叫做特別d之外，其他舖都係同百貨公司/mall都差唔多，所以行咗陣就決定返池袋行街。番到池袋我哋行咗 Muji，Beams等香港常見品牌，其中因為Muji裝修大減價，俾我哋用2仟円左右買到3件衫1條褲俾三隻怪獸，真係平到笑。

行完街街返酒店稍為休息就出去食飯，因為已經好攰而且想早d返酒店執行李，所以晚餐只响附近嘅和民食，上到去唔駛等位不特只，職員見我哋有小朋友，仲問我哋係咪唔食煙，最後俾咗間房我哋，一來唔怕嘈到人，二來無乜煙味，真體貼。我哋叫咗d雞翼、餃子、簥麥麵等，d 嘢都ok好食。食完行咗一陣激安店就番酒店，因為要整理行理預備聽日一早check out。

（day 3 完）