呢間壽司店我每次嚟東京都一定會嚟食，而每一次都要排長龍。今日雖然已經晏咗，但依舊都係咁多人，好在三儍都肯合作乖乖排隊，等咗半個鐘左右先有得食。我哋叫咗2個特選壽司set同3個兒童餐。可以講句，响呢度叫兒童餐俾3隻怪獸食簡直嘥錢，因為個set差唔多一半係生嘅，而佢哋根本都未識欣賞魚生住，食咗少少就放咗响度，要我哋執手尾，總知對散叫d熟嘅壽司俾佢哋食算數。至於我哋嘅壽司set，食落唔多新鮮，可能因為如店外吿示所言，因颱風關係魚獲受影響，d魚無咁新鮮，影響咗食物質素。呢餐埋單要8仟幾円，唔算好貴，但就好失望。
食完飯我哋就沿路行落去原宿，途經Kirin beer garden，原本我唔多鐘意日光白白飲啤酒，不過天氣實在太熱，加上呢個係啤酒沙冰，仲有菠蘿味，所以賣600円都買杯試下。唔，果然好清涼好解渴，不過菠蘿唔重，如果菠蘿味重少少重正。
其實行原宿最大目標係 Laforer，而帶住三隻怪獸應該好難掃貨，所以嗲嗲帶住3隻嘢周圍行下，而我就用45分鐘掃貨，買完好滿足搵番佢哋，再去竹下通行，沿路行到JR站，再撘車番池袋。
由於行咗成日已經好攰，加上lunch太飽，所以我哋決定行完超級市場買早餐，再响酒店樓下嘅松屋買便當番房食。
（day 2完）
沒有留言:
發佈留言