一早起身梳洗之後就出去。我哋第一站先去鳥取市嘅魚市場行，睇下有無魚生飯做早餐，不過唔知係咪休漁期，好多舖頭都無開，反而去農產品市場就好多嘢睇，行完一輪見到有炸牛肉餅買咗嚟食，牛肉餅好香脆無油益味，好好食，食完牛肉餅未飽再去附近Aeon Mall買麵包飲品做早餐，食飽就出發去下一站啦！
下一站係青山剛昌故鄉館。青山剛昌係畫「名偵探柯南」嘅漫畫家，而鳥取北榮町就係青山剛昌嘅家鄉，我哋今日參觀嘅青山剛昌故鄉館就以佢嘅名作做主題，介紹青山剛昌嘅漫畫家生涯同作品。由鳥取市揸車落去大概個半鐘左右，到埗第一眼就見到呀笠博士嘅黃色甲蟲車，三儍已經好興奮咁衝去映相，响門口映完一輪相就去買飛入場。呢度同沙丘美術館一樣，遊客只要出示passport就會有入場費優惠。館內大部分展品都係有關柯南，仲有d互動小遊戲可以玩，鐘意睇柯南嘅三儍就最開心。因為趕住去下一個行程，我哋玩咗大概一個鐘左右就要走喇。
我哋揸返車返翻鳥取市，本身為咗去間長龍店食魚生丼飯，點知去到舖頭先知所有丼飯已經賣哂，所以我哋就直接去浦富海岸遊覽船乘船處附設嘅食堂食午餐。我哋叫咗海鮮丼、刺身定食炸雞定食，啲嘢食都唔錯，尤其刺身好鮮甜，食飽飽我哋就去隔離隔離買飛坐遊覽船。
遊覽浦富海岸最好嘅方法就係坐遊覽船，船費大人1300円，小童650円，可以舒舒服服咁吹住海風，欣賞浦富海岸嘅景色。不愧為海岸地質公國，呢度嘅海水好清好乾淨，沿岸有好多海蝕洞，40分鐘嘅旅程一d都唔悶，好快就完咗。落船之後去土產店買手信就走喇。坐完遊覽船之後我哋就揸車上展望台，用另一個角度去欣賞浦富海岸嘅風景，藍天白雲襯埋一望無際嘅海景，真係好靚。
睇完風景影完相就離開浦富海岸，去附近嘅Aeon Mall 行一陣街就予備食晚餐。我哋响酒店附近嘅商店街行咗一個圈之後發現有間新開嘅壽司居酒屋好多人幫趁就決定試下，等左一陣就有得入座，我哋叫好多款炸物包括雞翼、雞軟骨、剛墨魚、蝦、雞等，另外仲有燒尤魚鬚同燒一夜乾。d炸物炸得好香脆，又保留到肉汁，燒尤魚同一夜乾都好好味。食完小食我哋再叫飽肚嘅壽司，壽司由壽司師傅即叫即整，魚生好鮮甜肥美，好食。差唔多食完嘢，店長仲拎咗d玩具出嚟送俾三傻，氹到佢哋好開心。因為鋪頭新開張，好多飲品食物都做緊特價，所以食到飽飽埋單都係九仟幾円，超值。
食飽飯我哋就行去車站附近嘅便利店買甜品，再返酒店嘅大浴場浸浴，整理好行李就休息喇。
（day 4 完）
沒有留言:
發佈留言